AMAKURU

UKWEZI
Canal+ christmax

Umunyamakuru Ernesto Ugeziwe yatangije ikiganiro kizaba ikiraro gihuza aba-Diaspora n’igihugu cyabo

Umunyamakuru Ernesto Ugeziwe yatangije ikiganiro kizaba ikiraro gihuza aba-Diaspora n’igihugu cyabo
14-10-2020 saa 10:04' | By UKWEZI | Yasomwe n'abantu 1759 | Ibitekerezo

Umunyamakuru Ugeziwe Ernest wamamaye nka Ernesto yashyize hanze integuza y’ikiganiro ‘My Voice Podcast’ kigiye kuba ikiraro gihuza abanyarwanda baba mu mahanga by’umwihariko muri Leta Zunze Ubumwe za Amerika, Canada n’I Burayi n’itangazamakuru ndetse n’abanyarwanda bari imbere mu gihugu muri rusange.

Uyu munyamakuru yakunzwe cyane mu biganiro binyuranye kuri Televiziyo y’Igihugu, RTV no kuri Magic FM aho yakoraga mbere gato y’uko yerekeza muri Leta Zunze Ubumwe za Amerika kwiga icyiciro cya Gatatu cya Kaminuza [Master’s].

Yavuye mu Rwanda ku wa 19 Gashyantare 2016 aho yari agiye kwiga muri Kaminuza ya Charlotte State University mu Mujyi wa Charlotte mu Ntara ya North Carolina, akaba yarigagayo ibijyanye na ’Art and Media’ by’umwihariko ’Tv and Radio Production’.

Ernesto, nk’umwe mu bashyize itafari ku iterambere ry’itangazamakuru ry’imyidagaduro mu Rwanda yahisemo gutangiza ‘My Voice Podcast’ nk’ikiganiro kizajya kigera ku banyempano b’abanyarwanda bari muri Diaspora, baba ababarizwa mu myidagaduro, abashoramari bashaka kumenyekanisha ibikorwa byabo mu Rwanda n’abandi bantu bafite impano zitandukanye.

Podcast ni uburyo bw’itangazamakuru rigezweho ryifashisha ikoranabuhanga mu kugeza amakuru ku bantu hifashishijwe imbuga zirimo YouTube, Amazon, Spotify, Tune In n’izindi zitandukanye.

Integuza ya My Voice Podcast

Mu kiganiro yagiranye na UKWEZI yavuze ko yatekereje iki kiganiro nk’uburyo bwo korohereza abanyarwanda baba muri Diaspora kugeza ibikorwa byabo ku banyarwanda bari mu gihugu bitabasabye gufata indege ngo baze I Kigali.

Ati “Nabonye ko bakeneye urubuga rwo kumenyekanisha ibintu byabo batiriwe baza mu Rwanda, icyo nicyo nshaka gukora hari abantu b’abanyarwanda bafite ubumenyi rusange bafite ibintu bitandukanye. Nzagerageza kujya mu bintu bitandukanye kugira ngo buri wese abashe kwiyumvamo. Birumvikana nzajya nibanda ku myidagaduro kuko ariyo abantu bamenyemo cyane.”

Ernesto avuga ko igitekerezo cyo gutangira iki kiganiro yakigize mu 2017, ubwo yari umunyamakuru ku Ijwi rya Amerika, ubwo yabonaga ibyo akora bidahura neza n’ibyo akunda ndetse amaze kugira ubumenyi mu bijyanye n’itangazamakuru ariko rigezweho ryifashisha ikoranabuhanga.

Ati “Ubwo nibwo nagize iki gitekerezo ndavuga nti iki nicyo gihe cyo kuba nakora ibyo nkunda kandi bizagira umumaro ku banyarwanda benshi cyane by’umwihariko abankunze nkibarizwa mu myidagaduro.”

Uyu musore yavuze ko iki kiganiro kizajya gitegurwa binyuze mu kigo cyitwa ‘Kalisimbi Entertainment Events’ yashinzwe nawe afatanyije n’undi munyarwanda uba muri Amerika aho byitezwe ko uretse ibiganiro bateganya kujya bakora n’ibindi bikorwa birimo gutegura ibitaramo.

Ugeziwe Ernesto kuri ubu abarizwa muri Leta ya Texas ari naho afite Studio izajya itunganyirizwamo ibi biganiro.

Avuga ko iki kiganiro azajya agikora nyuma y’akazi akora buri munsi mu rwego rwo gukomeza gutanga umusanzu ku gihugu cye nk’umuntu cyareze kandi akajya kwiga muri Amerika abikesha ko abanyarwanda bamukunze mu itangazamakuru.

Ati “Urumva ni ugutanga umusanzu wanjye ku gihugu cyanjye by’umwihariko ku itangazamakuru ariko nanone bikazajya bimfasha guhora hafi y’igihugu cyanjye.”

Iki kiganiro n’ibindi bikorwa bya Kalisimbi Entertainment Events bizajya binyuzwa kuri YouTube Channel yitwa My Voice Podcast Rwanda ndetse no ku zindi mbuga nkoranyambaga za Ernesto Ugeziwe.

Integuza ya My Voice Podcast


INKURU ZA :
Tanga Igitekerezo
Ibitekerezo
canal Rwanda
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA