AMAKURU

UKWEZI
ubumwe

Huye: Abasigajwe inyuma n’ amateka batuye mu nzu zishaje barasaba gufashwa [AMAFOTO]

Huye: Abasigajwe inyuma n’ amateka batuye mu nzu zishaje barasaba gufashwa [AMAFOTO]
3-09-2019 saa 14:04' | By Nsanzimana Ernest | Yasomwe n'abantu 1255 | Ibitekerezo 2

Abasigajwe inyuma n’ amateka batujwe mu mudugudu wa Nyanza, Akagari ka Rukira Umurenge wa Huye mu karere ka Huye basaba ubuyobozi ubufasha kuko babayeho mu buzima bubi burimo kutagira ubwiherero no kuba mu nzu zishaje cyane.

Nyandwi Julienne w’ imyaka 60 afite abana babiri, ari mu kiciro cya kabiri bivuze ko yitangira mituelle de santé, ubwo UKWEZI twamusuraga kuri uyu wa Mbere imvura yari yaraye igwa.

Yagize ati “Iterambere dushaka ni ukugira ngo natwe twubakirwe inzu zacu zivugururwe. Nk’ ubu inzu yanjye ndaramo irava, nta kuntu mbona aho ndara nijoro naraye nigaragura mu mazi ibiziba ndafata ndayora”

Umudugudu batujwemo bawubakira n’ umugiraneza w’ umufureri mu myaka ya za 1980. Uyu mudugudu ugizwe n’ inzu z’ amatafari zishaje cyane kuko ibiti bisakariwemo amategura byatangiye kuvunagurika.

Mutungirehe Emmanuel w’ imyaka 30 avuga ko abayobozi banga kububakira bakababwira ko inzu zabo zikomeye nyamara zarashaje.

Agira ati “Umuyobozi araza agahita ngo iyi nzu yanyu irakomeye. Ese iyi nzu ikomeye gute ubona ibiti byarashaje, amategura yarashaje, amadirishya yarashaje inzugi zarashaje kandi nta bushobozi dufite”

Mutungirehe avuga ko impamvu badashobora kwivugururira inzu bahawe n’ umufureri w’ umugiraneza muri za 1980 ari uko nta cyo bafite bakora kinjiza amafaranga. Abasigajwe inyuma n’ amateka bari batunzwe no kubumba none inkono n’ ibibindi ntabwo bikibona abakiriya nka mbere.

Asaba Leta y’ u Rwanda ko yabubakira nk’ uko mu bice bitandukanye by’ igihugu abasigajwe inyuma n’ amateka bubakiwe bagatuzwa mu mazu nziza.

Agira ati “Ntabwo ibumba rizavamo ibati rishyashya, ngo rivemo umuriro w’ amashyanyarazi, ngo rivemo mituweri ngo rimviremo akazi kanzamura.”
Ange Sebutege, Umuyobozi w’ Akarere ka Huye yasabye aba baturage batuye muri uyu mudugudu ko bakwiye kugaragaza uruhare rwabo mu kwiteza imbere.

Yagize ati “Icyo turimo turakora ubu ng’ ubu ni ukureba ni ukureba abantu bafite ibyo bibazo tukareba ibyo bashoboye kwikorera, tukareba natwe uruhare rw’ ubuyobozi bw’ akarere icyo twafatanyamo”

Meya Sebutege avuga ko gukemurira abaturage ibibazo batigishijwe kugaragaza uruhare rwabo bitaba ari ukubaka umuturage wifuzwa ati “Umuturage twifuza ni ugira uruhare mu iterambere…Ubuyobozi turareberera abaturage bose turashaka gukemura ikibazo muri rusange”.

Meya Sebutege avuga ko kugeza ubu imiryango 193 idafite inzu zo kubamo naho imiryango 1700 ifite inzu zikeneye gusanwa. Ingo 328 ntizigira ubwiherero namba.

MU MAFOTO REBA IMIBEREHO Y’ ABASIGAJWE INYUMA N’ AMATEKA BATUYE MU MUDUGUDU WA NYANZA



Ubu ni uburiri bw’ umwe mu batuye muri uyu mudugudu wa Nyanza


Mu miryango irenga 5 ituye muri uyu mudugudu nta n’ umwe ufite ubwiherero bwujuje ibisabwa


INKURU ZA :
Tanga Igitekerezo
Ibitekerezo 2
Bruno Kuya 3-09-2019

Icyo byaba cyo cyose, byaba imyumvire mike, byaba ikibazo cy’ubushobozi ge mbona ubuyobozi bufite inshingano zo kubegera.

Kere Kuya 3-09-2019

Ariko se ubu abantu bazarekeraho kuba dependent ryari? Ubu umusore nkuwo ntiyabasha kwiyubakira ubwiherero?! Ikibabaje n’uko uyu mwanda ushobora kugira ingaruka Ku buzima bwabo baturanye badafite imyumvire nkiyabo. Gusa byo bakeneye ubufasha ariko cyane cyane bwo kuganirizwa bagahindura imyumvire.

English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...