AMAKURU

UKWEZI
RPF

Ntushobora kugira ubuzima bwiza utivuje, kandi ntiwakwivuza udafite mituweri- Min. Mukabaramba

Ntushobora kugira ubuzima bwiza utivuje, kandi ntiwakwivuza udafite mituweri- Min. Mukabaramba
7-06-2018 saa 10:11' | By Akayezu Jean de Dieu | Yasomwe n'abantu 1002 | Ibitekerezo 2

Umunyamabanga wa Leta muri Minisiteri y’Ubutegetsi bw’Igihugu ushinzwe imibereho myiza y’abaturage, Mukabaramba Alvera, wari mu karere ka Kayonza kuri uyu wa Gatatu tariki 6 Kamena 2018, yavuze ko kuri ubu Leta y’u Rwanda ihangayikishijwe bikomeye n’ikibazo cy’uko buri muturage yagakwiye kumenya akamaro ko kugira ubwisungane mu kwivuza ari nayo mpamvu hashyizwe imbaraga mu buryo bushya bwo kwishyura mituweri hakoreshejwe ikoranabuhanga.

Ni mu bukangurambaga buri gukorwa na Minisiteri y’Ubutegetsi bw’Igihugu (Minaloc), ibinyujije mu Muryango Nyarwanda utegamiye kuri Leta ugizwe n’abahanzi ndetse n’abanyamakuru bagamije iterambere ry’imibereho myiza y’abaturage (Arts and Media for Change), mu rwego rwo gukangurira abaturage ubu buryo bushya bwo gukoresha ikoranabuhanga bishyura mituweri.

Mudenge Jean Baptiste wo mu mudugudu wa Bitoma, akagari ka Cyinzove, mu murenge wa Kabarondo muri aka karere ka Kayonza avuga ko akimenya ko kwishyura mituweri byahindutse ari ugukoresha ikoranabuhanga aho yifashishije telephone agakanda umubare (*909#) akurikiza amabwiriza agera aho bamweraka ngo akande umubare rimwe agomba kwishyura bamubwira ko arishyura ibihumbi cumi na bitanu kuko yishyuriraga abantu batanu.

Yakomeje avuga ko muri ako kanya bahise bamwoherereza ubutumwa bugufi bumubwira ko amaze kwishyura mituweri ndetse yemerewe kwivuza. Ibi ngo yabikoze yicaye mu rugo kandi ntan’iminota ibiri byamutwaye bitandukanye n’uko mbere yagombaga gukora ingendo ajya kuri za Sacco, akahava ajya kuri RSSB, nabwo kandi ngo yamara kwishyura agategereza ukwezi kose kugira ngo yemererwe kwivuza. Mudenge Jean Baptiste, avuga ko yishyuye mituweri yibereye iwe mu rugo kandi akabikora mu minota itageze kuri ibiri, akoresheje telefone

Murenzi Jean Claude, Umuyobozi w’akarere ka Kayonza yavuze ko mu mwaka ushize muri aka karere hari hakozwe ubukangurambaga abaturage babasha kugera ku kigero cya 82%, ariko ngo kuba kuri ubu hari ubu buryo bwo kwihyura hakoreshejwe telephone n’Irembo bizeye ko bazagera ku 100%, ahanini babishingiye ku buryo babona abaturage batangiye kubyitabira.

Yagize ati “Uyu munsi nk’uko mwabibonye nyakubahwa MOS Minaloc yaje kudufasha mu gikorwa cyo gutangiza ubu buryo bwiza bwo gutanga ubwisungane mu kwivuza dukoresheje irembo, dukoresheje Sacco, dukoresheje za MobiCash, mukaba mwabibonye uko byagenze abaturage barimo barabyitabira tukaba twizera ko nk’uko umwaka ushize twagize 82%, ubu tukaba twizeye ko tuzagera ku 100%, icyo tuzakora natwe ni ubukangurambaga”

Minisitiri Mukabaramba yavuze ko kuri ubu u Leta y’u Rwanda ihangayikishijwe n’ikibazo cy’ubwisungane mu kwivuza, ari nayo mpamvu bashatse gushyiraho ubu buryo bwo korohereza umuturage akaba yabasha kwishyura ubwisungane mu kwivuza bitamugoye.

Yanavuze kandi ko nka leta bafashe umwanzuro wo gushyira imbara mu bukangurambaga bwo gukangurira abaturage kwishyura mituweri hakoreshejwe ikoranabuhanga ririmo gukoresha telephone igendanwa cyangwa ku nyura ku Irembo, anashimangira ko kugira ngo umuturage agire ubuzima bwiza ahanini bishingira ku kuba afite ubwishingizi buzamugoboka igihe yarwaye.

Yagize ati “Ubu ngubu duhangayikishijwe n’ikibazo cya mituweri ni nacyo kinini cyari cyatuzanye hano, ariko ibyo bibazo byose by’imibereho myiza y’abaturage, kugira ngo umuntu abeho neza muby’ukuri agomba kuba afite ubuzima bwiza, ntabwo ushobora kugira ubuzima bwiza utivuje mu gihe warwaye, ntabwo ushobora kwivuza nta mituweri ufite cyangwa nta bundi bwishingizi”

Minisitiri Mukabaramba avuga kandi ko ubu buryo bwo kwishyura ubwisungane mu kwivuza hakoreshejwe ikoranabuhanga bwihuta kandi bworoheye buri muturage ari nayo mpamvu biteze umusaruro kandi babona byoroshye kuzagera ku kigero cy’ijana ku ijana mu gutanga ubwisungane mu kwivuza hano mu Rwanda. Umuyobozi w’akarere ka Kayonza, Murenzi Jean Claude, ngo uyu mwaka bashaka kugira 100% mu gutanga mituweri
Minisitriri Mukabaramba yeretswe uburyo abaturage bishyura mituweri hakoreshejwe ikoranabuhanga


INKURU ZA :
Tanga Igitekerezo
Ibitekerezo 2
Nzabandora Kuya 22-06-2018

Ubundi she mutuel iracyamaze iki ko abajya kubyara batemererwa kuyikoresha? Niba RSSB yarahawe gucunga mutuel nireke abayikoresha bahabwe services zose nk’uko abakoresha RAMA bazihabwa kandi bashyirireho na pharmacy zo kubafasha igihe batabonye imiti kwa muganga

777/999 R/E Kuya 8-06-2018

Ba Nyakubahwa bayobozi, bashinzwe ibya mutuelle mukore uko mushoboye muhindure icyo bita gutekinika ngo mutuelle abaturage bagiye kuzitanga 100% kuko bari kuzishyura hifashishijwe ikoranabuhanga.
Dore uko gutekinika nguku;
a. Gushyira imiryango y’abantu mubyiciro bitabakwiye kuburyo usanga ntanamahuriro bifitanye.
Urugero: Aho usanga umuryango udatunze isambu/inzu/nta n’igare ukawusanga mu cyiciro cya kane(4) kandi barakoze ibishoboka byose ngo gihinduke bikanga, bagahebera urwaje nta mutuelle bateze!
b. Hari n’abandi bashyizwe cya 1 cg 2 bo batunze ibya Mirenge, bagahitamo kuryumaho ahubwo bateza induru ngo abana babo ntibari gufashwa kwishyurirwa amashuri n’ibindi!
Urumvako iyo utekinitse ngo mutuelle abaturage bazitanze 100% biba ari ikinyoma, arino gusubiza igihugu inyuma mu iterambere. Mukanya ukumva ngo kwa muganga hahindutse prison ngo abarwayi babuze ubwishyu!
Sinasoza ntabajije ababishinzwe;
Imiti iborera mububiko kandi kwa muganga abarwayi bayibura, ingamba zo gukemura icyo kibazo zigeze he?

English
IGURIRE
Reba Ibindi Byinshi
netlink
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...