konka coffee
KONKA

AMAKURU

UKWEZI
Minijust

‘U Rwanda ruri kugerageza kugera ku iterambere nk’ iry’ u Buyapani’ Perezida Kagame

‘U Rwanda ruri kugerageza kugera ku iterambere nk’ iry’ u Buyapani’ Perezida Kagame
9-01-2019 saa 13:58' | By Nsanzimana Ernest | Yasomwe n'abantu 1223 | Ibitekerezo 1

Perezida w’ u Rwanda Paul Kagame yagaragaje ko u Rwanda ruri gukora ibishoboka byose ngo ruve mu bihugu biri mu nzira y’ amajyambere rugere mu cyiciro cy’ibihugu byateye imbere birimo n’u Buyapani.

Yabitangaje kuri uyu wa Gatatu, tariki 9 Ukuboza 2019 ku munsi wa Kabiri w’ uruzinduko rw’ akazi mu Buyapani, ubwo yagezaga ijambo ku nama y’ ihuriro ry’ ubukungu n’ imikoranira hagati y’ u Rwanda n’u Buyapani.

Perezida Kagame yavuze ko u Rwanda rwabanje gusuzuma ibibazo birwugarije rureba icyo rwakora ngo ruve muri ibyo bibazo. Yagaragaje ko ubu ikirimo gukorwa ari ugushyira mu bikorwa ibyo rwiyemeje kugira ngo ruve mu bihugu biri mu nzira y’ amajyambere rwinjire mu bihugu bikize nk’u Buyapani.

Yagize ati “Twahisemo ibitubereye tugomba gukora kugira dukomeze gutera imbere kugeza ku rwego Ubuyapani n’ ibindi bihugu byateye imbere bariho uyu munsi. Mu yandi magambo turagerageza kubashyikira, tubifashijwemo n’ ibyo bihugu n’ abantu dukorana nabo”

Kimwe mu bigaragaza ko igihugu cyateye imbere ni uko umuturage wacyo aba atungwa n’ amadorali 12 ku munsi. Kugeza ubu Umunyarwanda ntabwo aragera ku rwego rwo gutungwa n’ amadorali arenze abiri ku munsi.

Perezida Kagame yashishikarije abashoramari b’ Abayapani gushora imari mu Rwanda abizeza ko u Rwanda ruzakora ibishoboka byose bagakora ishoramari ryabo batabangamiwe.

Ikigo cy’ Igihugu cy’ Iterambere RDB cyeretse abashoramari b’ Abayapani imwe mu mishanga u Rwanda rufite harimo n’ umushinga wa Kigali Innovation City.

Perezida Kagame ati “Hano hagaragajwe umushinga wa Kigali Innovation City ugamije kuzamura ubukungu bushingiye ku ikoranabuhanga. Dukeneye ibigo by’ ishoramari by’ Abayapani n’ abafatanyabikorwa kubera ubunararibonye n’ ubushobozi babifitemo”

Ibyo kuba u Rwanda rworohereza abifuza gushora imari mu Rwanda binabonwa n’ amahanga kuko raporo ya 2018 ya Banki y’ Isi yashyize u Rwanda ku mwanya wa 30 ku Isi mu bihugu byorohereza abashoramari no ku mwanya wa kabiri muri Afurika.

Perezida Kagame yagize ati “Ndashaka kubizeza ko guverinoma y’ u Rwanda tuzakomeza gukora ibishoboka byose kugira ngo dukurireho imbogamizi kandi dufatanye n’ abashoramari”

Perezida Kagame yavuze ko nubwo imibare igaragaza ko u Rwanda ruhagaze neza ngo ibi ntabwo bihagije ahubwo bitera Abanyarwanda inyota yo kurushaho gukora cyane.

U Rwanda n’ Ubuyapani bifitanye umubano mwiza n’ imikoranire mu byerekeranye n’ uburezi, ubucuruzi n’ ibindi.


INKURU ZA :
Tanga Igitekerezo
Ibitekerezo 1
gatera Kuya 10-01-2019

Ibyo president wacu avuga nibyo.Nitwigana JAPAN mu gukora,tuzatera imbere,nubwo bizatwara igihe kinini kugirango dufate Japan.Gusa twe kuzabigana mu byerekeye gusenga.Japanese benshi ntabwo bemera Imana dusenga cyangwa Yesu.Muli Yohana 3.umurongo wa 16,havuga ko umuntu wese utemera Yesu atazabona ubuzima bw’iteka.Bisobanura ko atazazuka ku munsi wa nyuma.Ni Yesu ubwe wabivuze muli Yohana 6 umurongo wa 40.

English
IGURIRE
Reba Ibindi Byinshi
konka Monaco
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...