AMAKURU

UKWEZI
cheno 2020

Ubukangurambaga bwa ‘Gerayo Amahoro’ bugiye kubangikanywa na ‘Rengera Umwana’

Ubukangurambaga bwa ‘Gerayo Amahoro’ bugiye kubangikanywa na ‘Rengera Umwana’
21-01-2020 saa 23:11' | By Nsanzimana Ernest | Yasomwe n'abantu 511 | Ibitekerezo

Polisi y’ u Rwanda yatangaje ko ubukangurambaga bwo gukangurira abaturarwanda kwirinda impanuka zo mu muhanda bwiswe ‘Gerayo Amahoro’ bugiye gukomezanya n’ubwo guhananira iyubahirizwa ry’uburenganzira bw’umwana bwise ‘Rengera umwana’.

‘Rengera umwana’ buzatangira muri iki cyumweru nk’uko Umuyobozi wungirije wa polisi y’u Rwanda mu ntara y’ amajyepfo Senior Superintendent Nshuti Athanase yabitangarije abakirisito bo mu itorero Anglican, cathedrale ya Saint Paul y’i Butare ku Cyumweru tariki 19 Mutarama ubwo yabagezagaho ubutumwa bwa Gerayo Amahoro buri gutangirwa mu nsengero.

Yagize ati “Hari ubundi bukangurambaga polisi yateguye bwo kurengera abana, buzatangira mu cyumweru gitaha, ni ubukangurambaga bufite insanganyamatsiko igira ngo ‘rengera umwana’”

Mu butumwa buzibandwaho mu bukangurambaga bwa Turengere umwana harimo kurinda abana imirimo ivunanye nko kubakoresha mu birombe na kariyeri, n’ubwo kurwanya ihohoterwa rikorerwa abana nko kubasambanya.

SSP Nshuti, mu butumwa bwo kwirinda impanuka yasabye abana kwirinda gukinira mu mihanda, kutagenda mu modoka bahagaze no kwirinda kujya munsi y’ imodoka zihagaze kuko shoferi ashobora kwatsa imodoka atibutse kureba munsi yayo agakandagira umwana uri munsi yayo.


SSP Nshuti Athanase na Musenyeri Nassan Gasatura

Polisi y’u Rwanda isaba abashoferi kujya birinda gutwara imodoka basinze, bavugira kuri telefone cyangwa bagendera ku muvuduko urenze uwemewe.

Umuvugizi wa Polisi y’ u Rwanda mu Ntara y’Amajyepfo CIP Twajamahoro Sylvestre yavuze ko ubukangurambaga bwa Gerayo Amahoro bwagabanyije impanuka ho 30%.


Umuvugizi wa Polisi y’u Rwanda mu Ntara y’ Amajyepfo CIP Twajamahoro Sylvestre

Yagize ati “Ubu tugeze mu cyumweru cya 36 cya Gerayo Amahoro ni icyumweru kigiye kuzajya gihura na Rengera umwana, icyumweru kimwe dushobora kuzajya tugiharira Rengera Umwana igikurikiyeho tukagiharira Gerayo Amahoro”.

Gerayo Amahoro ni ubukangurambaga buzamara ibyumweru 52, kuba buzajya busimburana na Rengera Umwana bizatuma butinda kurangira kuko icyumweru kizaharirwa ubwa ‘Rengera Umwana’ kitazabarwa mu byumweru bya Gerayo Amahoro.

Nassan Gasatura, Umushumba w’ itorero Anglican mu Rwanda Diyosezi ya Butare avuga ko kuba ubukangurambaga bwa Gerayo Amahoro busigaye bukorerwa no mu nsengero ari byiza kuko n’ubundi mu nsengero higishwamo ubutumwa bwa Yesu Christo, ati “Yesu niwe gikomangoma cy’amahoro”.

Musenyeri Gasatura avuga ko basanzwe bibutsa abakirisito babo kubahiriza amategeko ya Leta ati “Tubibutsa gutanga mitiweri, kohereza abana mu mashuri n’ ibindi byose, ubu rero badutije umubyizi tuzakomeza”.

Gasatura asanga abanenga kuba Polisi iri gutangira mu nsengero ubutumwa bwo kurengera umwana no kwirinda impanuka bibeshya kuko abakirisito ari abaturage ba Leta.

Mariya Mukakarema w’imyaka 65 usengera muri Anglican Diyosezi ya Butare yabwiye UKWEZI ko bashimishijwe n’ubutumwa bwa Gerayo Amahoro baherewe mu rusengero.

Yagize ati “Twabyakiriye neza kuko harageze kandi birakenewe, ikindi kuva byatangira bitanga umusaruro nta mpanuka nyinshi zigikunda kuba. Abashoferi nabasaba kwirinda umuvuduko ukabije no kudatwara ibinyabiziga basinze”.

Ukobizaba Jean Paul asanga kuba Polisi y’u Rwanda iri gusanga abakirisito mu nsengero ikabaganiriza kuri gahunda ya Rengera umwana na gahunda ya Gerayo Amahoro bizatuma Abaturarwanda na Polisi bagira imikoranire myiza.

Yagize ati “Abatwara ibinyabiziga batinya abapolisi bashinzwe umutekano wo mu muhanda cyane ariko hari intambwe iri kugenda iterwa, uko bagenda batera intambwe babegera bagenda babatinyuka ariko ubundi wasangaga babatinya”.

Abayoboke b’itorero Anglican mu Rwanda kuva ku bayobozi baryo kugera ku bakiristo baryo bafite icyizere ko ubu bukangurambaga bwa Gerayo Amahoro buzagabanya impanuka ku kigero cyo hejuru.

Ubukangurambaga bwo kurengera umwana buje mu gihe buri mwaka abangavu ibihumbi 18 baterwa inda, Polisi y’ u Rwanda n’ubuyobozi bwa Anglican mu Rwanda barasaba ababyeyi kuba hafi y’abana babo bakareka kubaharira abakozi bo mu ngo.


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...