Minisiteri y’Ubuzima mu gihugu cya Uganda yatangaje ko muri iki gihugu habonetse umurwayi wa mbere wa Coronavirus mu gihe iki gihugu kiri cyari muri bike byo karere u Rwanda ruherereyemo byari bisigaye bitarimo icyorezo cya Covid-19.

Itangazo Minisiteri y’Ubuzima muri Uganda ishyize kuri Twitter muri iri joro rivugako uwasanzwemo iyi ndwara ari umugabo w’imyaka 36 w’umugande wageze muri Uganda uyu munsi avuye i Dubai akazanwa n’indege ya Kompanyi ya Etiyopiya (Ethiopian Airlines).

Minisiteri y’Ubuzima yatangaje ko umurwayi yatangaje abo yahuye nabo bose ndetse hakaba hari no gushakishwa ababa bazanye nawe mu ndege ngo nabo basuzumwe.
Iyi Minisiteri itangaje umurwayi wa mbere wa Coronavirus muri Uganda nyuma y’amasaha make Perezida wa Uganda, Yoweri K. Museveni atangaje ingamba zayo zo gukumira no kwirinda iki cyorezo harimo guhagarika indege zose zitwara abagenzi ziza n’iziva ku butaka bw’iki gihugu guhera ejo tariki 22 Werurwe 2020.

Perezida Museveni kandi yari yategetse ko nta muntu wemerewe kuva aho aherereye muri iki gihugu ngo ajye mu kandi gace ko abantu bose bagomba kuguma aho bari birinda ingendo.

Ibinyabiziga nk moto, imodoka n’ibindi byose bikoresha inzira y’ubutaka n’iy’amazi nabyo byabujijwe kwinjira muri Uganda guhera saa sita z’ijoro ryo kuwa Gatandatu rishyira ku Cyumweru tariki 20 Werurwe 2020.