konka coffee
KONKA

AMAKURU

UKWEZI
ubumwe

Umunyamakuru Sandrine Isheja ashengurwa n’uko atazi aho Se wishwe muri Jenoside yashyizwe

Umunyamakuru Sandrine Isheja ashengurwa n’uko atazi aho Se wishwe muri Jenoside yashyizwe
8-04-2019 saa 12:09' | By Vincent Nsengiyumva | Yasomwe n'abantu 3127 | Ibitekerezo 4

Umunyamakuru umaze kwamamara cyane mu biganiro by’imyidagaduro kuri amwe mu maradiyo akomeye mu Rwanda, Sandrine Isheja, n’intimba nyinshi, yagaragaje ko agishengurwa no kuba bataramenya amakuru y’aho abishe umubyeyi we bamujugunye ngo bahamukure maze bamushyingure mu cyubahiro.

Ku Cyumweru tariki 7 Mata 2019 nibwo Umunyamakuru Sandrine Isheja ukora kuri Radio Kiss FM, yanditse amagambo yuzuye ishavu n’agahinda ku rubuga rwa Instagram, aho yibukaga Se umubyara witwa Dr Butera Guillaume wishwe muri Jenoside yakorewe Abatutsi imyaka 25 ikaba ishize abo mu muryango we bataramenya aho umurambo wajugunywe.

Mu magambo ye, Sandrine Isheja yavuze ko umubyeyi we witwaga Dr Butera Guillaume yiciwe i Nyanza ya Butare aho yari yahungiye, gusa ngo umuryango we ukaba ugishengurwa bikomeye n’uko kugeza magingo aya utarabona aho umubiri we wajugunywe ngo nabo bamushyingure mu cyubahiro baruhuke.

Sandrine Isheja mu butumwa burebure yanditse ku rukuta rwe rwa Instagram yavuze ko intimba yo kuba yarabuze umubyeyi itarashira ndetse ko hari igihe ajya amwikanga ari kugenda mu nzira ibintu birushahok kumushengura umutima.

Yatangiye agira ati "Imyaka 25 irashize Genocide yakorewe abatutsi muri 1994 ibaye mu Rwanda. Imyaka 25 irashize koko?! Iyi ntimba mu mutima ntaho ijya, mpora nkwikanga mu nzira, iteka ngira ngo ndakurabutswe nakwiterera ngo nze nguhobere nkabona ntiyari wowe."

"Data, Dr Butera Guillaume, wakundaga abantu, wangaga umugayo, wavuye bose utarobanura ariko ntibyabujije wa musirikare twari duturanye ku Kabeza, kwanga kuduhisha igihe watujyanagayo Genocide igitangira wibwira ko ineza iri bwiturwe indi."

Buri gihe ntangazwa n’ubutwari bwawe ndetse n’ubunyamwuga wagaragaje ubwo yangaga kuduhisha ariko kuko yararwaye zona akubaza icyo yakorera ibisebe yarafite maze nawe umuvura utazuyaje. Warakoze kutubera urugero rwiza rwo kuba umunyamwuga mubyo ukora, ugakora icyo utegerejweho nta shimwe utegereje.

Papa, ndagukumbuye. Numvise ngo wiciwe I Nyanza ya Butare, buri mwaka tujyanayo indabo nubwo kugeza uyu munsi tutarabona umubiri wawe ngo tugushyingure mu cyubahiro.

Papa, burya cya gihe tumaze gutandukana I Gahanga ubwo twakwirwaga imishwaro ugakomezanya na basaza banjye, Shema na Éloge, njye nkajyana na mama warumpetse ku mugongo, nawe twaje gutandukana buri wese akomeza inzira y’umusaraba ye. Twese twaje kongera kubonana mu buryo bw’igitangaza gikomeye, ibyo mbishimira Imana nubwo wowe nguheruka burya.

Iyo menya ko ari ubwa nyuma nari kuguhobera sinkurekure, nari kumva ijwi ryawe nkaribika kure mu mutima wanjye, nari kukureba cyane isura yawe, impumuro yawe nkabibika aho bitazigera bisibama.

Éloge imfura yawe ubu abyaye 2, hungu na kobwa. Ni umugabo w’intwari yatubereye aho utari.

Ubuhanga n’ubupfura wamutoje byamukinguriye imiryango kugera no mu mahanga. Shema wakundaga cyane yabaye wowe neza neza, gucisha macye, gukunda abantu, gusetsa no kwitanga bimuranga nibyo bikutwibutsa, nawe arubatse, afite umuhungu mwiza witonda nka se.

Papa, nanjye wasize mfite imyaka 6 ubu ndubatse, nitwa maman Imena. Umuhungu wanjye akunda gusoma nkanjye nawe, Papa. Nubwo atarabasha kwisomera aragenda agatora igitabo mu kabati akanzanira ngo musomere, nzi neza ko mwari kujya mugirana ibihe byiza iyo uza kuba ukiriho. BUTERA...BUTERA...BUTERA, izina ryawe ntirizazima tukiriho!"

Dr Butera Guillaume wabyaraga Sandrine Isheja yishwe muri Jenocide yakorewe Abatutsi muri Mata 1994


INKURU ZA :
Tanga Igitekerezo
Ibitekerezo 4
JEAN MARIE Nshimiyimana Kuya 14-04-2019

yooo sandiri mukomeze kwihangana wowe numuryango wawe wose,knd natwe tubarinyuma twibuka abo baziranenge bazize uko bavutse, knd twizeyeko kumunsi wumuzuko tuzabonana nabacu twabuze kd tubakunda

dieuonne Kuya 9-04-2019

ARKO C MANA WARURIHE KOKO KOMERA NSHUTI YANJYE AHO ARI ARAGUTEGEREJE HUMURA NITWIZERA TUZAMUSANGAYO I LOVE U

Eric Kuya 8-04-2019

Yooooo ihangane cyane disi nubwo batashatse ko mubaho muriho kandi mwarashibutse. Gusa Imana yumva gusenga kwacu ice inzira umubiri we uzaboneke. Ndagukomeje n’umuryango wawe wose

Patrick Kuya 8-04-2019

Umuryango wa Butera nywuzi nyuma ya Jenoside duturanye i Nyamirambo, Sandrine muzi ari umwana muto cyane uteye ubwuzu. We na basabe Valentin na Christian ni abana bari bafite indero badasuzugura abana baciriritse nkuko byabonekaga ko bava mu muryango wifashije, sinamenye Dr Butera ariko ubugwaneza nabonanye abana be binyemeza ko yari umugabo ukunda abantu kandi ugira urugwiro. Kuri sandrine, jya wishimira ko utaheranywe n’agahinda Kandi ukomeze urukundo n’ubupfura bya Dr Butera kuko nicyo yakwifurizaga. Humura arasinziriye ariko ujye ugira ibyiringiro ko ku munsi w’umuzuko tuzabona abo twakundaga.

English
IGURIRE
Reba Ibindi Byinshi
konka Monaco
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...