AMAKURU

UKWEZI
pax

Nabo baritinyutse : Ubuhamya budasanzwe bw’abagore bayobotse umwuga wo gutwara imodoka nini za RITCO

Nabo baritinyutse : Ubuhamya budasanzwe bw’abagore bayobotse umwuga wo gutwara imodoka nini za RITCO
29-07-2020 saa 13:45' | By Akayezu Jean de Dieu | Yasomwe n'abantu 4520 | Ibitekerezo

Mu myaka mike ishize ubwo urugamba rwo guteza imbere ihame ry’uburinganire n’ubwuzuzanye bw’umugabo n’umugore rwatangiraga hari ababifataga nk’inzozi kumva ko igihe kizagera umukobwa cyangwa umugore akaba umukanishi cyangwa agatwara imodoka.

Ibi byumvikane neza ko mbere ya Jenoside yakorewe Abatutsi mu 1994, iyi ari imwe mu mirimo yafatwaga nk’iy’abagabo ku buryo umukobwa wagiraga inzozi zo kuyikora abantu bamwamaganiraga kure.

Uretse abamwegereye barimo abo mu muryango we ariko n’ubuyobozi ubwabwo ntabwo bwemeraga ko umukobwa yashobora imwe muri iyi mirimo.

Kuri ubu hari intambwe imaze guterwa ku buringanire ahanini usanga ijyana n’ubushake bwa politiki n’ubuyobozi bwiza ari byo byatumye hashyirwaho amategeko, politiki, gahunda n’inzego z’ubuyobozi zishinzwe by’umwihariko kubahiriza iryo hame.

Uwo musingi ukomeye uhera ku Itegeko Nshinga nk’uko nabikomojeho, watumye havugururwa amategeko hakurwaho ivangura n’ubusumbane byagaragaraga mu mategeko yariho mbere ya 1994, atarahaga uburenganzira umugore kuko hari byinshi atemererwaga gukora ndetse n’ibyo yari yemerewe gukora byashingiraga ku bushake bw’umugabo, bikadindiza iterambere ry’igihugu.

Itegeko Nshinga rya Repubulika y’u Rwanda ryo muri 2003, ryavuguruwe muri 2015, ritegenya ko mu nzego zifata ibyemezo, umubare w’abagore ugomba kuba byibuze 30%. Ibi ntabwo biba mu nzego za leta gusa kuko no mu bigo byigenga usanga guverinoma ikomeza gushishikariza abagore kwitinyuka nabo bagahatanira iyo myanya.

Raporo ya Africa Gender Index Report 2019, yashyize u Rwanda ku mwanya wa mbere muri Afurika nk’igihugu cyo kuri uyu mugabane gifite abagore benshi mu nzego zifata ibyemezo, runaza ku mwanya wa kane muri rusange mu kugira ubusumbane buri ku gipimo hasi hagati y’abagore n’abagabo.

Muri rusange abagore bari muri Guverinoma kuri ubu ni 53.6% mu gihe abari mu Nteko Ishinga Amategeko ari 61%.

Abagore baritinyutse !

Inkuru z’ubuhamya bw’abagore biteje imbere cyangwa batinyutse imirimo imwe yafatwaga nk’iy’abagabo zimaze kumenyerwa ku buryo abagore basigaye babarizwa mu mirimo yo gutwara abagenzi mu buryo rusange.

Niba ujya ukoresha imodoka z’ Ikigo cyitwa RITCO Ltd (Rwanda Inter-Link Transport Company), ushobora kuba waragiye mu modoka nini itwawe n’umugore.

By’umwihariko muri iki kigo cya RITCO harimo abagore batatu batwara abagenzi muri izi modoka nini [ubusanzwe zigira ubwoko bune ; Yutong, Higger, Suzu na Coaster].

Muri rusange muri iki kigo hari abakozi 384 barimo abagore 106, hakabamo kandi abagore batatu batwara imodoka nini zijya mu bice bitandukanye by’igihugu.

Aba bagore batatu aribo Mukantazinda Claudine, Ntabomvura Marie Rosine ndetse na Mukagihana Ernestine baganiriye na UKWEZI, bagaruka ku buryo bitinyutse bagashaka ibyangombwa byo gutwara imodoka kugeza kuri D1, ari nayo ibaha ubushobozi bwo gutwara bisi nini.

Bose bahuriza ku kuba ubwo batangiraga urugendo rwo gushaka ibyangombwa byo gutwara byari ibintu bitavugwaho rumwe kugeza n’ubwo na bamwe mu bantu ba hafi yabo babacaga intege ariko abo bose baje kugera nyuma babona ko bishoboka ahubwo batangira kubashyigikira.

Mukantazinda ufite ibyangombwa byo gutwara bizwi nka ‘Categories’ za B, C, D na D1, avuga ko yazikoreye mu gihe cy’imyaka ine abifashijwemo no kuba akimara kubwira iwabo ko ashaka kuzatwara imodoka baramushyigikiye.

