Urwego rushinzwe mu gihugu cya Kenya rwataye muri yombi umugabo witwa Kitonyo wo mujyi wa Mwingi mu burasirazuba ashinjwa gutangaza amakuru y’impuha kuri coronavirus.

Perezida Uhuru Kenyatta wa Kenya yari aherutse kuburira Abanyakenya kwirinda gutangaza amakuru atari ukuri kuri Covid-19.

Uyu mugabo yafashwe kuri iki cyumewru tariki 15 Werurwe 2020, nijoro n’abakozi b’ibiro bishinzwe iperereza ku byaha muri Kenya.

Arashinjwa gutangaza amakuru akoresheje ’account’ itari nyayo (fake account) avuga ko leta yabeshye abaturage ku makuru y’umuntu wa mbere basanzemo iyi ndwara muri Kenya.

Ibyo yanditse byarakwirakwijwe henshi mu gihugu ku mbuga nkoranyambaga mu mpera z’icyumweru gishize.

We yavugaga ko umurwayi bayisanzemo yari avuye i Roma mu Butaliyani aho kuba muri USA nk’uko abategetsi babivuze.

Ubu arashinjwa gutangaza amakuru y’impuha agaca igikuba muri rubanda, araregwa hagendewe ku itegeko rihana ibyaha byifashishije mudasobwa ryo mu 2018.

Mu iyaduka n’ikwirakwira ry’iyi ndwara, abahanga mu buvuzi bavuga ko amakuru y’ibihuha ku buryo yandura, uko yirindwa, abayanduye n’ibindi ari bimwe mu bica igikuba mu baturage.