konka coffee
KONKA

AMAKURU

UKWEZI

Bishop Rugagi na bagenzi be bashyikirijwe parike, bakatirwa ikihe gifungo bahamwe n’ibyaha?

Bishop Rugagi na bagenzi be bashyikirijwe parike, bakatirwa ikihe gifungo bahamwe n’ibyaha?
15-03-2018 saa 07:00' | By Chief Editor | Yasomwe n'abantu 9373 | Ibitekerezo

Polisi y’u Rwanda mu ntangiriro z’uku kwezi yataye muri yombi abavugabutumwa batandatu bakurikiranyweho gukoresha inama mu buryo bunyuranije n’amategeko no kurwanya ububasha bw’amategeko. Abatawe muri yombi, bamaze gushyikirizwa parike yakiriye dosiye yabo kuwa Mbere tariki 12 Werurwe 2018 ngo bakomeze gukurikiranwa n’urwego rw’ubushinjacyaha. Ibyaha bakurikiranyweho bibahamye bakaba bahabwa ibihano birimo n’igifungo.

Umuvugizi mukuru wa Polisi y’u Rwanda, CP Theos Badege, mu kiganiro yagiranye n’ikinyamakuru Ukwezi.com ubwo bamaraga gutabwa muri yombi, yadutangarije ko nyuma y’aho hahagaritswe insengero zitujuje ibisabwa, byaje gutahurwa ko bamwe mu bayobozi b’amatorero baremye itsinda bagatangira n’inama zitemewe bagamije gutambamira cyangwa kunaniza iyubahirizwa ry’amategeko.

CP Theos Badege yakomeje avuga ko Polisi yatangiye iperereza hakamenyekana ababiri ku isonga ndetse igatahura n’ibikorwa bigize icyaha bakoze. Muri ibyo byaha harimo gukoresha inama mu buryo bunyuranije n’amategeko no kurwanya ububasha bw’amategeko.

Mu babiri ku isonga harimo Apostle Rwandamura Charles, R. Pastor Nyamurangwa Fred, Bishop Rugagi Innocent, Rev Ntambara Emmanuel, Pastor Dura James na Pastor Kalisa Shyaka Emmanuel. Abo uko ari batandatu(06) bakaba bamaze igihe bakurikiranwa bari mu maboko y’ubutabera.

Ibyaha baregwa biramutse bibahamye bahabwa ibihe bihano?

Iyo uregwa akiburana cyangwa agikurikiranwa n’inzego zinyuranye z’ubutabera, aba akiri umwere kuko urukiko ruba rutaramuhamya icyaha, kabone n’iyo yaba yiyemerera icyaha yitwa umunyacyaha iyo urukiko rumaze kukimuhamya mu buryo ndakuka kandi rukamukatira n’igihano kijyanye n’icyo cyaha.

Kuri aba bavugabutumwa nabo, kugeza ubu ni abere ariko hakurikijwe ingingo z’amategeko, hari ibihano biteganywa n’igitabo cy’amategeko ahana ibyaha mu Rwanda, zigaragaza ibihano bahabwa ibi byaha biramutse bibahamye.

Ingingo ya 464 mu gitabo cy’amategeko ahana ibyaha mu Rwanda igira iti: "Umuntu wese urwanya ububasha bw’amategeko cyangwa akoshya kuburwanya, abigiriye ubugome kandi mu ruhame, ahanishwa igifungo kirenze imyaka itanu (5) kugeza ku myaka irindwi (7).
Ibihano bivuzwe mu gikacya mbere cy’iyi ngingo, bikubwa kabiri iyo uko koshya kwagize ingaruka mbi"
.

Naho ingingo ya 685 mu gitabo cy’amategeko ahana ibyaha mu Rwanda yo igira iti: "Umuntu wese ukoresha inama ku mugaragaro cyangwa ukwigaragambya mu jnzira nyabagendwa atabimenyesheje inzego bireba ahanishwa igifungo kuva ku minsi umunani (8) ariko kitageze ku mezi atandatu (6) n’ihazabu y’amafaranga y’u Rwanda kuva ku bihumbi ijana (100.000) kugeza kuri miliyoni imwe (1.000.000) cyangwa kimwe gusa muri ibyo bihano."

Itabwa muri yombi ry’aba bavugabutumwa bashinjwa gutambamira ibyo gufunga insengero zitujuje ibisabwa n’amategeko, ryaje kurikira ibyatangajwe na Perezida wa Repubulika y’u Rwanda, Paul Kagame ubwo yasozaga Umwiherero wa 15 w’Abayobozi bakuru b’Igihugu aho yerekanye ko yatangajwe n’ukuntu mu Mujyi wa Kigali hafungwa insengero 700, yibaza niba ari za robine zitanga amazi cyangwa inganda zifitiye abaturage umusaruro.

Yakomeje avuga ko kuba insengero ziruta robine z’amazi n’ibindi bifitiye akamaro abaturage ari ‘akajagari.’ Urusengero rwa Bishop Rugagi ni rumwe mu nsengero zisaga 700 ziherutse gufungwa mu mujyi wa Kigali zizira kuba zitujuje ibisabwa bishobora gutuma zanahungabanya umutekano w’abazisengeramo. Hirya no hino mu gihugu, insengero zimaze gufungwa zizira kuba zitujuje ibisabwa zirabarirwa mu bihumbi.


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...