AMAKURU

UKWEZI

Hari abafata uburwayi bw’igicuri nk’amarozi, amashitani … hari n’abaha akato abakirwara

Hari  abafata uburwayi bw’igicuri nk’amarozi, amashitani … hari n’abaha  akato abakirwara
24-05-2018 saa 18:21' | By Vincent Nsengiyumva | Yasomwe n'abantu 977 | Ibitekerezo

Mu gihe abanyarwanda benshi bamaze gusobanukirwa agaciro ko kwihutira kujya kwa muganga iyo bakibonaho ibimenyetso by’indwara runaka, ngo haracyari umubare munini w’abantu batarasobanukirwa uburwayi bw’igicuri, aho abakirwara batereranwa ndetse bakanahabwa akato bikaba byabagiraho ingaruka zikomeye.

Inzobere mu kwita no kuvura indwara y’igicuri zigaragaza ko hari abanyarwanda bagifite imyumvire idakwiye yo gufata umurwayi w’igicuri nk’uwarozwe cyangwa se uwahanzweho n’amashitani rimwe na rimwe bakanamuha akato.

Bagaragaza ko uburwayi bw’igicuri ari kimwe n’izindi ndwara zo mu mutwe, ndetse ko nayo uyirwaye akurikiranwa, agahabwa imiti agakira neza.

Ibi byagarutsweho mu nama nyunguranabitekerezo yahuje bamwe mu nzobere zivura indwara y’igicuri mu bitaro bitandukanye ndetse n’abakora mu miryango itandukanye irwanya iyi ndwara.

Dr. Jean Damascene Iyamuremye umuyobozi w’agashami gashinzwe ubuvuzi bw’indwara zo mu mutwe, yavuze ko hakiri abantu benshi bataramenya indwara y’igicuri, ndetse ko hari n’abahunga cyangwa bagaha akato abagaragayeho iyi ndwara.

Yagize ati “Abantu benshi ntibaramenya indwara y’igicuri, kuko hari abakiyitiranya n’amarozi, abazimu ariko ikiruseho ni uko iyo umuntu agize ikibazo akagaragarwaho n’igicuri usanga abantu aho kugira ngo bamufashe bamuhunga bakamuha akato.”

Yanavuze ko hari abarwaye iyi ndwara y’igicuri bagira ipfunwe ndetse bigatuma batajya no mu bandi, abasaba ko icyo bagomba kumenya ari uko ari indwara nk’izindi zose cyane ko inavurwa igakira.

Dr Iyamuremye yikomye imiryango ifata nabi abarwayi b’igicuri, bakabaha akato ndetse bakanabaheza, abasaba kubaba hafi kugira ngo igihe kibafashe babiteho ndetse babe banabarinda ko bashobora kugwa ku kintu cyabakomeretsa.

Yanakomoje ku miryango igifite imyumvire yo kubona umurwayi w’igicuri bakavuga ko ari amarozi cyangwa amashitani bakamujyana mu bapfumu, avuga ko bituma uyirwaye yononekara cyane kuko bajya kumenya ubwenge bwo kumujyana kwa muganga yaramaze kuremba bikomeye.

Dr Iyamuremye avuga ko n’amateka u Rwanda rwanyuzemo nayo afite uruhare runini ku kuba hari abarwayi benshi b’igicuri kubera ingaruka zayo.

Ati “Jenoside yakorewe Abatutsi nayo ifitanye isano n’indwara y’igicuri igaragara mu Rwanda.Ndemeza ko nyuma ya Jenoside igicuri cyiyongereye.Ubu abantu benshi barwaye igicuri ni abakomerekejwe ku gice cy’umutwe.”

Yavuze ko n’ubwo hakiri inzitizi z’imyumvire ya bamwe kuri ubu burwayi bw’igicuri, ngo Minisiteri y’ubuzima ikora ibishoboka mu gushaka imiti ivura ubu burwayi, ndetse ngo ku bitaro n’amavuriro byose byo mu gihugu hakaba harashyizwemo umuganga uvura iyi ndwara kimwe n’izindi zose zo mu mutwe.

Mutabazi Pheneas uyobora umushininga urwanya uburwayi bw’igicuri ndetse ukanita ku barwaye iyi ndwara, avuga ko indwara y’igicuri iterwa no kwangirika k’ubwonko bitewe no gukomereka.

Avuga ko mu rwego rwo kwirinde uburwayi bushya bw’igicuri bashishikariza abantu kwirinda impanuka ndetse no kubyarira kwa muganga .

Ubushakashatsi buherutse gukorwa mu bitaro byose n’amavuriro yo mu Rwanda bwagaragaje ko abantu bagera ku bihumbi Magana atandatu(600.000) aribo bafite ubu burwayi bw’igicuri.

Mutabazi Pheneas uyobora umushininga urwanya uburwayi bw’igicuri


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
netlink
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...