Col Kanyamuhanda Vianney uzwi nka Kazarama, wahoze ari umuvugizi wa M23 mu myaka yatambutse, muri za 2010, nyuma y’uko bivuzwe ko aherutse gupfira mu mirwano ihanganishije uyu mutwe na FARDC, yabinyomoje avuga ko atakiri no muri uyu mutwe kuko hashize imyaka 10 yarawuvuyemo.

Byavugwaga ko Col Kazarama yaguye mu mirwano ikomeye iherutse kubera Mweso, yanahitanye inzirakarengane z’abasivile benshi, ndetse n’abarwanyi benshi ba M23.

Uyu wahoze ari umurwanyi muri M23, yaje abinyomoza, avuga ko ikirenze ibyo atakiba no muri M23, kuko yitandukanyije na yo mu myaka ya 2012 na 2013, gusa ngo aracyashyigikiye uyu mutwe.

Ati ”numvise amakuru avuga ko Col Kazarama yaguye mu bitero byabereye i Karuba werekeza i Mushaki ndagira ngo nyomoze ayo makuru kuko ndi muzima nta bicurane ndwaye ndi mu bikorwa byanjye by’iterambere.”

Yavuze ko nyuma yo kuva muri uyu mutwe, ubu yibereye mu bikorwa bye byo kwiteza imbere, bidafite aho bihuriye n’imirwano.

Gusa yaboneyeho kwihanganisha imiryango iherutse kuburira ababo muri ibi bitero bikomeye biherutse guhuza FARDC na M23 mu gace ka Mweso no mu nkengero zako.