Ubuyobozi bwa Banki yitwa ‘Centenary bank’ ikorera muri Uganda bwatangaje ko nta muntu wapfiriye mu mpanuka y’ ikamyo ifite UBD 091C/UBD 669H yinjiye mu ishami ryayo riri ahitwa mu Bugiri ikahangiza.

Iyi mpanuka yabaye saa kumi za mu gitondo ejo ku wa mbere tariki 16 Nzeri 2019 ubwo umushoferi wari uyitwaye yatakazaga ubushobozi bwo kuyiha icyerekezo.

Ibikorwaremezo bya Centenary Bank byangiritse birimo icyumba abakiriya bategererezamo kwakira amafaranga, n’ ibiro by’ umuyobozi w’ ishami rya banki ‘Branch manager office’.

Mu butumwa , ubuyobozi bwa Centenary bank bwashyize ku rubuga rwa twitter bwavuze ko bwamenye inkuru ko ikamyo yagije ishami ryayo rya Bugiri, bwongeraho ko nta mukiriya wagiriye ikibazo muri iyi banki kuko yari ifunze.

Iyi banki yakomeje yisegura ku bakiriya bayo kuko imirimo yakorerwaga kuri iryo shami yahagaze by’ agateganyo, isaba abakiriya bayo gukoresha ubundi burimo serivise ya mobile money, kugana abakozi bayihagarariye mu makaritsiye, no gukoresha imashini ibikuza amafaranga ATM. 

Polisi yazengurukije imigozi aho iyi kamyo yari yikoreye sima iyivanye mu karere ka Tororo yakoreye impanuka, bivuze ko nta muntu wemerewe kuhinjira uretse abapolisi bari mu iperereza n’ abayobozi ba Centenary Bank babiherewe uburenganzira

Umushoferi w’ iyi kamyo yatawe muri yombi azira gutwara ku muvuduko mwinshi no gutwrara yasinze.