Nyampinga w’Ubwongereza wa 2019, Bhasha Mukherjee yagarutse mu mwuga w’ubuganga yari asanzwe akora mbere y’uko aba nyampinga, akaba yahisemo kuwugarukamo mu rwego rwo gutanga umusanzu we mu guhangana n’icyorezo cya Coronavirus.

Nyuma yo gufata ikiruhuko ubwo yari amaze kwegukana ikamba rya Nyampinga w’Ubwongereza 2019 mu kwezi k’Ukuboza 2019, Bhasha, Mukherjee yahise ahamagarirwa kuba Ambasaderi w’imiryango itandukanye y’Abagiraneza aho yari asanzwe akora ibikorwa by’ubutabazi mu bihugu bitandukanye byari biteganyijwe ko azabisoza muri Kanama uyu mwaka ariko nyuma yo kubona uburyo abantu bakomeje guhitanwa n’icyorezo cya Covid-19 mu Bwongereza yahise asaba ko yagaruka mu kazi ke k’ubuganga ikamba akaba arishyize hasi.

Nk’uko yabitangarije CNN, Miss Bhasha yateganyaga kuzenguruka ibihugu bitandukanye byo muri Aziya na Afurika akora ibikorwa by’urukundo.

Ati ”Natumiwe muri Afurika, muri Turukiya, mu Buhinde, Pakisitani no mu bindi bihugu byinshi byo muri Aziya kugirango mbe Ambasaderi mu bikorwa bitandukanye by’urukundo.”

Kuva muri Gashyantare uyu mwaka Miss Bhasha yatangiye ibi bikorwa mu Buhinde aho yari ahagarariye umuryango Coventry Mercia Lions Club bakaba barasuye amashuri atandukanye bakanatanga imfashanyo z’amafaranga mu ngo zirimo abakobwa bataye amashuri.

Nyuma yo kubona ko icyorezo gikomeje gufata indi ntera ku isi no mu Bwongereza yahise afata umwanzuro wo kuba ahagaritse ibyo arimo akajya gutanga umusanzu we mu guhashya iki cyorezo akaba yasubiye mu kazi k’ubugangakuri uyu wa Gatatu nyuma yo gusaba ubuyobozi bukamufasha kubona indege iva mu Buhinde yari ari yerekeza i Frankfurt agakomeza i Londres mu Bwongereza aho agiye gusubukurira umwuga we.

Ubwongereza butangaza ko iki cyorezo kimaze kwandura abasaga 48000 naho abasaga 5000 bamaze guhitanwa nacyo.

Mbere y’uko Bhasha Mukherjee yegukana ikamba rya Nyampinga w’Ubwongereza 2019 yari umuganga mu bitaro bya Boston akaba yarakoraga mu kuvura indwara zo mu buhumekero.

Kimwe n’abandi bose binjira mu gihugu bavuye hanze yahise yishyira mu kato k’ibyumweru bibiri akazakavamo akomereza mu mwuga we gufatanya n’abandi baganga bakomeje gukora amanywa n’ijoro mu kuvura abarwayi ba Covid-19.