AMAKURU

UKWEZI
ubumwe

Huye-Mbazi: Abaturage barashinja umwe mu bayobozi kubaka ruswa no kubaha serivise mbi

Huye-Mbazi: Abaturage barashinja umwe mu bayobozi kubaka ruswa no kubaha serivise mbi
27-11-2019 saa 10:58' | By Nsanzimana Ernest | Yasomwe n'abantu 2255 | Ibitekerezo 3

Bamwe mu baturage bo mu murenge wa Mbazi mu karere ka Huye barashinja Umuyobozi ushinzwe imibereho myiza n’ iterambere mu kagari ka Mutunda ‘Nyaragendahimana Vestine’ kubaka ruswa no kubaha serivise mbi.

Nyiragendahimana Vestine, yanze kugira icyo avuga ku byo ashinjwa adusaba ko tuvugisha, Umunyamabanga Nshingwabikorwa w’ Umurenge kuko ariwe umukuriye.

Mu baturage babwiye itangazamakuru akarengane bakorerwa na Nyiragendahimana hari uvuga ko amaze imyaka 2 ashaka ikiciro cy’ ubudehe.Ngo mu mudugudu baramusinyiye ageze kuri SEDO Vestine yanga kumuha ikiciro cy’ ubudehe.

Uyu muturage avuga ko ibyo akorerwa na Vestine bimugiraho ingaruka kuko magingo aya ngo yabuze uko atanga ubwisungane mu kwivuza kuko nta kiciro cy’ ubudehe afite, ndetse ngo yakabaye afata shisha kibondo nk’ abandi ariko ngo ntayo afata kuko yabuze ikiciro cy’ ubudehe.

Yagize ati “Guhera ku kwa 3 k’ umwaka ushize kugeza uyu munsi SEDO wa Mutunda yanyimye ikiciro cy’ ubudehe. Nagiye ku kagari arambwira ngo genda ubanze uzane amafaranga ya mitiweri, ndamubwira nti nta mafaranga mfite uyu munsi wowe nshyira muri machine mpe amahirwe umwana yo kuba yaba afata igikoma, hari agatsinda ndimo Imana nimfasha mitiweri nzayitanga”.

Uyu muturage avuga ko yari yavuye ku mudugudu bamusinyije impapuro zimusabira kujya mu kiciro cya 2, gusa ngo Vestine yanze kumushyira muri machine kugeza ubu.

Uretse abashinja Vestine kubaha serivise mbi hari n’ abavuga ko abaka ruswa. Umwe muri bo yabwiye UKWEZI ati “Ikibazo mfite kiri kuri gahunda y’ ubufasha bwa VUP, abasaza n’ abakecuru bajya gusinyisha ku kagari sociale Vestina w’ akagari ka Mutunda akababwira ati ‘ndabasinyira mugende mugaruke munzaniye amafaranga nimutayazana ubutaha ntimuzibonamo”.

Uyu muturage uvuga ko nyina yakuwe ku rutonde rwa VUP rw’ abahabwa inkunga y’ ingoboka kubera ko yanze guha ruswa Vestine akomeza agira ati “Bamwe bakaza bayazanye, abandi bataza ubutaha nyine agahita abakuraho, ubu yakuyemo abakecuru benshi, barataka, abasaza bamwe bagiye kwibariza, hari abo bagaruyemo hari n’ abandi bakiri aho kandi ntacyo biyunguye”.

Abaturage bavuga ko abaha ruswa vestine iyo umuntu wabo apfuye aguma kuri urwo rutonde umusimbura we agakomeza guhabwa inkunga y’ ingoboka, ngo ariko iyo nta kintu umumenyera umuntu wawe agapfa amafaranga agakomeza kuza hagashira nk’ amezi 3, Vestine arayakwima kandi ubizi ko amafaranga yasohotse.

Aba baturage basaba inzego z’ ubuyobozi zikuriye Vestine ko zabakurikiranira iki kibazo Nyirangendahimana Vestine ntakomeze kubarenganya.

Nyirangendahimana Vestine yabwiye UKWEZI ko adafite uburenganzira bwo kugira icyo avuga ku byo ashinjwa, ko ahubwo twabaza umuyobozi w’ umurenge, gusa yadutangarije ko nta muturage bafite icyo bapfa.

Uwimabera Clemence , Umunyamabanga Nshingwabikorwa w’ Umurenge wa Mbazi avuga ko iki kibazo atari akizi gusa ngo agiye kugikurikirana.

Yagize ati “Ntabwo nkizi ariko ubwo ndagikurikirana,…urumva ko nk’ uwo muturage kumara umwaka wose nta kiciro agira byo ni ikibazo gikomeye”.

Gitifu Uwimabera Clemence avuga ko ikibazo cyo kuba Nyirangendahimana Vestine yaka ruswa abaturage atari akizi

Gitifu Uwimabera ku kibazo cyo kuba hari abaturage bavuga ko Vestine abaka amafaranga ku nkunga ya VUP utamuhayeho akamukura ku rutonde ati “Cyaba ari ikibazo gikomeye peee! Turafatanya, icyo kibazo tugikemure, ubwo nanjye ngiye kubaza abaturage banjye, ntumire n’ inama y’ abahabwa iyo nkunga ya DS(Direct Support) hanyuma mbafashe gikemuke”.

Umuvunyi Mukuru Anastase Murekezi avuga ko hari intambwe yatewe mu miyoberere, gusa agaya abayobozi b’ inzego z’ ibanze bacyaka abaturage ruswa kugira ngo babahe ibyo bemererwa n’ amategeko.

