AMAKURU

UKWEZI
pax

Ibyashingiweho mu gushyira ibice bimwe bya Kigali muri Guma mu Rugo

Ibyashingiweho mu gushyira ibice bimwe bya Kigali muri Guma mu Rugo
26-06-2020 saa 10:14' | By Akayezu Jean de Dieu | Yasomwe n'abantu 2037 | Ibitekerezo 4

Minisiteri y’Ubuzima yasobanuye ko gushyira imidugudu itandatu yo mu Mujyi wa Kigali mu Turere twa Kicukiro na Nyarugenge, muri guma mu rugo mu gihe cy’iminsi 15, byatewe n’uko kuva tariki ya 3 Kamena kugeza ku ya 24 Kamena, hari imidugudu ine yabonetsemo abarwayi ba Coronavirus bagera kuri 25.

Itangazo rya Minisiteri y’Ubutegetsi bw’Igihugu rivuga ko kuva mu ijoro ryo kuri uyu wa Kane tariki 25 Kamena 2020, hari imwe mu midugudu yashyizwe muri gahunda ya guma mu rugo, aho abaturage baho basabwa kuguma mu rugo mu gihe cy’iminsi 15.

Imidugudu yashyizwe muri Guma mu rugo

- Kamabuye, Akagari ka Nyarurama, Umurenge wa Kigarama muri Kicukiro

- Zuba, Akagari ka Nyarurama, Umurenge wa Kigarama muri Kicukiro

- Nyenyeri, Akagari ka Bwerankori, Umurenge wa Kigarama muri Kicukiro

- Rugano, Akagari ka Kanunga, Umurenge wa Gikondo muri Kicukiro

- Kadobogo, Akagari ka Kigali, Umurenge wa Kigali muri Nyarugenge

- Gisenga, Akagari ka Kigali, Umurenge wa Kigali muri Nyarugenge

Minisitiri w’Ubutegetsi bw’Igihugu, Prof. Shyaka Anastase, yabwiye Radiyo Rwanda ko gushyira iyi midugudu muri Guma mu Rugo bigamije kurinda abayirimo n’abari hanze yayo, asaba abaturage kumva ko atari igihano.

Ati “Byumvikane neza Guma mu Rugo si igihano, Guma mu Rugo ni uburinzi, ni ubutabazi, ni ineza y’abanyarwanda, ni ukugira ngo abantu twirinde iki cyorezo.”

Yasabye abashyizwe muri Guma mu Rugo kugira ikinyabupfura, ntibatangire kujya basurana urugo ku rundi ngo ni uko bari imbere mu mudugudu wagiye muri iyi gahunda.

Umunyamabanga wa Leta muri Minisiteri y’Ubuzima, Dr Mpunga Tharcisse, yavuze ko mu bipimo bafite byo kuva ku itariki 3 Kamena kugeza tariki 24 Kamena, muri Kigali hagaragaye abantu 34 barwaye indwara ya Covid-19, muri abo 25 bose baturukaga mu midugudu ine yo muri Kicukiro na Nyarugenge.

Yagize ati “Ibi rero bigaragaza ko muri utu duce bishoboka ko iyi ndwara iri kugenda ikwirakwira mu baturage nk’uko byagiye bigaragara ahandi nka za Rusizi, akaba ari yo mpamvu izi ngamba zo gukumira ko indwara ikomeza gukwirakwira ahantu hatandukanye zashyizweho”.

Minisiteri y’Ubuzima ivuga ko hari impungenge z’uko iyi midugudu ishobora kwiyongera hakagira indi ishyirwa muri Guma mu Rugo, ikabwira abanyarwanda bose ko aho icyorezo kigeze bisaba ko buri wese ashyiramo imbaraga zidasanzwe mu kugikumira.

Ibice by’iriya midugudu yashyizwe muri Guma mu Rugo birashyirwaho ibimenyetso byerekana ko abayirimo bagumamo imbere kugira ngo batagira aho bahurira n’abari hanze yayo.

Kuva ku wa 13 Werurwe 2020, umurwayi wa mbere wa Coronavirus agaragaye mu Rwanda, hamaze kuboneka abantu 850 banduye mu bipimo 126 284 bimaze gufatwa, 385 barayikize mu gihe 463 bakiri kwitabwaho n’abaganga ; babiri barimo umushoferi w’imyaka 65 n’umupolisikazi nibo bitabye Imana.


INKURU ZA :
Tanga Igitekerezo
Ibitekerezo 4
HABUMUGISHA Kuya 27-06-2020

BIRAKAZE ?! TWINDE DUKURIKIZA AMABWIRIZA.

Pacifiqwe Kuya 27-06-2020

Abanyarwanda twese dukwiriye gukomeza kwirinda iki cyorezo kubera yuko Atari akuntu koroheje.

Pacifiqwe Kuya 27-06-2020

Abanyarwanda twese dukwiriye gukomeza kwirinda iki cyorezo kubera yuko Atari akuntu koroheje.

Pacifiqwe Kuya 27-06-2020

Abanyarwanda twese dukwiriye gukomeza kwirinda iki cyorezo kubera yuko Atari akuntu koroheje.

English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...