konka coffee
KONKA

AMAKURU

UKWEZI
ubumwe

Muhanga: Ububumbyi bw’amatafari n’akazi ko mu ngo ku isonga mu birarura abana bagata amashuri

Muhanga: Ububumbyi bw’amatafari n’akazi ko mu ngo ku isonga mu birarura abana bagata amashuri
26-03-2019 saa 12:50' | By Vincent Nsengiyumva | Yasomwe n'abantu 528 | Ibitekerezo

Utembereye mu bice byinshi byo mu Karere ka Muhanga usanga abana bakiri bato bazerera mu Mujyi abandi bari mu mirimo inyuranye mu bice by’ibyaro nk’ububumbyi bw’amatafari n’ibindi mu gihe abandi baba bari mu mashuri.

Ikibazo cy’abana bataye amashuri kigaragara cyane iyo ugeze mu gishanga cya Nyabigono kiri hagati y’utugari twa Mbare na Mubuga two mu Murenge wa Shyogwe, mu Karere ka Muhanga ahari abana bakiri bato bahakora imirimo inyuranye irimo ububumbyi bw’amatafari no kuyatunda.

Uretse aba bagaragara mu gishanga bahakora iyi mirimo yo kubumba amatafari, hari n’abandi usanga mu mihanda yo mu Mujyi bakora imirimo inyuranye irimo gusabiriza n’abakora imirimo yo mu rugo.

Bamwe mu bana bataye amashuri muri Muhanga baganiriye na Ukwezi.com bahuriza ku kibazo cy’amikoro make y`imiryango yabo, bagahamya ko aricyo gituma bata amashuri bakajya gushakisha imibereho.

Umunyamakuru wa Ukwezi.com yatemberereye mu gishanga cya Nyabigono kiri mu murenge wa Shyogwe ahakorerwa imirimo y’ububumbyi bw’amatafari ahasanga abana bahakora imirimo inyuranye kandi bakagombye kuba bari mu mashuri.

Abantu bageze muri iki gishanga batabazi, abo bana batangira gukeka ko ari abo mu nzego z’ubuyobozi cyangwa iz’umutekano zibakurikiranye, bagatangira gukemerana, bagahungira mu ishyamba bajya kwihisha, bakagaruka nyuma bamaze kwizera neza ko ntawe ubakurikiranye.

Umunyamakuru wa Ukwezi yaganiriye n’abo bana, bose bahuriza ko kuba barataye amashuri byatewe n’ubukene bwo mu miryango baturukamo.
Uwitwa Murwanashyaka Felecien uvuga ko afite imyaka 18 ariko ugereranyije afite nk’imyaka 15 cyangwa 16, amaze umwaka urenga akora ububumbyi bw’amatafari. Yataye ishuri muri 2018 ubwo yari asoje umwaka wa 3 w’ayisumbuye.

Avuga ko ibyo kuba atarakomeje amashuri bitamuteye ikibazo kuko ngo n’ubundi yigaga kugira ngo azabone akazi, none ubu ngo akaba agafite.

Yagize ati “Narize ngera mu wa gatatu w’amashuri yisumbuye. Nagize ikibazo cy’ubushobozi buke nza kwishakira amafaranga. Aka kazi kamfasha kwibeshaho nkaba ntirirwa nkora mu mifuka y’abakire. Nkorera nka 1500 frw ku munsi. Nabonye ubundi narashoboraga kurangiza simbone akazi mpitamo kuza kwishakira akazi hano kandi imbaraga ndazifite, ndakora, nkabona amafaranga.”

Uwitwa Urinzwenimana Evode wo mu Kagari ka Mbare mu Murenge wa Shyogwe avuga ko yagarukiye mu mwaka wa Gatandatu w’amashuri abanza aratsinda abura amafaranga y’ishuri ahita ashoka iki gishanga kwishakira amafaranga.

Ati “ Natsinze ikizamini cy’amashuri abanza mbura amafaranga anjyana ku ishuri kubera ubushobozi buke bw’ababyeyi. Nabonye kubaho nta kazi bitanyorohera nza hano gushaka amafaranga. Umunsi ababyeyi bazagira ubushobozi nzajya kwiga kuko ubwenge mbufite.”

Uretse kuba hari abana bakora imirimo aho babumba amatafari mu gishanga cya Nyabigono, hari n’abana birirwa bazerera mu mujyi wa Muhanga basabiriza abahisi n’abagenzi, aho abenshi muri bo bavuga ko babiterwa n’ubukene bwo mu miryango bavukamo.

Umuyobozi ushinzwe ishami ry’ubuzima mu Karere ka Muhanga, Umutoniwase Kamana Sostene, avuga ko mu bushakashatsi bwakozwe mu karere ka Muhanga mu mwaka wa 2017 bwagaragaje ko abana 4468 bo mu mashuri abanza n’ayisumbuye bataye amashuri.

Gusa ngo mu Ugushyingo 2018 hagaragajwe ko abamaze gusubizwa mu ishuri bagera kuri 817 binyuze mu bukangurambaga buri gukorwa n’ubuyobozi bw’akarere.

Yagize ati “Abana bakora imirimo yo mu birombe, kubumba amatafari n’indi mirimo nk’iyo akenshi ni ababa barataye amashuri. Hari gahunda yo guhana abakoresha abana bataruzuza imyaka y’ubukure. Icyo dukora nk’ubuyobozi ni ukubakurikirana bagasubizwa mu mashuri kuko bitemewe kubakoresha.”

Kamana Sostene akomeza avuga ko ibiri ku isonga mu bituma abana bata ishuri harimo kujya gushaka amafaranga, bagahitamo kujya gukora akazi ko mu rugo, kujya mu birombe ahacukurwa amabuye y’agaciro, imicanga n’amabumba ndetse n’abajya mu mujyi wa Kigali.

Mu biganiro imiryango itegamiye kuri Leta ‘Save the Children’ na ‘Vision Media Organisation’ yagiranye n’abanyamakuru ku bibazo bitandukanye bikigaragara mu bana, hagaragajwe ko mu mpamvu zituma abana bata amashuri harimo ubukene bw’ababyeyi, imyumvire ikiri hasi, kutita ku bana, amakimbirane yo mu miryango, gutandukana kw’abashakanye, kunanirana kw’abana n’ibindi bibazo.

Igishanga cya Nyabigombo ku isonga mu birarura abana muri Muhanga, bagata amashuri

Ububumbyi bw’amatafari nibwo bukorerwa mu gishanga cya Nyabigono


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
konka Monaco
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...