Agira ati “…ariko tugaye bamwe mu bayobozi b’ inzego z’ ibanze bahemukira abaturage, bamwe na bamwe nka bariya baba bashaka imirimo muri VUP, cyangwa se abakeneye ubufasha bushingiye kuri VUP, cyangwa se bariya baba bategereje ko inka za gahunda ya girinka. Izi gahunda zigomba zibageraho badatanze ruswa”.

Murekezi akomeza agira ati “Kubona akazi muri VUP, kubona imfashanyo yateganyijwe muri VUP, kubona inka muri gahunda ya Girinka bifite uko byateganyijwe bifite inzira igenda mu mucyo, iyo nzira y’ umucyo rero niyo twifuza ko abayobozi bajya bakurikiza”.


Umuvunyi Mukuru Anastase Murekezi avuga ko abayobozi bagomba kurangwa n’ ubunyangamugayo no gukuriza inzira y’ umucyo mu guha abaturage serivise za VUP

Kuri uyu wa 26 Ugushyingo 2019, Urwego rw’ Umuvunyi rwashyize ahagaragara isuzuma rigaragaza uko uturere tw’ intara y’ amajyepfo twarushanyijwe gushyira imbaraga mu kurwanya ruswa n’ akarengane.

Akarere ka Huye kari ku mwanya wa 6 mu turere 8 tugize Intara y’ Amajyepfo. Huye ifite amanota 61,5% mu gihe Gisagara iri ku mwanya wa mbere ifite amanota 89,5%.


INKURU ZA :
Tanga Igitekerezo
Ibitekerezo 3
Marcel Kuya 4-12-2019

Gasihiri ibyo uvuga bishobora kuba ukuri! Hari abaturage barangaza itangazamakuru bikaba bisaba ko habaho kwitonda! Gahunda ya Leta yacu ntabwo aruko abantu baheranwa n’iyo nkunga. Ni ngombwa ko mugihe runaka abantu batangira kwigira, bakava mu kiciro bajya mu kindi kandi biteza imbere. Rero uriya Muyobozi ashobora kuba akangurira abantu kwiteza imbere ngo bareke gutega amaso kuri Leta gusa, ugasanga ntibamwishimiye. Ni ngombwa rero ko abayobozi bakuriye uriya mu SEDO babisuzumana ubushishozi kugira ngo atazavaho abirenganiramo. Inzego z’ibanze zikunze guhura n’utubazo tugendanye n’ imyumvire iteye kuriya.

Eric Kuya 30-11-2019

Ariko kubera atinda gutanga service ku ba turage ayobora,ibyo yashinjwa byose byamufata

Gasihiri Kuya 29-11-2019

Mwiriwe neza mwese, ariko abayobozi baragowe naho abaturage bo bariraritse nagirango mvuge kuri iyi nkuru muri make umuntu wese uzi ibibera mu nzego z’ibanze arabona ko uyu muturage icyo agamije ari ugusebya umuyobozi SEDO none se ko avuga ko yabuze uko atanga Mutuelle kandi nyuma akavuga ko umuyobozi yamusabye kumuha amafaranga ya MUSA undi akavuga ko ntayo afite ubundi yari kwishyura Mutuelle akuyehe amafaranga? none c ko abafata #SHISHAKIBONDO ari imiryango iri mu kiciron cyo mbere n’icya kabiri cy’Ubudehe abwiwe niki ikiciro bari kumushyiramo,cg akeka ko kuba mu mudugudu bari bamuhaye ikiciro cya kabiri automatically yagombaga kukibona? sibyo kuko no mumu dugudu hashobora kuba amarangamutima ugasanga bari bamuhaye ikiciro adakwiye wenda yajya mu cya gatatu agahita atakaza amahirwe yo kubona iyo shishakibondo numva yatumye acika ururondogoro kimwe nuko wenda yari kubona ni cya mbere nta wamenya . IKINDI:Abaturage barinda bavuga ngo SEDO hari abo ashyira kurutonde rw’abahabwa inkunga y’ingoboka (DIRECT SUPPORT) DS abandi akabakuraho ubwo wasanga hari uwabisoma hano akabyemera koko? hoya abaturage ntibakifatire ku gahanga abayobozi (urtse ko rimwe na rimwe banatizwa umurindi n’inzego zikuriye utugali) urutonde rw’abagenerwabikorwa ba VUP/DS rutoranywa n’abaturage kandi bibera muruhame mu midugudu urwo rutonde nirwo Akagali gatanga ku Murenge hanyuma #inama njyanama y’Umurenge igaterana ikarwemeza (mwibuke ko inama njyanama igizwe n’abajyanama baturuka mu nzego zose mu tugali twose) rero nta bubasha na bumwe Utugali tugira mu kugene abahabwa inkunga y’ingoboka abo babivuga hubwo baba bashaka kujy aku rutonde kandi batabikwiye, kuvuga ngo hari abapfa bagahita bavanwa kurutonde , none se baragirango VUP ihinduke umutungo w’uyifata kuburyo apfuye hakurikizwa itegeko rirebana n’izungura? maze abakomoka kuwayifataga bahite bayifata? hoya gusa niba uwari ukuriye umuryango hari abo yari atunze kandi badafite ukundi babaho ibyo birarebwa kuburyo bakomeza gufata ayo mafaranga kugeza mu gihe runaka bamenye ko kandi DS atari akarima kabo bagomba kuyifata hakagera igihe bagacuka bakajya mukindi kiciro bakabisa abandi (Graduation) muri make ba ES

English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...