Kompanyi nyarwanda y’indege za gisivili izwi nka RwandAir, kuri uyu wa Gatatu biteganyijwe ko yakira imwe mu ndege nshya z’akataraboneka igiye kujya yifashisha mu ngendo zayo, izi zikaba zije zisanga izindi ndege zigezweho iherutse kwakira.

Mu kwezi k’Ukuboza 2015, nibwo RwandAir yagiranye amasezerano n’ikigo gikora indege cyo muri Amerika, bumvikana ko iyi sosiyete yo mu Rwanda itwara abantu mu ndege izahabwa indege zigezweho za Boeing 737-800 Next Generation. Indege ya mbere bemeranyijwe ko ishyikirizwa RwandAir kuri uyu wa Gatatu tariki 16 Ugushyingo 2016 hanyuma iya kabiri ikazatangwa muri Gicurasi 2017.

RwandAir ibaye isosiyete itwara abantu mu ndege ya mbere muri Afurika ikaba n’iya kabiri muri rusange ibashije kubona izi ndege za Boeing 737-800NG zifite ikoranabuhanga rihanitse rya murandasi zigendanwa mu kirere, izi ndege zombi zikaba zifite imyanya 154.

Intebe z’izi ndege zikozwe mu buryo abazicayemo batagira amavunane mu gihe cy’urugendo rwabo

Urebye ku rubuga rwa Wikipedia, usanga izi ndege zo mu bwoko bwa Boeing 737-800NG zigura akayabo kari hagati y’amadorali ya Amerika 76,000,000 na 109,900,000, ni ukuvuga ko imwe ishobora kugurwa asaga 90.118.000.000 uyabaze mu mafaranga y’u Rwanda. Ubwoko bw’izi ndege bwatangiye gukorwa mu 1996, iya mbere ikaba yarakoze urugendo rwayo rwa mbere tariki 9 Gashyantare 1997.

Izi ndege zije zisanga izindi 10 za RwandAir zirimo A330-200 iherutse kugezwa i Kigali na A330-300 izahagera vuba, hamwe na boeing 737 enye, na Bombardier Q400 ebyiri n’izindi Bombardier ebyiri za CRJ-900. Rwandair izifashisha izi ndege kuri ubu zizaba zibaye 12 mu kwagura ingendo zihuza Kigali n’ibice binyuranye by’isi.