AMAKURU

UKWEZI
ubumwe

Minisitiri Gashumba atewe impungege n’ amabaruwa kiliziya yandikiye abayobozi b’ ibitaro

Minisitiri Gashumba atewe impungege n’ amabaruwa kiliziya yandikiye abayobozi b’ ibitaro
21-06-2019 saa 14:58' | By Nsanzimana Ernest | Yasomwe n'abantu 3920 | Ibitekerezo 4

Minisitiri w’ Ubuzima Dr Diane Gashumba yasabye Abasenateri n’ Abadepite kugirana ibiganiro na kiliziya gatolika mu Rwanda igahindura imyumvire ku bijyanye no kuboneza urubyaro. Senateri Ntawukuriryayo wigeze kuba Minisitiri w’ Ubuzima asaba Leta gushyira ingengo y’ imari muri gahunda zo kuboneza urubyaro idategereje kubifashwa n’ abafatanyabikorwa.

Yabivugiye mu nteko ishinga amategeko imitwe , kuri uyu wa Gatanu tariki 21 Kamena 2019, mu nama ku mikoranire y’inzego zita kuri gahunda y’ubuzima bw’imyororokere no kuboneza.

Iyi nama yari ifite insanganyamatsiko igira iti "Tuboneze urubyaro tubeho neza mu muryango".

Minisitiri w’ Ubuzima Dr Diane Gashumba yavuze ko mu bushakashatsi bakoze basanze kuboneza urubyaro bigabanya imfu z’ ababyeyi. Gusa ngo nka Minisitiri w’ Ubuzima atewe impungenge n’ amabaruwa abasenyeri ba kiliziya gatolika mu Rwanda bandikiye bamwe mu bayobozi b’ ibitaro avuguruza gahunda ya Leta yo kuboneza urubyaro.

Yagize ati “Natunguwe ku itariki ya 2 z’ ukwa Kane, ndetse no ku itariki ya 11 z’ ukwa 3, no kubona amabaruwa abiri, imwe yanditswe n’ umushumba wa diyosezi ya Ruhengeli, indi yandikwa n’ umushumba wa diyosezi ya Cyangungu bandikira abayobozi b’ ibitaro n’ ibigo nderabuzima.”

Yakomeje agira ati “Imwe yandikiwe umuyobozi w’ Ibitaro bya Burera, indi yandikirwa Umuyobozi w’ Ibitaro bya Mibilizi. Ntabwo ngiye gusoma ayo mabaruwa ariko ngiye kubereka ibikubiye muri ayo mabaruwa, njyewe binteye impungenge nka Minisitiri w’ Ubuzima.”

Dr Gashumba yavuze ko ayo mabaruwa asaba abayobozi b’ ibyo bitaro gusubiza inkunga zose ibyo bitaro byahawe muri gahunda zo kuboneza urubyaro zizasaba zisigisigaye muri ayo mavuriro ku itariki 30 z’ uku kwezi.

Ati “Umuyobozi w’ ibitaro niyumvira ayo mabwiriza azatanga inkunga yose idufasha gupima abagore icyorezo cya SIDA, azasubiza inkunga yose idufasha gupima abagore batwite, azatanga inkunga yose idufasha kurwanya imirire mibi.”

Minisitiri Gashumba avuga ko kiliziya ishaka ko nta mukozi w’ Ikigo nderabuzima uzoherezwa muri poste de santé nyamara ngo impande zombi zari zabyumvikanyeho.

Yongeyeho ati “Barongera bakavuga bati, ntimushyire gahunda zo kuboneza urubyaro mu igenamigambi, plan of action zanyu. Ntimusabe ibikoresho bijyanye no kuboneza urubyaro. Turabasaba kudakurikirana gahunda zo kuboneza urubyaro hakoreshejwe uburyo butari ubwa kamere no kutabitangira raporo haba muri poste secondaire no mu bajyanama b’ ubuzima. Ni ukuvuga ngo baravuze ngo gahunda twashyizeho nka Leta twe kuzikoresha”.

Perezida wa Sena y’ u Rwanda atangiza iyi nama yavuze ngo “ Nta Muyobozi udakwiye kumva uruhare rw’ubufatanye bw’inzego zose, kugira ngo twishakemo ibisubizo bidufasha gukemura za mbogamizi, bikanazana impinduka mu mibereho y’abo dushinzwe”.


Dr Condo Jeanine

Umuyobozi w’ Ikigo cy’ igihugu cy’ Ubuzima RBC Dr. Jeanine Condo yavuze ko “Abagore bagera kuri 19% bashaka serivisi yo kuboneza urubyaro ntibayibone ku buryo bushimishije. Ku rwego rw’igihugu muri gahunda dufite ni uko twazamura ikigero cyo kuboneza urubyaro kikava kuri 54% tukagera kuri 60%”

Bisanzwe bizwi ko kiliziya gatolika mu Rwanda itemerera amavuriro yayo gutanga serivise zo kuboneza urubyaro.

