AMAKURU

UKWEZI

Kayonza: Abayobozi ba CEP basengewe ku mugaragaro, bakorerwa ibirori by’agahebuzo

Kayonza: Abayobozi ba CEP basengewe ku mugaragaro, bakorerwa ibirori by’agahebuzo
26-03-2018 saa 14:08' | By Muhire Aime Placide | Yasomwe n'abantu 1575 | Ibitekerezo 1

Kuri uyu wa 25 Werurwe 2018, mu masaha y’igitondo mu ishami rya Kaminuza y’u Rwanda riherereye i Kayonza mu murenge wa Gahini, mu mudugudu wa Videwo ahizwi nk’i Rukara; habereye umuhango ndetse n’ibirori byo gusengera abayobozi bakuru b’Umuryango w’Abanyeshuli b’aba Pentikoti biga muri Kaminuza.

Uyu muhango wari witabiriwe n’abayobozi bakuru ba ADEPR bo mu nzego zitandukanye uhereye kuri biro Nyobozi ya ADEPR iherutse gutorwa kuwa 16 Gashyantare, 2018; ikaba yari ihagarariwe na Kamugisha Nassan uyobora DAVE (Urwego rushinzwe ivugabutumwa muri ADEPR) ndetse n’abayobozi bayobora Ururembo rw’Intara y’Iburasirazuba bari bahagarariwe na KAMANZI akaba ari Regional wungirije ushinzwe Ubuzima bw’Itorero.

Abandi bayobozi bari bahari barimo Umushumba w’itorero ry’Akarere ka Kayonza n’abandi bayobora Paruwasi zitandukanye ndetse n’ubuyobozi bw’Ishuli aba bayobozi basengewe bigamo.

Aba bayobozi basengewe batorewe mu matora yabaye kuwa 10 Ukuboza 2017 nyuma y’uko Komite yari imaze umwaka iyobora uyu muryango yari icyuye igihe. Gahunda y’umunsi yatangijwe n’indirimbo ziramya zikanahimbaza Imana babifashijwemo na Shiloh Worship Team nyuma Chorale Louange, Chorale Horebu ndetse na LEBANONI yari yaturutse kuri Paruwasi ya Rwinkuba zikomeza gutambutsa ubutumwa bwiza mu ndirimbo.

Mu byagaragariraga amaso, abantu bari bakeye kandi rwose ibirori byari byitabiriwe kuko n’abaturaniye Ishuli nabo bari baserutse. Abari bitabiriye umuhango bagejejweho ijambo ry’Imana n’Umuyobozi w’Ururembo rw’Intara y’Iburasirazuba, mu ijwi rituje;yatangiye asuhuza abanyacyubahiro batandukanye bari bitabiriye ibirori.

Yakomeje abwira abantu ko yaje kubabwira imbaraga zo guhamagarwa n’Imana; ndetse agenda yibanda cyane ku mateka y’abavugwa muri Bibiliya. Mu gusoza icyigisho cye, yatuye abari aho bose ijambo ry’Imana riboneka muri Zaburi 60: 14.

Ubwo uhagarariye Komite yacyuye igihe, Nkundumukiza Andrew yahabwaga umwanya; yagarutse cyane ku byo yagezeho mu mwaka wose yamaze ayobora uyu muryango. Yagize ati ”Twatangiye bigoye n’Abakirisito ari bake ariko turashima Imana yatwaguye ndetse ikadushoboza imirimo ikomeye twakoze irimo gusura abarwayi no kumurika amashusho y’indirimbo za Chorale Horebu ku mugaragaro”.

Yavuze byinshi bikora ku mitima y’abantu, maze bose bakoma amashyi menshi icyarimwe abayobozi bamukora mu ntoki bati ”Wabaye Intwari”.

Ubwo umuyobozi wa CEP watowe yahabwaga umwanya ngo abwire abari aho imigabo n’imigambi ye, yavuze ko bifuza kubaka CEP, UR-RUKARA CAMPUS mu buryo bw’umwuka ku buryo binashobotse yaba iya mbere mu Rwanda. Yakomeje agira ati: ” Turateganya kubaka amacumbi y’abanyeshuli mu kibanza twahawe n’itorero mu rwego rwo guteza imbere imibereho myiza y’abagize CEP muri rusange”.

Hakurikiyeho umuhango wo gutanga ishimwe ku bayobozi bari bacyuye igihe; igikorwa cyayobowe na Vice-president wa ONAP nyuma abayobozi bashya bahita basengerwa ndetse banasobanurirwa inshingano n’imirimo bahawe.

Umuyobozi uhagarariye Ururembo rw’Intara y’Iburasirazuba wari uyoboye iki gikorwa yasobanuriye abayobozi bashya ko bagomba kuba icyitegererezo ku rukundo,ku kugira umutima uboneye ndetse no gukora imirimo myiza muri bagenzi babo. Mbere yo kubasengera, yababwiye ko bagomba guhinduka rwose,kugira ngo bazageze abantu mu bwami bw’Iman.

Ubwo uwari uhagarariye Ubuyobozi bw’ikigo muri uyu muhango yahabwaga ijambo, yashimye cyane Komite icyuye igihe anasaba Abayobozi bashya ba CEP ko bagomba gukomerezaho, bakarushaho kuba indashyikirwa. Yibukije abanyeshuli bari aho ko nubwo bagomba gusenga ariko bakwiriye kwibuka ko mbere na mbere bazanywe no kwiga. Umuyobozi uhagarariye abanyeshuli we yasabiye umugisha komite icyuye igihe, abifuriza kuzaba intwari mu buzima bwabo bwose.

Amateraniro asojwe, abayobozi bagiye gufata ifoto y’urwibutso mu busitani. Ibirori byasojwe n’ubusabane rusange bwabereye mu nyubako yitwa’Mutipurpose Hall’. Abatumirwa bose bibukijwe ko bagomba kuvuga ubutumwa bwiza kuko aribwo musemburo w’impunduka itorero ndetse n’igihugu muri rusange gikeneye.

Iyi Komite yasengewe igizwe na CEP President, Mizero Anaclet, Visi President Bahati Shabani Nzeyimana Visi Presidente Mujawimana Jeanette, Secretaire Iturinde Denyse, Comptable Mukamugarura Esperance Umujyanama Nyamwasa Charles naho umujyanama akaba ari Akimana Josiane.

Abitabiriye uyu muhango bari benshi cyane

Korali Louange iri mu zasusurukije abitabiriye uyu muhango


INKURU ZA :
Tanga Igitekerezo
Ibitekerezo 1
Bahatishaban Kuya 26-03-2018

Rwose Imana izadushoboze gukora ibyubutwari.

English
IGURIRE
Reba Ibindi Byinshi
netlink
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...