AMAKURU

UKWEZI
Canal+ christmax

Hashimangiwe ko ubu bigoye kurenganya umuntu mu rukiko kuko hari uburyo bwizewe bwo gupima ibimenyetso

Hashimangiwe ko ubu bigoye kurenganya umuntu mu rukiko kuko hari uburyo bwizewe bwo gupima ibimenyetso
19-08-2022 saa 17:30' | By Chief Editor | Yasomwe n'abantu 5044 | Ibitekerezo

Muri gahunda y’Ubukangurambaga bwa "Menya RFL" bugamije kumenyesha abaturage ibikorwa bya Laboratwari nyarwanda y’Ibimenyetso bya gihanga bikoreshwa mu butabera, mu karere ka Huye kuri uyu wa Gatanu tariki 19 Kanama 2022, hasobanuwe uburyo mbere byashobokaga ko umuntu akatirwa igihano cy’igifungo arengana kuko nta buryo bwo gupima ibimenyetso mu buryo bwa gihanga bwari buhari.

Uyu muhango wakomereje mu karere ka Huye nyuma yo gutangirira i Musanze, witabiriwe n’abantu bo mu nzego zitandukanye zirimo izikora ibijyanye n’ubutabera, inzego z’ubutegetsi bwite bwa Leta ndetse n’abandi bitabiriye ku bwinshi ngo basobanurirwe uburyo iki kigo ari bo cyashyiriweho kandi kigamije kubafasha kubona ubutabera buboneye.

Abantu benshi mu nzego n’ingeri zitandukanye bitabiriye iki gikorwa

Umuyobozi mukuru wa Laboratwari y’Ibimenyetso bya gihanga bikoreshwa mu butabera (Rwanda Forensic Laboratory) Lt Col Dr Karangwa Charles, atangiza ubu bukangurambaga mu karere ka Huye yavuze ko bugamije kubamenyesha serivisi batanga kugirango bazitabire kandi bafashwe uko bikwiye.

Yasobanuye kandi ko ari amahirwe akomeye kuba iki kigo kiri mu Rwanda, kuko mbere wasangaga bifata igihe kinini kuko ibimenyetso byifashishwa mu butabera byoherezwaga hanze bikajya gupimirwayo, ibyo bikaba byaranatumaga bihenda cyane.

Lt Col Dr Karangwa Charles, umuyobozi mukuru wa Rwanda Forensic Laboratory

Yakomeje agira ati : "Twarabibonye aho wasangaga umuntu yarakatiwe nk’imyaka 25 nyuma ugasanga nta bimenyetso bya gihanga bimuhamya. Tuzakomeza kubikangurira abaturage tugamije ko habaho ubutabera bunoze kandi buhamye. Abaturage icyo tubashishikariza ni ukutugana kuko twiteguye kubafasha dufatanyije nabo n’inzego zindi dukorana."

Alice Kayitesi, Guverineri w’Intara y’Amajyepfo yashimiye byimazeyo RFL ku bw’umusanzu wayo ndetse ababwira ko batibeshye kuzana ubu bukangurambaga "Menya RFL" muri iyi Ntara abereye umuyobozi. Yavuze ko ubukangurambaga bwo kumenyekanisha RFL buje mu gihe bwari bukenewe cyane.

Laboratwari y’u Rwanda y’ibimenyetso bishingiye ku bumenyi n’ubuhanga byifashishwa mu butabera, Rwanda Forensic Laboratory, RFL, yifashishwa mu gutahura inyandiko mpimbano n’izindi zagibwaho impaka, kumenya isano abantu bafitanye, guhuza ibimenyetso by’ahakorewe icyaha n’abagikoze, ikaba iganwa n’inzego za Leta n’abandi bantu ku giti cyabo baba bashaka ibimenyetso bishingiye ku bumenyi bwa gihanga.


INKURU ZA :
Tanga Igitekerezo
Ibitekerezo
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA