konka coffee
KONKA

AMAKURU

UKWEZI

Intumwa za MINEDUC zababajwe n’uko abanyeshuri babwirirwa bakigana n’abagaburiwe ku ishuri

Intumwa za MINEDUC zababajwe n’uko abanyeshuri babwirirwa bakigana n’abagaburiwe ku ishuri
3-05-2018 saa 05:59' | By Chief Editor | Yasomwe n'abantu 3335 | Ibitekerezo 1

Abagize itsinda ry’intumwa za Minisiteri y’uburezi mu karere ka Muhanga mu ntara y’Amajyepfo, bababajwe cyane no kumva ko hari ibigo usangamo umubare munini w’abanyeshuri biga muri gahunda y’uburezi bw’imyaka 9 cyangwa 12, biga nyuma ya saa sita batafashe ifunguro rya kumanywa kandi bakigana na bagenzi babo baba bagaburiwe ku ishuri.

Guhera kuri uyu wa Gatatu tariki 2 Gicurasi 2018, mu turere twose tw’u Rwanda hatangiye ubukangurambaga ku ireme ry’uburezi mu mashuri, buzarangira tariki 15 Gicurasi 2018. Itsinda ririmo gukora ubukangurambaga mu karere ka Muhanga, batangajwe kandi bababazwa n’uko kimwe mu bibazo bigaragara nk’ibidindiza ireme ry’uburezi, harimo kuba abana benshi biga amasomo y’igicamunsi batariye. Iki kibazo kandi kibangamiye cyane abarimu n’abanyeshuri by’umwihariko.

Ikigo cya Groupe Scolaire Gitarama giherereye mu mujyi wa Muhanga, gifite uburezi bw’ibanze bw’imyaka 12. Abana biga mu mashuri yisumbuye ni 1084, nyamara Mukanyandwi Fausta ukiyobora avuga ko abana babasha kugaburirwa ku ishuri kumanywa basaga 400. Ikindi gice kinini cy’abanyeshuri batagaburirwa, kigizwe n’abiga nyuma ya saa sita batigeze barya, hakabamo n’abandi bacye bajya kurya iwabo abandi bagapfunyika.

Itsinda ry’intumwa za MINEDUC mu karere ka Muhanga, aha ni mu kigo cya G.S Gitarama

Mukanyandwi Fausta avuga ko abagaburirwa ku ishuri ari abishyura amafaranga y’u Rwanda 5000 ku kwezi, hamwe na bacye bafite icyemezo cy’uko bari mu cyiciro cya mbere cy’ubudehe. Avuga ko ku bufatanye na komite z’ababyeyi, ntako batagize ngo bakangurire ababyeyi kwishyurira abana babo ariko ngo byarananiranye.

Mukanyandwi Fausta ati: "Utabonye ayo mafaranga tumusaba ko yazana ibiribwa bidatetse ku kigo tukabiheraho tugaburira abana, ariko ababyeyi baratubwira ngo uwabona ibishyimbo cyangwa ibijumba azana ubwo yabona n’amafaranga. Tunabemerera kwishyura ayo mafaranga mu byiciro byinshi bishoboka ariko ababyeyi bakatugaragariza ko batishoboye. Hari uvuga ko afite abana batanu, kandi ko mu rugo iyo abashije kubona ikiro cy’ubugari bagisaranganya, ko atabona ibyo atangira buri wese ku ishuri."

Mukanyandwi Fausta, umuyobozi w’urwunge rw’amashuri rwa Gitarama

Uyu muyobozi avuga ko gahunda ya "Nkunganire" Leta itangamo amafaranga yo gufatanya n’ababyeyi kugaburira abana, igena amafaranga 56 ku munsi kuri buri mwana. Iyo aya mafaranga yatanzwe na Leta, ngo muri iki kigo abanyeshuri boss bagaburirwa ku ishuri ku manywa mu gihe cy’iminsi 12, yashira abataratanze amafaranga bakongera bakajya babwirirwa.

Abagize intumwa za MINEDUC bafatanyije na Polisi n’abashinzwe uburezi mu karere no mu mirenge

Iki kigo cya G.S Gitarama, nicyo kigo cyonyine gifite uburezi bw’ibanze bw’imyaka 12 mu murenge wa Nyamabuye giherereyemo. Ibi bituma abanyeshuri benshi bakora urugendo rurerure bajya ku ishuri, kuburyo bitabakundira kujya kurya iwabo kumanywa ngo basubire ku ishuri, bagahitamo kwiga amasomo y’igicamunsi bayura.

Umwe mu banyeshuri twaganiriye yagaragaje agahinda ke agira ati: "Mu ishuri tuba tuziranye, abatarya turiyizi n’abarya tuba tubazi, wanasinzira mu ishuri abandi barimo kwiga bagenzi bawe bakakuvuganira mwarimu nawe akakumva akihangana. Hari n’ubwo amasomo ya nyuma ya saa sita yose arangira nta kintu numva kubera inzara, na mbere ya saa sita usanga dutangira kubitekerezaho ukibaza uti noneho inzara ndayikizwa n’iki uyu munsi? Gusa ntibakabeshye ngo ni imyumvire y’ababyeyi bacu, turi bakuru natwe ntitwakwemera ko batwicisha inzara tubona bafite ubushobozi, tuba tubona ko batishoboye."

Abarezi nabo bivugira ko babangamirwa cyane no kwigisha abana bazi ko abenshi muri bo babwiriwe

Iki kibazo kandi cyanagaragaye mu kigo cya G.S Kivumu nacyo giherereye mu karere ka Muhanga, gusa ho imibare yagaragajwe n’ubuyobozi yerekana ko ababwirirwa bakajya mu ishuri batabonye ifunguro ari bo bacye, ariko itsinda rya MINEDUC ryagaragaje ko n’abo bacye bahangayikishije.

Uwari uhagarariye Polisi mu karere ka Muhanga muri ubu bukangurambaga, yagaragaje ko kuba umwana yiga yabwiriwe bishobora kuba intandaro yo kuba abakobwa bashukwa bagaterwa inda zitateguwe, kuba hari abakwiheba bakishora mu biyobyabwenge n’ibindi bigira uruhare mu kudindiza ireme ry’uburezi, cyane ko nko muri G.S Gitarama ibi byagiye bihagaragara mu minsi yashize.

Uwari uhagarariye Polisi muri iki gikorwa yanenze kuba abana bamwe biga batariye. Aha yari kumwe n’ushinzwe uburezi mu karere ka Muhanga

Abagize iri tsinda rya MINEDUC muri rusange bagaragaje ko bababajwe no kumva ko abana benshi biga amasomo y’igicamunsi batariye ndetse basaba ko ku bufatanye n’ababyeyi hamwe n’izindi nzego hashakwa umuti w’iki kibazo mu buryo bwihuse.


INKURU ZA :
Tanga Igitekerezo
Ibitekerezo 1
Kimonyo Kuya 6-05-2018

MINEDIC izasure, APPEG A Gahengeri ikigo giherereye mu karere ka Rwamagana, aho uwahoze ari Directeur wayo yanyereje arenga 400000, ubu ababyeyi tukaba aritwe turimo kuyishyura 5000 kuri buri mwana, byemerejwe munama yababyeyi kukagambane kabayobozi bababyeyi cyane ko nabo baba ari abayobozi bibigo ahandi presedent wacu aracyafite byinshi byo gukora.

English
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...