Ibihumbi by’ abagororwa bafungiye muri Gereza ya Huye barimo abigeze gufunganwa na Igisupusupu bagaragarije Urwego rw’ Igihugu rushinzwe imfungwa n’ abagororwa RCS ko banyotewe no gususurutswa na Nsengiyumva Francois(Igisupusupu), RCS ibasezeranya ko izategura igitaramo igatumira uyu muhanzi akabataramira.

Hari mu muhango wo gutanga impamyabumenyi ku bagororwa barenga 250 bigiye muri iyi gereza amasomo y’ ubwubatsi. Aba bagororwa nibo bubaka amazu yo muri iyi gereza inyungu ivuyemo bagahabwaho 10%.

Iyo winjiye muri Gereza usanga abagororwa bafite akanyumeza. Muri Gereza ya Huye harimo abagorwa usanga bari mu mirimo y’ ubwubatsi, abandi bari kubaza ibikoresho bitandukanye, abandi bagiye mirimo y’ ubuhinzi.

Uretse iyi mirimo kandi abagororwa bagira umwanya wo kwidagadura dore ko banifitemo orchestre yitwa ‘umusare’ ibacuragira bakidagadura.

Commissioner Bosco Kabanda, ushinzwe imibereho myiza y’ abagororwa no kubagorora yavuze ko uretse iyi orchestre umusare bajya batumira abahanzi bakajya gutaramira abagororwa ndetse abemerera ko ubutaha bazabatumirira Nsengiyumva Francois ugezweho muri iyi minsi.

Itsinda ry’ abahanzi barimo Mavenge Sudi niryo riherutse gutaramira muri Gereza ya Huye ifungiyemo abagororwa 11 703.

Commissioner Kabanda Bosco yemereye abafungiye muri Gereza ya Huye ko azabanira Igisupusupu kikabataramira

Commissioner Kabanda Bosco yabwiye aba bagororwa ati “Mavenge Sudi we ndamuzi, mbanabigizemo uruhare kugira ngo baze, rero bariya bantu bazajya baza na kenshi, ubutaha turashaka kuzabatumirira wa musaza witwa nde ? …wawundi mushyashya ugezweho yitwa nde ? (abagororwa bahise bakoma amashyi bati Igisupusupu)”

Uyu muyobozi yavuze ko Igisupusupu urwego agezeho kumubona bigoye gusa yizeza abagororwa ko we kumubona bitamunanira.

Ati “Ntababeshye uriya musaza urwego agezeho kumubona biragoye cyokora njyewe kubera ko ndi commissioner kumubona birashoboka ariko ubundi ntabwo byoroshye”

Iyi ni orchestre UMUSARE yo muri gereza ya Huye, izi gucuranga cyane

Yakomeje agira ati “Kandi buriya no uriya musaza biriya ngo yabyigiye ahantuuuu, nibande bari kumwe nawe ?( umwe mu bagize orchestre umusare nari mpari)”

Commissioner Kabanda yavuze ko Nsengiyumva Francois igisupusu gucuranga yabyigiye muri gereza ariko ko urwego agezeho uyu munsi afite abamucungira umutekano.

Uyu muyobozi yavuze ko muri iyi minsi kubona Igisupusupu ngo kigucurangire bigoye kuko abakeneye ko abacurangira ari benshi ati “Twe kumubona birashoboka kuko turi abagabo”.

Manager wa Igisupusupu yigeze kubwira UKWEZI ko kugira ngo Nsengiyumva Francois age gucuranga mu gitaramo uwagiteguye asabwa kwishyura amafaranga y’ u Rwanda ibihumbi 500.

Nsengiyumva Francois yabwiye UKWEZI ko ari tayari kujya gucurangira abagororwa, gusa icyo kuba gucuranga yarabyigiye muri gereza yanze kugira icyo abivugaho ahita akupa telefone.

Abafungiye muri Gereza ya Huye banyotewe no gucurangirwa na Igisupusupu