AMAKURU

UKWEZI
pax

Mudufashe ntitugere aho dushyira umupolisi n’umuyobozi kuri buri rugo -Minisitiri Shyaka

Mudufashe ntitugere aho dushyira umupolisi n’umuyobozi kuri buri rugo -Minisitiri Shyaka
25-05-2020 saa 07:03' | By Akayezu Jean de Dieu | Yasomwe n'abantu 8335 | Ibitekerezo 1

Minisitiri w’Ubutegetsi bw’Igihugu mu Rwanda, Prof Shyaka Anastase yatangaje ko hari bamwe mu banyarwanda bamaze kudohoka cyangwa kugabanya imbaraga zo kwirinda icyorezo cya COVID19 giterwa na Coronavirus.

Iki cyorezo gihangayikishije Isi cyatangiriye mu Mujyi wa Wuhan mu Bushinwa mu mpera z’Umwaka wa 2019.

Imibare iheruka y’Ishami ry’Umuryango w’Abibumbye ryita ku Buzima, OMS/WHO igaragaza ko abamaze kwandura iki cyorezo ku Isi ari 5,500,696, abo kimaze guhitana baragera ku 346,727 mu gihe abamaze gukira ari 2,302,098.

Imibare yo ku Cyumweru tariki 24 Gicurasi 2020, igaragaza ko mu Rwanda abantu 327 aribo bamaze kwandura Coronavirus mu gihe abamaze gukira bose ari 237, ku rundi ruhande ariko iki cyorezo ntawe kirahitana.

Minisitiri Shyaka avuga ko nubwo hari ingamba nshya zashyizweho ku wa 18 Mata 2020, zo kurwanya no gukumira iki cyorezo hari abantu bagaragaje kudohoka n’intege nke mu bijyanye no kubahiriza izi ngamba.

Yagize ati “Turagenda tubona ahari intege nke n’abagaragaza kudohoka kubera ko hirya no hino no mu Mujyi wa Kigali hari aho tugenda tubona intege nke cyane n’abarenga ku mabwiriza kandi icyadukijije, icyaturinze ni uko twese twagize ukwitwararika,tukajya mu cyerekezo kimwe.”

“Ubu rero biragaragara ko harimo icyuho mu ishyirwa mu bikorwa, turagira ngo dusabe abanyarwanda kutadohoka, gukomeza umurego kuko biragaragara ko hirya no hino mu byiciro nka bitatu hari aho ubona intege nke.”

Ibi byiciro yavuze bigaragaramo intege nke harimo kuba resitora zaradohorewe abantu bakaba bemerewe kujya gufungura bagashyira intera hagati yabo ariko utubari two ntabwo twemerewe gufungura ariko ngo hirya no hino hari aho usanga utubari turi gukora harimo n’abitwaza za hoteli.

Ati “Icyo ni ikintu kibi cyane, gishobora kuduteza ibibazo. Turasaba ko ibintu by’akabari bihagarara, turasaba ko ibintu byo guhurira mu masoko abantu bakegerana cyane bakitsiritana bihagarara, turasaba ko agapfukamunwa kaba ihame abantu bakazirikane, ikindi abantu bamenye ko iki cyorezo kiracyahari.” Minisitiri w’Ubutegetsi bwIgihugu Prof. Shyaka Anastase, yasabye ubufatanye bwa buri wese mu kubahiriza amabwiriza yo kurwanya COVID19

Minisitiri Shyaka wari mu kiganiro kuri RBA yavuze ko hari amakuru atangwa n’inzego zitandukanye by’umwihariko iz’ibanze avuga ko hari abantu bakomeje kurenga ku mabwiriza bakajya mu bikorwa byo gusurana bya hato na hato kuko bitemewe.

Yagize ati “Inzego zibishinzwe zikomeza gukangurira abaturage, amarondo arakorwa ariko ntibisimbura umutimanama w’umuntu. Turagira ngo dusabe twe kugira aho tuza gushyira umuyobozi n’umupolisi kuri buri rugo kugira ngo abuze abantu kwinjira.”

“Ibintu byo gusurana nabyo bibe bihagaze kubera ko kwirinda kugira ngo dutsinde iki cyorezo birasaba imbaraga za buri munyarwanda. Ibintu byo gusurana mu ngo, ibyo gukora iminsi mikuru hari n’ababigenderamo bakabyuririraho bikaba umunsi mukuru ugasanga bibaye nk’igisa n’akabari.”

Yakomeje asaba abaturage kwihangana aho kugira ngo hitabazwe inzego za leta by’umwihariko izicunga umutekano kuko kunyuranya n’amabwiriza ni ukototera umutekano w’igihugu ugamije kuwuhungabanya.

Minisiteri y’Ubutegetsi bw’Igihugu isaba inzego z’ibanze kongera imbaraga mu kugira ngo bafatanye banafashe abaturage kujya mu murongo ukwiriye.


INKURU ZA :
Tanga Igitekerezo
Ibitekerezo 1
daniel Kuya 1er-06-2020

MUBAFASHE Peeee !

English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...