AMAKURU

UKWEZI
Canal+ christmax

Abavoka hafi 96 bahagaritswe ku mirimo kubera amakosa atandukanye

Abavoka hafi 96  bahagaritswe ku mirimo  kubera amakosa atandukanye
20-08-2022 saa 09:58' | By Habineza Gabriel | Yasomwe n'abantu 1494 | Ibitekerezo

Uragaga rw’abavoka mu Rwanda, RBA, rwahagaritse abavoka 96 kubera amakosa atandukanye afitanye isano n’umwuga, yiganjemo abatarishyuye imisanzu y’Urugaga rw’Abavoka.

Mu ibaruwa iriho urutonde rw’abasaga 96 yanditswe n’Urugaga rw’Abavoka mu Rwanda, hagarazwa ko muri abo bavoka bahagiritswe, harimo abahagaritswe by’agateganyo mu gihe kiri hagati y’ukwezi n’umwaka.

Mu bavoka bahagaritswe by’agateganyo ku mirimo yo kunganira abantu mu nkiko harimo 20 bahagaritswe ukwezi, umwe wahagaritswe abiri, abavoka 12 bagarikwa amezi atatu n’abagera ku munani bahagarikwa amezi ane.

Hari kandi abavoka bagera kuri 30 bahagaritswe amezi atandatu, uwahagaritswe amezi umunani , batatu bahagarikwa amezi icyenda mu gihe 21 bahagaritswe umwaka bigendanye n’uburemere bw’amakosa y’umwuga bakoze.

Umuyobozi w’Urugaga rw’Abavoka mu Rwanda, RBA, Me Nkundabarashi Moïse, yabwiye Ijwi rya Amerika ko abo bavoka bahanwe n’urugaga hashingiwe ku makosa anyuranye y’umwuga bagiye bakora kuva uyu mwaka watangira.

Ati “Abavoka iyo bagize amakosa y’umwuga bakora banyuzwa muri Komisiyo ishinzwe Imyitwarire, hanyuma nayo igafata icyemezo ishingiye k’uwo yumvise ubwiregure bwe.”

Yakomeje ati “Binyuze muri Komisiyo Ishinzwe imyitwarire y’Abavoka hari abagezwayo hagasangwa nta makosa bakoze bigendanye n’ibisobanuro batanga imbere y’iyo komisiyo gusa uwagaragaweho ikosa arahanwa kandi akamenyeshwa n’ibyemezo.”

Me Nkundabarashi yakomeje agaragaza ko gutangaza urutonde rw’abahagaritswe bishingiye ku kuba basanzwe bakorana n’umuturage, bakanakorana n’inzego zirimo inkiko n’izindi zigomba kubimenyeshwa hashingiwe ku ngingo 170 y’amategeko ngengamikorere y’urugaga rw’abavoka.

Yasobanuye ko uburemere bw’igihano umwavoka uri mu ikosa ahabwa kigendana n’uburemere bw’ikosa ryakoze.

Ati “Akenshi igihano umuntu ahabwa kiba kijyanye n’uburemere bw’amakosa aba yakoze, igice kinini ni icyo abantu bananiwe kwishyura imisanzu y’urugaga. Iyo bageze imbere ya Komisiyo ntibabashe kubisobanura icyo gihe barahanwa.”

Me Nkundabarashi yagaragaje ko guhana abavoka kubera amakosa y’umwuga ari ibintu bisanzwe bikorwa buri mwaka bityo ko kuba hahanwe abagera kuri 96 nta gikuba cyacitse.

Ati “Ni ibintu bikorwa buri mwaka, abavoka bo mu gihugu bagera ku 1500 rero uwo mubare ntabwo wavuga ko abantu batabona ababunganira ugereranyije n’ababakeneye kandi nta cyuho kizabamo.”

Yasabye abanyamategeko by’umwihariko n’abanyamuryango b’Urugaga rw’Abavoka kurangwa n’imyitwarire iteganywa n’amategeko ngengamikorere y’Urugaga, bakitwarararika kandi bagakora ibyo basabwa.

Yasabye abantu bakorana n’abavoka nabo gukangukira kugirana na bo amasezerano kandi bakubahiriza ibyo baba basezeranye mu nyungu za bombi.

Amakosa y’umwuga akunze kugaragara mu bavoka bo mu Rwanda harimo kutubahiriza amasezerano hagati y’abavoka nabo bunganira no kutubahiriza inshingano zo kwishyura umusanzu.

Ubundi kugira ngo umwavoka ahanirwe amakosa ye n’Urugaga rw’Abavoka binyura mu nzira zinyuranye zirimo kugawa, kwihanangirizwa yakinangira agafatirwa ibihano.

Uwahanwe nawe iyo atisubiyeho ahubwo agahora amakosa y’umwuga kabone nubwo yaba yahanwe bishobora kumukuriramo kwirukanwa burundu mu kazi nk’igihano gikuru giteganywa n’itegeko ngengamikorere ry’urugaga rw’Abavoka.

Imiterere y’imisanzu y’Urugaga

Ubusanzwe mu rugaga rw’abavoka mu Rwanda, umusanzu wishyurwa ku mwaka uba ungana n’ibihumbi 750 Frw, abari kwimenyereza umwuga bishyura ibihumbi 700 Frw naho abavoka bakuru bakishyura ibihumbi 750 Frw.

Ni amafaranga yishyurwa mu byiciro bibiri aho nibura mu ntangiriro z’umwaka baba basabwa kwishyura ibihumbi 400 Frw, hanyuma byagera hagati mu mwaka ni ukuvuga ku wa 31 Gicurasi bakishyura ayasigaye.

Ni umusanzu ugizwe n’ibice bibiri kuko kimwe kigirwa n’amafaranga agera ku bihumbi 550 Frw agenerwa abavoka n’imiryango yabo atangwa nk’ubwishingizi bwo kwivuza mu gihe andi agenerwa amahugurwa yabo n’ibindi bigamije iterambere rusange.

Biteganyijwe ko iyi misanzu y’abavoka izagabanyuka biturutse ku ishoramari ritandukanye Urugaga rw’Abavoka rugenda rukora mu nzego zinyuranye, nk’ubu RBA yateganyije ko mu 2022 hazakoreshwa ingengo y’imari ingana na miliyari 1,5 Frw.

Ayo ni amafaranga yagombaga kuva mu misanzu itangwa n’abanyamuryango, amafaranga yishyurwa n’abimenyereza umwuga, azishyurwa n’abifuza kwinjira mu mwuga n’ibindi bitandukanye.

Guhana abavoka ni ibintu bisanzwe ku rugaga rwabo mu Rwanda RBA, kuko nko kuva mu 2019 kugera mu 2021 hirukanwe burundu abavoka bane mu kazi mu gihe 207 aribo bahawe ibihano muri rusange.

Uko imyaka igenda ishira ubona ko imyumvire n’imyitwarire yabo yagendaga igabanyuka ku buryo n’imibare y’abahanwaga yabaga iri hasi.

Nko mu 2019, abahanwe bari 109, mu 2020 hahanwa 79 naho kuva umwaka wa 2021 hamaze guhanwa 18 gusa kuri ubu hamaze guhanwa abagera kuri 96 mu gihe hasigaye ameze ane ngo umwaka urangire.

Kugeza ubu Urugaga rw’Abavoka rugizwe n’abavoka 1515 barimo 282 bimenyereza umwuga ndetse n’abandi 1233 bakuru.

Inama yarimo Umugaba Mukuru wa FARDC

INKURU ZA :
Tanga Igitekerezo
Ibitekerezo
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA