Ikigo cy’Igihugu cy’Ubuzima (RBC) gitangaza ko igereranya ry’icyumweru gishize n’iki mu mibare igaragaza imiterere y’icyorezo cya COVID-19, rigaragaza ko habayeho kuzamuka cyane kuko abasanganwa ubwandu b’iki cyorezo biyongereho 275% naho abahitanwa na cyo bakaba bariyongereyeho 25%.

Dr Sabin Nsanzimana avuga ko imibare yagaragaza ko mu cyumweru gishize abanduye COVID-19 bari 300, “Uyu munsi dufite 1 200 muri iki cyumweru gikurikiye. Ubwo ndagereranye ibyumweru bibiri gusa, abarwayi bashya biyongereho 275%.”

Avuga kandi ko abahitanwa na COVID-19 na bo bazamutse cyane na zo kuko muri ibyo byumweru bibiri zazamutseho 25%.

Dr Sabin Nsanzimana kandi avuga ko n’indembe z’iki cyorezo cya COVID-19 na zo ziyongereye kuko ibitanda byari bihari bitariho abarwayi ubu byose byagiyeho abarwayi.

Ati “Ku buryo ijanisha ry’abajya kwa muganga bagakenera igitanda na ryo ryageze ku 175% by’inyongera.”

Avuga kandi ko nk’ubusesenguzi bw’inzego z’ubuzima, bugaragaza ko habayeho kugereranya uko umuvuduko w’iki cyorezo uhagaze ubu, mu cyumweru gitaha imibare yaba yazamutse cyane ku buryo bisaba ko hari igikorwa.

Inzego z’ubuzima kandi zivuga ko mu bamaze guhabwa urukingo rwa COVID-19 hamaze kuboneka 400 banduye.

Inzego z’ubuzima zikavuga ko nubwo nta n’umwe muri bo wagize ikibazo cyangwa ngo agaragaze ikimenyetso na kimwe, bishoboka ko abo na bo banduje abandi batari bacye.

Kubera ko imibare y’abarwayi ikomeje kwiyongera, ibigo binini birimo Kanyinya na Gatenga byari bimaze hafi amezi 4 bifunze byongeye gufungurwa, kuko ibitaro bya Nyarugenge bigeze hafi kuri 65% by’ubushobozi bifite bwo kwakira abarwayi.

UKWEZI.RW