Tariki 11 Gashyantare 2016, Minisiteri y’ Ubuzima n’ Inama y’ abepisikopi bagiranye amasezerano avuga ko ababyeyi bagana amavuriro ya Kiriziya Gatolika mu Rwanda bahabwa amakuru ku buryo bwose yo kuboneza urubyaro bwaba ubwa kamere cyangwa ubukoresha imiti, hanyuma abahisemo ubutaboneka kuri ayo mavuriro bakagirwa inama yo kugana ku bigo byunganira ibigo nderabuzima, cyangwa andi mavuriro n’ahandi ubwo buryo bushobora gutangirwa.


Senateri Ntawukuryayo wigeze kuba Minisitiri w’ Ubuzima

Senateri Ntawukuriryayo Jean Damascene wigeze kuba Minisitiri w’ Ubuzima asanga Leta ikwiye gushyira ingengo y’imari muri gahunda zo kuboneza urubyaro aho kugira ngo itegereze ko bizakorwa ku nkunga z’abafatanyabikorwa, kuko byateza ikibazo mu gihe izo nkunga zaba zihagaze.

Depite Mukandera Iphigenie arasabira umwiherero cyangwa amahugurwa abanyamadini, abayahagarariye n’abayobozi kugera ku nzego z’ibanze kugira ngo bumve inshingano zabo muri gahunda zo kuboneza urubyaro. Kandi abanyamadini bumve aho inshingano zigarukira


INKURU ZA :
Tanga Igitekerezo
Ibitekerezo 4
MAHORO Kuya 1-08-2019

Ikibazo abatanga iyo miti nta bumenyi bafite ku miterere y’umubiri w’umuntu,
Umugore n’imiti umubiri we ushimye bayimuhindurira batamugishije inama, yabasaba ibyo yari asanzwe akoresha bakamubwira ngo byose bikora kimwe. yababifata agahora mu mihango ya buri gihe, bikagora umugabo, kandi nawe ubuzima bwe bugahora mu bihe bibi n’intege nke.

Kiliziya nimureke yigishe abantu uburyo bwose umuntu azaje yihitiramo ariko abizi.
Uwanjye baramuhinduriye amara icyumweru ava mubwiye kubisuzayo barabyanga ngo nagende bizamenyera, mu gihe ibyo yakoresheje igihe kirenze imyaka 3 nta kibazo yari yarahuye nacyo yari yaragize, nabonye ko byazamwica, ndabimubuza kuva mu kwa 12/2018.
Ubu turabyimenyera da.

Ritha Kuya 27-06-2019

Kiliziya irarengana umuntu niwe wimenya biriya binini nibyo kwica abantu bitera ibibazo harinigihe ubisamiramo Imana niyo iboneza urubyaro abifuza abana bakababura ni benshi.

Alias Emmanuel Kuya 22-06-2019

Bariya bafite uko baremwe, kororoka, si ibyabo. Sinumva aho muhera muvuga kiliziya, bariya bifuza amaturo batarebye n’uko uwo bayasoresha ameze. Bemera ko umuntu yabaho nabi(ariko bo babayeho neza) akajya kubakorera yarangiza akayabaha. Biramutse bigenze uko badashaka bakura he intama babaga ntizitake? Ntibagakwiye kwishyuza school fees, cyangwa izindi serivisi batanga, nyuma bakabona gufata icyo cyemezo.

B Kuya 21-06-2019

EREGA KILIZIYA IKORA IBYO YUMVA, NTA MAHUGURWA AKENEWE, USIBYE UMUNTU URASOMYE, NTAWE UTAZI KO UBURYO BWA KAMERE KILIZIYA YIGISHA BUSIGASIRA UMUZIMA BW’ABABYEYI. IRIYA MITI N’INSHINGE BYANGIZA UBUZIMA KANDI IYO USESENGUYE UKO IKORA YICA UBUZIMA BW’ABANA BAGAKWIYE KUBAHO. ABANYAMAHANGA BABIDUSHISHIKARIZA, UBU NIBO BARI KURIRA BASHAKA URUBYARO N’URUBYIRUKO, HARI AHO BASHYIZE ZA MINISITERE ZISHISHIKARIZA URUBYIRUKO KUBAKA INGO, ZISHISHAKARIZA ABUBATSE GUTERA AKABARIRA, ZIHEMBA ABABEYI BABYEYE, AHANDI BARI GUFUNGA IBIGO BY’AMASHURI KUBERA KUBURA ABANA. LETA YAGAKWIYE GUSHAKA UKO IBYAZA UMUSARURO UKWIYE ABATURAGE IFITE AHO KUBANIGIRA MU NDA ZA BA NYINA. ABATURAGE NI UMUTUNGO UKOMEYE, NTA MBAMVU YO KUGANYA UBUKENE KANDI LETA IFITE IMBARAGA Z’URUBYIRUKO RWAGAKWIYE KUBYAZWA UMUSARURO IGIHUGU KIGATERA IMBERE.

English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...