AMAKURU

UKWEZI
RPF

Mu Rwanda hagiye kubakwa ikigo gikomeye kivura indwara z’umutima

Mu Rwanda hagiye kubakwa ikigo gikomeye kivura indwara z’umutima
3-06-2018 saa 12:39' | By Vincent Nsengiyumva | Yasomwe n'abantu 1275 | Ibitekerezo

Leta y’u Rwanda ifatanyije n’umuganga rurangiranwa w’Umwongereza mu kuvura indwara z’umutima, Prof. Sir Magdi Habib Yacoub, bagiye kubaka ikigo kivura izi ndwara mu bitaro bya Gisirikare by’ u Rwanda i Kanombe.

Kuri uyu wa Gatandatu tariki 2 Kamena 2018, nibwo Prof. Sir Magdi Habib Yacoub n’itsinda bazanye mu Rwanda batemberejwe ahazubakwa ikigo kivura indwara z’umutima mu bitaro bya Gisirikare i Kanombe maze barahashima.

Nyuma yo gusura ahazubakwa iki kigo, Prof. Sir Magdi Habib Yacoub yagiranye ikiganiro na Minisitiri w’Ubuzima, Dr Diane Gashumba, Umuyobozi w’ Ikigo cy’ Igihugu cyita ku buzima Dr Jeanine Condo, abaganga banyuranye bavura indwara z’umutima mu Rwanda, maze impande zombi zishimangira ko u Rwanda by’umwihariko Minisiteri y’Ubuzima izungukira byinshi kuri ubu bufatanye.


Prof. Sir Magdi Habib Yacoub yabanje gutemberezwa ahazubakwa ikigo kivurirwamo indwara z’umutima

Prof. Sir Magdi Habib Yacoub yavuze ko yishimiye kugirana ubufatanye na leta y’u Rwanda by’umwihariko muri uyu mushinga wo kubaka ikigo kizajya kivura abarwaye umutima dore ko ari inzobere muri ubu buvuzi.

Yagize ati “ Ni iby’igiciro kinini kuri njye kuba ndi hano tuganira ku bufatanye mu kuvura no kwita ku barwaye indwara z’umutima. Ubu bufatanye buzagirira akamaro kanini by’umwihariko abafite uburwayi bw’umutima. Twabonye ubutaka bwo kuzubakiaho iki kigo, kdi uyu mushinga urashyirwa mu bikorwa mu gihe cya vuba rwose. Usibye kuzajya tuvura abarwayi, iki kigo kizafasha gukora ubushakashatsi kuri iyi ndwara ndetse no gutanga amahugurwa ku baganga bayivura.”

Dr Ntaganda Evariste, umuyobozi w’Ishami ry’indwara zitandura muri RBC, yavuze ko mu bushakashatsi bumaze gukorwa, bwagaragaje ko abasaga ibihumbi 38 mu Rwanda barwaye indwara z’umutima.

Yakomeje avuga ko mu ndwara zitandura, iz’umutima arizo zihangayikishije cyane kandi akaba ari nazo nyinshi ndetse zikaba zinagoranye ugereranyije n’izindi.

Yavuze ko indwara z’umutima usanga ahanini abazirwara bakenera serivisi zo kubagwa, ariko ugasanga mu gihugu nta bushobozi buhari bwo kubaga abarwaye iyi ndwara, ashimangira ko iki kigo nikimara kugera mu Rwanda kizakemura byinshi birimo kuramira ubuzima bw’abanyarwanda ndetse n’ibindi birimo n’amafaranga agenda ku bo u Rwanda rubasha koherezwa kujya kubagirwa hanze.

Yagize ati “Hari indwara zigera ku bitaro bikuru, bagasanga nta kindi cyakorwa uretse kubagwa kandi iyo serivisi idahari. Iki kigo nikiza bizaba bibaye igisubizo.”

Bamwe mu baganga bavura indwara z’umutima bitabiriye iki gikorwa, bagaragaje ko ari iby’igiciro kinini kuba iki kigo kigiye kubakwa mu Rwanda, bagaragaza ko bigiye kuborohereza mu kazi kabo, cyane ko nabo bibaremerera cyane iyo basuzumye umurwayi maze bakamusangamo uburwayi badafitiye ubushobozi bwo kuvura.

Bamwe mu baganga bavura indwara z’umutima bagaragaje ko uyu mushinga nushyirwa mu bikorwa uzagirira inyungu abanyarwanda muri rusange

Minisitiri w’ Ubuzima Dr Diane Gashumba yavuze ko ubu bufatanye bw’u Rwanda na Prof. Sir Yacoub bwo kubaka ikigo kivura indwara z’umutima bizagirira inyungu igihugu cy’u Rwanda.

Yagize ati “U Rwanda rubifitemo inyungu nini cyane kuko nitugira abaganga benshi babasha kuvura izo ndwara bizafasha abaturage batabashaga kugera ku buvuzi navuga buhambaye, tuzagabanya imfu ziterwa n’indwara z’umutima, ariko na none tuzagabanya ingengo y’imari yagendaga hanze ijya kubavuza.”

Yavuze ko iki kigo nikimara gutangira gukora kitazajya kivurirwamo gusa ko ahubwo kizanafasha gukorerwamo ubushakashatsi ndetse no kwigisha abaganga kuvura indwara z’umutima.

Minisitiri Gashumba yaboneyeho gusaba Abanyarwanda kwirinda indwara z’umutima bakora siporo, bareka kunywa itabi n’inzoga nyinshi n’ibiryo birimo amavuta menshi kuko ahanini ari byo ntandaro y’indwara z’umutima.

Uretse ubufatanye bwo kubaka iki kigo, Prof. Sir Magdi Habib Yacoub yemereye Leta y’u Rwanda ko azafata abaganga 6 bakajya kwiga mu bigo afite mu bihugu bitandukanye nko mu Bwongereza, Egypt n’ahandi mu gihe kitarenze amezi abiri maze akabohereza kwiga kuvura indwara z’umutima.

Yanemereye ubufasha u Rwanda bwo gutangira kuvurira abanyarwanda barwaye iyi ndwara mu bigo bye bitandukanye, mu gihe iki kigo kigiye kubakwa mu Rwanda kizaba kitaruzura.

Mu Rwanda hari abaganga 9 gusa bazobereye mu byo kuvura indwara z’umutima, batatu muri bo bakaba baramaze guhabwa ikiruhuko cy’izabukuru n’ubwo bajya bifashishwa kubera ikibazo cy’ubuke bwabo kandi abarwaye iyi ndwara baba bakeneye ubufasha aba ari benshi cyane.

Biteganyijwe ko iki kigo kizaba gitangiye kubakwa umwaka utaha hatagize igihinduka.

Prof. Sir Magdi Habib Yacoub yavuze ko kubaka iki kigo bizatangira umwaka utaha

Banasuye ahubatswe ikigo kizajya kivurirwamo abarwayi ba Kanseri kiri mu bitaro bya Gisirikare i Kanombe


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
netlink
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...