AMAKURU

UKWEZI
Canal+ christmax

Ni inde uzabazwa igwingira ry’abana ryazamutse mu Ntara y’Amajaruguru ikungahaye kuri byinshi ?

Ni inde uzabazwa  igwingira ry’abana  ryazamutse  mu Ntara y’Amajaruguru ikungahaye kuri byinshi ?
14-09-2022 saa 09:20' | By Habineza Gabriel | Yasomwe n'abantu 398 | Ibitekerezo

Mu bushakashatsi bwa gatandatu ku mibereho y’abaturage buzwi ku izina rya Rwanda Demographic and Health Survey (RDHS), bwakozwe n’Ikigo cy’igihugu cy’ibarurishamibare mu Rwanda (NISR), bwa 2019-2020 bwerekanye ko mu Ntara y’Amajyaruguru igwingira ry’abana rigeze kuri 41% rivuye kuri 39% muri 2014-2015 nyamara iyo Ntara ikungahaye ku buhinzi n’ubworozi.

Iyo mibare kandi yerekana ko Akarere ka Musanze kaza ku isonga mu kugira abana bagwingiye kuko bavuye kuri 37.8% muri 2015 bakagera kuri 45.4% muri 2020, Burera yavuye kuri 42.9% igera kuri 41.6%, Gicumbi yavuye kuri 36.6% igera kuri 42.2%, Gakenke yavuye kuri 46% igera kuri 39.3% mu gihe Rulindo yavuye kuri 33.8% igera kuri 29.7% .

Ubwo bushakashatsi bwagaragaje kandi ko muri rusange mu gihugu igwingira ry’abana riri kuri 33% rivuye kuri 38% bivuze ko habayeho igabanyuka rya 5%, bihabanye cyane n’uko mu Ntara y’Amajyaruguru byari bimeze kuko ho mu Turere twa Musanze na Gicumbi ho imibare yazamutse kandi aritwo two mujishi w’ubuhinzi n’ubworozi butunze benshi mu gihugu.

Usibye utwo turere twa Musanze na Gicumbi, hiyongeraho n’Akarere ka Burera twose tukagaragara mu myanya ya nyuma mu gihugu nyuma ya Ngororero iza ku isonga mu gihugu ku kigero cya 51.8% by’abana usanga baragwingiye.

Ni ikibazo Ubuyobozi bw’iyo Ntara, budahwema kwereka abaturage bayituye biganjemo abakora imirimo y’ubuhinzi, ubworozi, ubucuruzi, ubucukuzi bw’amabuye y’agaciro n’indi mirimo arimo n’ubushabitsi ko gihangayikishije bityo ko bakwiye gufata ingamba zikomeye mu guhangana nacyo cyane ko urebye ibikenewe ngo kiranduke byose ushobora kubibona muri iyo Ntara.

Zimwe mu nama zitangwa ngo ikibazo cy’igwingira ry’abana kirandurwe, zirimo kwita ku buzima bw’umwana n’umubyeyi kuva agitwita kugeza byibuze ku minsi 1000 ya mbere y’umwana na nyina, kugabura indyo yuzuye kandi ku gihe, kurinda umubyeyi n’umwana imvune, kugira isuku ihagije no kubahiriza inama zitangwa n’abahanga mu buzima harimo no kwivuza neza igihe cyose hagaragaye ikibazo cy’uburwayi.

Umuyobozi w’Intara y’Amajyaruguru Nyirarugero Dancille, avuga ko kuri ubu icyo bashyize imbere ari ubukangurambaga muzagera ku miryango myinshi akabasaba ubufatanye mu guhangana n’icyo kibazo.

Yagize ati" Turimo gukorana kandi n’ibigo nderabuzima kugira ngo baturebere ku babyeyi bajya kwipimisha ku batwite uko abana babo bahagaze, dore ko umubyeyi ashobora gutwita umwana akagwingirira mu nda akazavukana icyo kibazo. Turabakangurira no kuturebera ku babyeyi bafite abana bamaze kuvuka, mu gihe bagiye kubakingiza tumenye abafite ikibazo cy’igwingira, kugira ngo dukomeze gufata ingamba zo kubitaho."

Akomeza agira ati "Twese turararikirwa gufatanya mu bukangurambaga bwo gukangurira ababyeyi kubonera abana umwanya, babategurira indyo yuzuye mu gukemura ikibazo kiduhangayikishije cy’igwingira mu bana ndetse nyuma y’ibyo bakagira n’isuku kugira ngo batarwaragurika n’ubundi bakagwingira."

