Minisiteri y’Ubuzima mu Rwanda yatangaje ko umuntu wa gatatu mu gihugu wishwe n’Icyorezo cya COVID19 giterwa na Coronavirus ari umusirikare wari mu butumwa bw’amahoro.

Ni imibare yatangajwe kuri uyu wa Gatatu tariki 1 Nyakanga 2020, aho Minisiteri y’Ubuzima yavuze ko abarwayi bashya bagaragaye bose hamwe ari 17, mu gihe abakize ari 33 naho umwe ariwe wahitanywe n’iki cyorezo.

Uwitabye Imana yari umusirikare wa RDF w’imyaka 51 wari mu butumwa mu mahanga wari usanzwe afite ubundi burwayi.

Muri rusange mu masaha 24 ashize hagaragaye abanduye bashya 17, barimo barindwi babonetse i Kigali, babiri babonetse i Rusizi mu gihe ababonetse i Ngoma ari batandatu nahoi Rubavu haboneka babiri. Abamaze kwandura bose ni 1,042.

Uyu munsi kandi hakize 33, bituma umubare w’amabaze gukira iki cyorezo ugera ku 480. Naho abantu bakirwaye ubwo bose hamwe ni 559 mu gihe umuntu umwe ariwe umaze guhitanwa na COVID19.

Uyu musirikare apfuye nyuma y’ umupolisikazi w’imyaka 24 wari mu butumwa bw’akazi mu mahanga aho yanduriye Koronavirusi aza mu Rwanda amaze kuremba.

Uyu mupolisikazi yahitanywe n’iki cyorezo cya COVID19 giterwa na Coronavirus ku wa Kabiri tariki 2 Kamena 2020.