Guverinoma y’u Rwanda yongeye gutsindwa mu rubanza yarezwemo gufatira no kugurisha mu buryo bunyuranyije n’amategeko, inyubako izwi nka Union Trade Center (UTC) yahoze ari iy’umunyemari Rujugiro Tribert Ayabatwa, itegekwa kwishyura 1 000 000 $ mu gihe mbere yari yaciwe ibihumbi 500 $.

Urukiko rw’Umuryango wa Afurika y’Iburasirazuba (EACJ) rwaburanishije uru rubanza, mu kwezi k’Ugushyingo 2020, na bwo rwari rwemeje ko u Rwanda rutsindwa kuri iki kirego.

Icyo gihe uru rukiko rwari rwategetse Guverinoma y’u Rwanda kwishyura Rujugiro ibihumbi 500 USD nk’ubwishyu bw’ibyangijwe muri iyi nzu ndetse igatanga amafaranga yose yavuye mu bukode bwayo kuva tariki 01 Ukwakira 2013 kugeza tariki 27 Nzeri 2017.

U Rwanda rutanyuzwe n’iki cyemezo, rwarakijuririye muri uru rukiko n’ubundi rw’Umuryango wa Afurika y’Iburasirazuba.

Uru rukiko rwatangaje umwanzuro warwo w’ubujurire kuri uyu wa Kabiri tariki 30 Kanama 2022, rwongeye kwemeza ko Guverinoma y’u Rwanda yafatiriye ndetse ikagurisha mu buryo bunyuranyije n’amategeko iyi nyubako isanzwe ikorerwamo ibikorwa by’ubucuruzi.

Uru rukiko ruvuga ko ibyakozwe na Guverinoma y’u Rwanda binyuranyije n’ibikubiye mu ngingo zinyuranye [zagaragajwe] z’amasezerano ashyiraho Umuryango wa Afurika y’Iburasirazuba.

Rwategetse kandi ko u Rwanda ruzishyura inyungu ya 6% ya buri mwaka kuva ku itariki yatangiweho icyemezo cy’Urukiko.

Muri 2013, UTC yatanze ikirego muri uru rukiko rwa EACJ, isaba gusubizwa umutungo wayo uherereye mu Karere ka Nyarugenge mu Mujyi wa Kigali yambuwe na Guverinoma y’u Rwanda ivuga ko wasizwe na bene wo kuva muri 2013.

Muri uru rubanza rw’ubujurire, Intumwa Nkuru ya Leta y’u Rwanda yari ihagarariwe na Me Nicholas Ntarugera mu gihe UTC yaburaniwe na Francis Gimara na Hannington Amol.

Iyi nyubako yafatwaga nk’umutungo utagira bene wo kuva muri 2013, u Rwanda rwavugaga ko kuva icyo gihe Rujugiro yagiye muri Afurika y’Epfo ntasige umuntu ucunga umutungo we.

Iyi nyubako iherereye mu mujyi wa Kigali rwagati yagurishijwe mu cyamunara muri Nzeri 2017, igurwa n’ikigo Kigali Investment Company cyatanze 6 877 150 000 Frw.

Guverinoma y’u Rwanda yavugaga ko itigeze ifatira uyu mutungo, yavuze ko Ikigo cy’Igihugu gishinzwe imisoro n’amahoro, cyakoze ibinyuze mu nzira zemewe n’amategeko kugeza ubwo iyi nyubako yagurishwaga mu cyamunara.