Bamwe mu bayobozi bo mu turere dutandukanye two muri iyo ntara, nabo babona ko icyatumye basubira inyuma imibare y’abana bagwingira ikiyongera ari uko habayeho kubivuga gusa ariko ntibakurikirane imiryango yagaragaragamo icyo kibazo.

Umuyobozi w’Akarere ka Gicumbi wungirije ushinzwe imibereho myiza y’abaturage Jean Marie Vianney Mbonyintwari, avuga ko nk’akarere gakungahaye cyane ku mata kuko kabona litiro zirenga ibihumbi 110 ku munsi, bashyizeho ubukangurambaga bunyuze mu baturage bwiswe Nyira nkugire tugeraneyo, bugamije gufashanya no kwigishanya binyuze mu baturage n’abayobozi kandi ko nta kabuza bibwitezeho umusaruro uzatuma bahangana n’iki kibazo cy’igwingira ry’abana.

Yagize ati" Hano muri Gicumbi ntacyo tubuze ngo duhagarike igwingira mu bana bacu, turi Akarere ka mbere gafite umukamo mwinshi ku muturage kandi keramo ibihingwa byinshi. Ikibazo twagize ni uko wasangaga ababyeyi ayo mata bayagurisha, amagi bakayagurisha ugasanga ntayo asigaza mu rugo noneho tukagira umusaruro uhagije ariko tutawugabura."

" Kuri ubu twatangije ubukangurambaga bwiswe ngira nkugire tugeraneyo aho abaturage ubwabo bicarana hamwe bakareba ibibazo bibugarije bagafatanya n’ubuyobozi kubikemura ariho n’iyi gahunda yo kwita ku mirire n’imikurire izakemukira."

Umuyobozi w’Akarere ka Burera we avuga ko n’ubwo ikibazo cy’igwingira kikigaragara muri ako karere bafashe ingamba zo kugikemura agasaba buri wese kubigira ibye.

yagize ati :"Ingo nyinshi zitunze Inkoko, bivuga ko zabona Amagi ariko hari imwe mu miryango ihitamo kuyagurisha aho kuyarya n’amata ni uko, twashyize imbaraga mu gukangurira abagize imiryango kubanza kwihaza bakabona kugira ibyo bagurisha, tubashishikariza kugira akarima k’igikoni no gukoresha ibyo bafite mu ngo ndetse no kugira isuku muri byose. Ikindi ni uko abajyanama b’ubuzima n’izindi nzego zifite aho zihurira no kwita ku mwana bashyira imbaraga mu kwigisha abaturage ibigize Indyo yuzuye n’uburyo bwo kuyitegura."

Intara y’Amajyaruguru ni yo ifite umubare munini w’abana bari munsi y’imyaka itanu bagwingiye aho bageze kuri 41%, Intara y’Iburengerazuba ikagira abana 40%, Intara y’Amajyepfo 33%, Intara y’Iburasirazuba abana bagwingiye ni 29% mu gihe Umujyi wa Kigali uri kuri 21%.

Uturere dutandatu tuza ku mwanya wa mbere mu kugira abana benshi bafite ikibazo cy’igwingira mu gihugu ni Musanze, Ngororero, Nyabihu, Burera, Rubavu, Gicumbi.

Igwingira ry’abana bari munsi y’imyaka itanu, ni ikibazo gikunzwe kugarukwaho n’Umukuru w’igihugu Paul Kagame iyo yahuye n’abayobozi, aho akunze kubatunga agatoki nka ba nyirabayazana b’icyo kibazo, babiterwa no kutegera abaturage ngo babigishe gutegura indyo yuzuye, ahubwo igihe kinini bakakimara bari mu biro.

Ubwo yasozaga amahugurwa yagenewe abagize Njyanama na Komite Nyobozi z’uturere n’Umujyi wa Kigali ku itariki 29 Ugushyingo 2021, Perezida Kagame yongeye kubaza abayobozi ku kibazo cy’igwingira, abaha ubutumwa bugira buti “Iyo abana bacu bagwingira n’igihugu kiragwingira, ese murifuza ko tuba igihugu kigwingiye ?”

Inkuru ya Jean Claude BAZATSINDA


INKURU ZA :
Tanga Igitekerezo
Ibitekerezo
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA