AMAKURU

UKWEZI
ubumwe

Nyaruguru: Ibibanza byo mu isoko ryatwaye miliyoni 900 byabaye bike

Nyaruguru: Ibibanza byo mu isoko ryatwaye miliyoni 900 byabaye bike
12-09-2019 saa 06:08' | By Nsanzimana Ernest | Yasomwe n'abantu 2189 | Ibitekerezo 1

Abacuruzi bo mu murenge wa Kibeho mu karere ka Nyaruguru barasaba ko Leta yabubakira irindi soko nyuma y’ uko imyanya yo mu isoko rya kijyambere ryubatswe muri uyu murenge ibaye mike.

Ababonye ibibanza muri iri soko rya kijyambere ‘Kibeho Modern Market’ bavuga ko iri soko rije kubaruhura ingendo ndende bakoraga bajya guhahira mu mujyi wa Huye.

Bavuga kandi ko amafaranga y’ itike bakoreshaga bajya guhahira mu mujyi wa Huye bazajya bayongera ku mafaranga yo guhahisha bagahaha byinshi.

Ahubatswe iri soko ni hafi yo ku ngoro ya Bikira Mariya I Kibeho, ryubatswe muri gahunda y’ umushinga mugari wiswe ‘Kibeho Modern Market and Car Parking’.
Umwe mu batashoboye kubona ikibanza muri iri soko yagize ati “Ntabwo dukwiriwe bamwe babuze ibibanza. Murabibona namwe ahantu aho bari uburyo bagiye batombora babuze ibibanza. Bivuga y’ uko Leta ikwiriye kongera ikubaka irindi ku ruhande kugira ngo n’ abacikanywe babone aho bajya”.

Umunyamabanga Nshingwabikorwa w’ Akarere ka Nyaruguru Ruzima Serge yavuze ko yatunguwe n’ ubwinshi bw’ abitabiriye kwaka ibibanza muri iri soko, gusa ngo nk’ akarere bagiye kwicara bashake icyo bafasha abatashoboye kubona ibibanza muri iri soko.

Yagize ati “Abantu twari twiteze babaye benshi ku buryo hari abifuje ko twakubaka hangari ahangaha mu mpande z’ isoko tugiye gusuzuma ikifuzo cyabo kuko igishushanyo mbonera cy’ iri soko ni uku cyari giteye turebe niba bishoboka tuzabasubize, cyokora hari amahirwe menshi ko twakwagura isoko kuko twabonye benshi babyifuza”.

Imwe mu mpamvu zatumye abashaka ibibanza muri iri soko baba benshi cyane ni uko amazu y’ ubucuruzi yari hafi y’ umuhanda Huye –Kibeho urimo gushyirwamo kaburimo yagonzwe n’ imirimo yo kwagura uyu muhanda akaba agomba gusenywa.

Isoko rya kijyambere ry’ Akarere ka Nyaruguru ryatangiye kubakwa mu mwaka wa 2015, ryakagombye kuba ryaruzuye muri 2017. Ryuzuye muri uyu mwaka wa 2019 ritwaye amafaranga y’ u Rwanda asanga miliyoni 900. Iri soko rifite ibyumba 60.


Inyuma y’ iri soko hubatswe gare nshya yo gutegeramo imodoka


INKURU ZA :
Tanga Igitekerezo
Ibitekerezo 1
bimawuwa Kuya 12-09-2019

akarere gakorera abaturage bako icyo kakora ubu nuko habaho imyanya muri ryo soko iyo bazajya basaranganya na bandi itagomba gutangwa ku muntu umwe permanent umwe akajya ahabwa umunsi umwe undi nawe aahabwa undi bakajya basimburanwa gutyo ariko ndavuga bamwe baba bafite ibicuruzwa bicicirtse.

English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...