Ubuyobozi bwa shampiyona ya Basketball ikomeye ku isi, NBA ibarizwa muri Leta Zunze Ubumwe za America bwatangaje ko bitemewe ko abakinnyi basuhuzanya n’abafana cyangwa ngo bakoraneho mu rwego rwo kwirinda Coronavirus.

Ni nyuma y’uko icyorezo cya Covid-19 (Coronavirus) kigaragaye muri America ndetse kugeza ubu abagera kuri batandatu bakaba bamaze guhitanwa nacyo muri iki gihugu.

NBA yategetse abakinnyi bose ndetse n’abayobozi b’amakipe kujya kwipimisha no gufata inkingo zitandukanye mu rwego rwo kuyirinda hakiri kare ngo itazakwirakwira bigatuma iyi shampiyona ikunzwe na benshi ku isi mu mukino wa Basketball ihagarara nk’uko umupira w’amaguru wahagaze muri bimwe mu bihugu byo ku mugabane w’Uburayi na Asia.

Kugeza ubu umubare w’ubwandu bwa Coronavirus ugenda wiyongera aho abayanduye bamaze kugera ku 90,000 ku isi yose kimwe n’abandi bagenda bagaragaza ibimenyetso byayo, naho abagera ku 3000 bakaba barahitanywe nayo nk’uko ishami ry’umuryango w’Abibumbye ryita ku buzima, OMS ribitangaza.

Abakinnyi ba NBA kandi usibye kudasuhuzanya n’abafana no gukoranaho, babujijwe kudakora ku bikoresho byabo no kubasinyira ku myenda, ibisanzwe bizwi nko gutanga ‘Autographs.’

Bamwe mu bakinnyi bakimara kubona ubu butumwa bahawe bahise bihutira kubuha agaciro maze batangira kwandika ku mbuga nkoranyambaga zabo basaba imbabazi abafana babo ko guhera ubu bahagaritse kuganira nabo nk’uko bari basanzwe babikora mbere na nyuma y’umukino.

Uwitwa CJ McCollun ukinira ikipe ya Blazers Portland yagiye kuri Twitter ye yandika ati “Coronavirus yageze mu gace ka Oregon, nkanguriye buri wese kwirinda iyi ndwara akaraba intoki n’isabune, gupfuka umunwa akoresheje udukoresho twabugenewe. Ku mugaragaro ngiye guhagarika gusinya Autographs kugeza igihe ibintu bizongera nikamera neza.”

Ubuyobozi bwa NBA kandi bwatangaje ko bwatangiye gukorana n’ibigo byita ku buzima ndetse n’inzobere mu gushaka uburyo bwo kwirinda iki cyorezo ari nako inakangurira abaganga b’amakipe gukomeza kureba uburyo bahashya iyi ndwara.

Abakinnyi babujijwe gukora ku bikoresho by’abafana babasinyira za ’Autographs’