AMAKURU

UKWEZI
ubumwe

Kamonyi: Abize imyuga bati ’Umwuga ni urufunguzo rw’ubuzima’ [AMAFOTO]

Kamonyi: Abize imyuga bati ’Umwuga ni urufunguzo rw’ubuzima’ [AMAFOTO]
11-11-2019 saa 21:34' | By Nsanzimana Ernest | Yasomwe n'abantu 643 | Ibitekerezo

Bamwe mu banyeshuri bize imyuga itandukanye mu ishuri ry’ubumenyingiro rya Father Ramon Kabuga TVT School mu Karere ka Kamonyi, bavuga ko ubumenyi bahakuye ari urufunguzo rw’ubuzima kuri bo kuko batangiye kubukoresha biteza imbere.

Babivuze ubwo abagera kuri 53 bize ubwubatsi n’abize ububaji barangije muri iryo shuri bahabwaga impamyabushobozi zabo.

Nizeyimana Jean Bosco ati “Nize byinshi bijyanye n’ubwubatsi ku buryo ubu natangiye gukorera amafaranga mu gihe gito gishize ndangije kwiga. Umwuga nize ni urufunguzo rw’ubuzima kuko nzi neza ko uzangirira akamaro ukangeza ku bukire.”

Abiga mu ishami rya Multimedia nabo bavuga ko n’ubwo batararangiza ariko hari byinshi bamaze kumenya kandi babyitezeho kubahindurira ubuzima.

Hirwa Aimé ati “Nkurikije ubumenyi maze kugira ubu nshobora kwikorera nkashinga studio nkayikoresha; nshobora gufata amashusho nkanayatunganya cyangwa nkakora ibijyanye na cinema.”

Musenyeri wa Diyoseze ya Kabgayi, Simaragde Mbonyintege, yasabye abanyeshuri biga imyuga kunoza ibyo bakora kugira ngo bizabagirire akamaro asaba n’abarezi kubibafashamo.

Ati “Mu mashuri y’imyuga hari ireme ryihariye ryo gukora umurimo unoze ni cyo twifuza kugeraho; kugira ngo babigereho bigomba abarimu babihugukiyemo kandi babishaka n’ubuyobozi bwiza kandi butunganye.”

Usibye gutanga impamyabushobozi ku barangije, hakozwe n’igikorwa ngarukamwaka cyo kwibuka Padiri José Ramon washinze iryo shuri ry’imyuga no gutaka ku mugaragaro inzu ifatirwamoi ikanatunganyirizwamo amashusho (studio) y’ishami rya multimedia.

Umuyobozi w’iryo shuri, Padiri Rudahunga Cyiza Edmond Mari, yavuze ko bifuza ko abanyeshuri barera bagira roho nzima ituye mu mubiri muzima.

Ati “Twifuriza abo turera n’abo dufatanya ko baharanira kugera ikirenge mu cya Padiri Ramon kuko yaharaniraga ko umuntu agira roho nziza ariko inatuye mu mubiri muzima.”

Ishuri ry’ubumenyingiro rya Father Ramon Kabuga TVT School riherereye mu Murenge wa Ngamba mu Karere ka Kamonyi, rifite amashami arimo ubwubatsi n’ububaji ndetse rigatanga n’ubumenyi mu gukora no gutunganya amashusho n’amajwi hamwe n’ubumenyi muri mudasobwa.


Abayobozi batandukanye bitabiriye igikorwa cyo gutanga impamyabumenyi mu ishuri rya Father Ramon Kabuga TVT School


Bamwe mu banyeshuri biga mu ishami rya Multimedia


Abanyeshuri biga mu ishuri rya Father Ramon Kabuga TVT School

Ababyeyi n’abarezi barerera mu ishuri rya Father Ramon Kabuga TVT School


Abiga muri multimedia bigishwa gufata no gutunganya amashusho


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...