Ntabomvura we afite eshanu zirimo A, B, C, D na D1 avuga ko ajya gutangira kuzishaka yatewe imbaraga n’umupolisi wamubwiye ko naramuka akomeje urugendo azagera kuri nyinshi.

Ku rundi ruhande Mukagihana we afite B, C, D na D1.

Aba bose ni abagore bubatse kandi bamaze igihe kinini batwara izi modoka nini kuko umaze igihe gito amaze imyaka 10.

Mukagihana ati “Maze imyaka 13, muri Ritco mazemo 12 ariko tugitangira aka kazi wasangaga abantu benshi batinya abandi kababyishimira cyane bakavuga bati umubyeyi ni gute yatwara imodoka nini, ku buryo kubatwara babanzaga kugira ubwoba ariko nakwatsa imodoka babona uburyo mbatwaye neza bakishima ku buryo n’ubutaha bagaruka kunshaka ngo abe arinjye ubatwara.”

Mukantazinda yagize ati “Mu gutangira bibanza kukugora kubera ko umuntu aba agitangira akazi ariko nyuma naje kumenyera. Iyo abantu bakikubona ari ubwa mbere bagira impungenge ariko iyo babonye uko utwara bahita bakugirira icyizere.”

Aba bagore bavuga ko ubwo bazaga gusaba akazi muri Ritco nta mbogamizi zijyanye no kuba bagirirwa icyizere gike n’umukoresha wabo kuko bazanye ibyangombwa bagakora ibizamini nk’abandi kandi bakabitsinda.

Bagira inama bagenzi babo bakiri bato kwitinyuka nabo bagakurikira inzozi zabo kandi by’umwihariko bagahera ku mirimo bumvaga ko yagenewe abagabo kuko abagore nabo bayishobora.

Imyitwarire yabo mu kazi ni nta makemwa !

Ubusanzwe muri kamere ya muntu bizwi ko abagore aria bantu bakundwa cyane by’umwihariko ku bakora mu bijyanye no gucuruza serivisi usanga abagore aribo bagira abakiriya benshi ugereranyije n’abagabo.

Ntabomvura avuga ko kugeza ubu hari abantu benshi usanga baza aho Ritco zihagurukira bashaka ko batwarwa n’aba bagore kubera ko bashimye serivisi zabo n’uburyo babatwara neza.

Umuyobozi Mukuru wa Ritco, Nkusi Godfrey nawe ni umwe mu bashima imyitwarire y’aba bagore mu kazi akavuga ko bagize amahirwe muri iki kigo bagiramo abagore benshi by’umwihariko abatwara abagenzi.

Yagize ati “Nkunda gufata umuntu nk’undi, abagore nabo rero ni abakozi nk’abandi urabona rero twe ducuruza serivisi ku buryo usanga bakundwa n’abakiriya cyane kurenza abagabo, ikindi nanone usanga imodoka bazifata neza ku buryo nk’ibyo imodoka ikenera birimo amavuta inywa n’ibindi biba ari bike ugereranyije n’abagabo.”

Uyu muyobozi avuga ko ugereranyije n’abagabo, usanga abagore batagira impanuka ku buryo nk’umwaka ushize umugore wakoze impanuka kari akantu gato cyane ko kuba imodoka yari irimo isubira inyuma igongaho akantu gato.

Ati “Iyo urebye usanga umwaka wabo urangira nta mpanuka n’imwe bakoze. Twe twifuza ko iyaba twabonaga benshi byaba ari amahirwe.”

Umuyobozi wa Ritco avuga kandi ko ibijyanye n’imyitwarire, abagore bitwara neza kubera ko nk’iyo bakoze barara ku rugendo usanga badashobora kurara mu kabari cyangwa ngo bajye mu yindi mico mibi ishobora kubangamira akazi kabo.

Ubuyobozi bwa RITCO bushimangira ko ibijyanye n’uburyo abagore bashobora kwitabwaho nko guhabwa ikiruhuko mu gihe bagiye kubyara n’ibindi bikorwa nk’uko amategeko agenga umurimo abiteganya mu Rwanda.

Kugira ngo umukozi yaba umugore cyangwa umugabo ahabwe akazi ko gutwara imodoka cyangwa akandi kose muri Ritco, akora ibizamini byanditse ndetse hakaba n’ibindi bizamini bijyanye no gutwara imodoka. Muri rusange umwaka ushize hakoze umugore umwe watsinze ikizamini cyanditse agiye mucyo gutwara aratsindwa.

Reba hano ikiganiro twagiranye n’Umuyobozi wa Ritco

Reba hano ikiganiro twagiranye n’abagore batwara imodoka nini za Ritco


INKURU ZA :
Tanga Igitekerezo
Ibitekerezo
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA