konka coffee
KONKA

AMAKURU

UKWEZI

Minisitiri Ngirente yavuze ko uturere 13 twugarijwe n’ikibazo cy’imirire mibi n’igwingira

Minisitiri Ngirente yavuze ko uturere 13 twugarijwe n’ikibazo cy’imirire mibi n’igwingira
17-05-2018 saa 16:44' | By Akayezu Jean de Dieu | Yasomwe n'abantu 2623 | Ibitekerezo 1

Minisitiri w’Intebe w’u Rwanda, Dr Edouard Ngirente yavuze ko uturere 13 tw’u Rwanda dufite ikibazo gikomeye cy’umubare munini w’abana bahuye n’ibibazo by’imirire mibi byatumye bagwingira ari nayo mpamvu Guverinoma y’u Rwanda yiyemeje kurandura burundu impamvu zose zitera imirire mibi.

Ibi Minisitiri Ngirente yabigarutseho kuri uyu wa Kane tariki 17 Gicurasi 2018, ubwo yari mu Kagari ka Kijote Umurenge wa Bigogwe mu karere ka Nyabihu mu Burengerazuba bw’u Rwanda ubwo yatangizaga ubukangurambaga bwo kurandura ikibazo cy’igwingira mu bana bato mu Rwanda.

Minisitiri Ngirente yavuze ko ubu bukangurambaga buzafasha imishinga y’ingamba zikomatanyije zo kurwanya igwingira mu bana bato mu turere 13 twagaragaje kugira iki kibazo ku rwego rwo hejuru

Yagize ati "Nk’uko byasobanuwe, ubu bukangurambaga buzakorerwa mu Rwanda hose, buzafasha imishinga y’ingamba zikomatanyije zo kurwanya igwingira mu bana bato mu turere 13, dufite umubare munini w’abana bahuye n’ibibazo by’imirire mibi byatumye bagwingira. Impamvu Guverinoma y’u Rwanda yiyemeje kurandura burundu impamvu zose zitera imirire mibi, ni ingaruka mbi zigira ku bana bahuye nazo, ku miryango yabo no ku gihugu muri rusange."

Yakomeje agira ati "Kugira ngo ubu bukangurambaga buzagere ku nshingano bwahawe, birasaba ubufatanye bw’inzego zose zirebwa nabwo. By’umwihariko, birasaba ubufatanye bw’ababyeyi ubwabo kuko aribo bagomba gufata iya mbere mu kurandura imirire mibi mu bana babo."

Yunzemo ati " Guverinoma y’u Rwanda n’abafatanyabikorwa izakomeza kuba hafi no gufasha imiryango yugarijwe n’ikibazo cyo kugwingira. Ntituzaruhuka na rimwe iki kibazo kitaracika burundu. Abanyarwanda twashoboye byinshi kandi byari bigoye kurandura kugwingira sibyo bizatunanira"

Minisitiri Ngirente yanavuze ko Guverinoma y’u Rwanda yongeye gushishikariza ababyeyi bose kwitabira gahunda zo kubafasha kurinda abana babo kugwingira zirimo: Gahunda mbonezamikurire y’abana ikorerwa mu midugudu; Kuboneza imbyaro; Ubukangurambaga ku minsi igihumbi ya mbere y’ubuzima bw’umwana.

Iki kibazo cy’igwingira ry’abana cyagarutsweho na Perezida wa Repubulika y’u Rwanda, Paul Kagame ubwo yafunguraga Umwiherero w’Abayobozi bakuru b’igihugu wabaye muri Werurwe 2018.

Mu myanzuro kandi yafatiwe muri uyu mwiherero wa 15 w’abayobozi, uwa 12 wavugaga ko hagiye Kwihutishwa ishyirwamubikorwa rya Gahunda y’Igihugu y’Imbonezamikurire y’Abana bato hibandwa ku kurwanya imirire mibi.

Mu nama y’abaminisitiri yo kuwa 16 Werurwe 2018, nibwo hemejwe Umushinga w’Itegeko ryemera kwemeza burundu Amasezerano y’inguzanyo yashyiriweho umukono i Kigali mu Rwanda ku wa 07 Werurwe 2018, hagati ya Repubulika y’u Rwanda n’Ikigega Mpuzamahanga Gitsura Amajyambere (IDA), yerekeranye n’inguzanyo ingana na miliyoni cumi na zirindwi n’ibihumbi magana atandatu z’Amadetesi (17.600.000 DTS) agenewe umushinga wo gukumira no kugabanya igwingira ry’abana Minisitiri w’Intebe w’u Rwanda, Dr Edouard Ngirente Minisitiri Ngirente kandi yasuye irerero rya Bigogwe asobanurirwa n’umujyanama w’ubuzima serivisi zihabwa ababyeyi n’abana mu rwego rwo guhangana n’igwingira mu bana mu Murenge wa Bigogwe


INKURU ZA :
Tanga Igitekerezo
Ibitekerezo 1
Eliab Ladjab Kuya 22-05-2018

Iyo uba usobanukiw ibyo urimo wari kutubariza uto turere utwo aritwo. ariko nawe ushobora kuba watinye ubushakashatsi

English
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...