AMAKURU

UKWEZI
pax

VIDEO : Bosenibamwe yasezeweho bwa nyuma hagarukwa ku murava no gukunda abantu byamuranze

VIDEO : Bosenibamwe yasezeweho bwa nyuma hagarukwa ku murava no gukunda abantu byamuranze
27-05-2020 saa 21:05' | By Akayezu Jean de Dieu | Yasomwe n'abantu 5956 | Ibitekerezo 1

Bosenibamwe Aimé wakoze imirimo itandukanye muri Leta y’u Rwanda yasezeweho mu cyubahiro abo mu muryango we, abamuzi ndetse n’Umuryango wa FPR Inkotanyi yabarizwagamo bagaruka ku murava no gukunda abantu byamurangaga.

Bosenibamwe kuri ubu wari Umuyobozi w’Ikigo cy’Igihugu gishinzwe Igororamuco yasezeweho bwa nyuma kuri uyu wa Gatatu tariki 27 Gicurasi 2020, mu muhango wabimburiwe no kumusabira ku Mana.

Abamutangiye ubuhamya mu muhango wabereye aho umuryango we utuye mu Karere ka Gasabo, bagarutse ku buryo yari umugabo ukunda umurimo, ugira umurava, agakunda umuryango we n’abantu muri rusange.

Umugore we, Kakuze Gloriose Sifa bari bafitanye abana batanu b’abakobwa yavuze ko yamubereye umugabo mwiza kuva bamenyana ndetse yakundaga abana babyaranye agahora abatoza urukundo.

Umunyamabanga Mukuru w’Umuryango FPR Inkotanyi, Ngarambe Francois yavuze ko mu mirimo yose Bosenibamwe yahawe yayikoraga uko bikwiye.

Bosenibamwe yari umwe mu bagize komisiyo ishinzwe imibereho myiza mu Muryango FPR-Inkotanyi ku rwego rw’igihugu, aho ubuyobozi bw’uyu muryango bumushimira inama z’ingirakamaro yatangaga muri byose.

Amateka avunaguye ya Bosenibamwe

Bosenibamwe Aimé yavukiye mu Murenge wa Kanama mu Karere ka Rubavu, tariki ya 27 Ugushyingo 1968.

Amashuri abanza, ayisumbuye na kaminuza yabyigiye muri Repubulika Iharanira Demokarasi ya Congo, aho yakuye impamyabumenyi y’icyiciro cya kabiri cya kaminuza mu bijyanye n’ikoranabuhanga mu buhinzi, yakuye muri Kaminuza ya Kisangani.

Mu 1996 yabaye mwarimu mu kigo cy’Ishuri cya EAV Gisovu. Hagati ya 1999 na 2000 yakomereje akazi ko kwigisha muri EAV Gitwe.

Kuva mu 2000 kugera mu 2002 Bosenibamwe yabaye Umunyamabanga Nshingwabikorwa w’Umurenge wa Rukira, aho yavuye yerekeza muri Minisiteri y’Ubuhinzi n’Ubworozi, ahamara imyaka itatu.

Hagati ya 2005 na 2006 yabaye Umunyamabanga Nshingwabikorwa w’iyari Intara ya Kibungo, aho yavuye ajya kuba Umuyobozi Ushinzwe Igenamigambi mu Karere ka Nyagatare, kuva ku itariki ya 1 Werurwe 2006.

Hagati ya 2006 na 2009 yayoboye Akarere ka Burera, nyuma agirwa Guverineri w’Intara y’Amajyaruguru asimbuye Boniface Rucagu kuva muri Werurwe 2009 kugera mu 2016.

Kuva mu 2017 yari Umuyobozi Mukuru w’Ikigo cy’Igihugu cy’Igororamuco, ari na wo mwanya wa nyuma asozerejeho ubuzima bwe ku myaka 52. Asize umuryango w’umugore n’abana batanu


INKURU ZA :
Tanga Igitekerezo
Ibitekerezo 1
Sangwa Kuya 28-05-2020

Burya se yarafite abana batanu gusa ? Cyangwa hari n’abandi

English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...