Abaturage bo muri Santire ya Mahoko ,Umurenge wa Kanama ho mu Karere ka Rubavu , baravuga ko inzego z’umutekano zarashe abajura bitwaje imihoro bavuye kwiba mu rugo rw’umuturage umwe akahasiga ubuzima.

Aba baturage mu byishimo byinshi bavuga ko beretswe ibyari byibwe n’aba bakekwaho ubujura birimo televiziyo na radio, bavuze ko bashimiye inzego z’umutekano.

Bakomeza bavuga ko iraswa ry’abakekwaho ubujura bari barashwe mu ijoro rishyira ku wa Kane, barasiwe hafi y’ahazwi nka KIAKA imbere y’ikiraro cya Sebeya.

Umwe ati “Twishimye, tutabagira [abashinzwe umutekano] twashira twapfa. Bakomeze babirase babikureho tugire amahoro, babe bacye beza.”

Bavuga ko abajura ba ruharwa muri aka gace bakamejeje kandi ko bari kubyigisha ababyiruka bityo ko ari na yo mpamvu bishimiye iraswa ry’aba bafatwaga nka ba ruharwa mu bujura.

Ikindi ngo aba bajura na bo iyo bagize uwo bahura bamwivugana kuko baba bafite imihoro n’izi ntwaro gakondo.

Undi ati “Iyo ubahagaritse, bo basigaga bagutemaguye, kuko abajura biba aha, baba bitwaje imipanga. Ufatiwe mu cyuho agapfa byo nta n’ibanga ririmo, byaba ari na byiza.”

Aba baturage bavuga ko barambiwe ubujura bari gukorerwa aha kuri Mahoko,bagasaba ko hakazwa ibikorwa by’umutekano nk’ibi byaba na ngombwa ababifatiwemo bakaraswa kuko nabo iyo baciye icyuho umuturage bamwivugana.

Nubwo urwego rwa Polisi mu ntara y’Iburengerazuba rutaragira icyo rutangaza kuri aya makuru, gusa abaturage bavuga ko harashwe ibisambo bibiri bifite imihoro byari bivuye kwiba ibikoresho byo mu rugo birimo radio na televiziyo.

Ivomo:Radiotv10