Itsinda ry’impunzi z’Abanyekongo ryagejejwe mu rukiko rwisumbuye rwa Korongi baregwa guteza imidugararo no gusuzugura amategeko y’igihugu cyazakiriye.

Ibi birego bifitanye isano n’imvururu zabaye mu nkambi ya Kiziba no ku cyicaro cy’ishami ry’umuryango w’abibumbye ryita ku mpunzi, HCR, mu Mujyi wa Karongi mu Burengerazuba bw’u Rwanda.

Icyo gihe impunzi zakoze imyigaragambyo zisohoka inkambi zishyamirana n’inzego z’umutekano zageragezaga kubahagarika no gushaka kubasubiza mu nkambi, bamwe baza no kuhatakariza ubuzima abandi barakomereka.

Abaregwa bagera kuri 60 binjiye mu rukiko bose bambaye impuzankano z’abagororwa. Baregwa ibyaha bibiri birimo guteza imidugararo no gusuzugura amategeko y’igihugu cyabakiriye.

Abaregwa bari mu matsinda abiri. Itsinda rya mbere rigizwe n’abantu 24 ariko babiri ntibagaragaye mu rukiko.

Ubushinjacyaha bwavuze ko abatabonetse mu rukiko bwababuriye irengero, busaba ko bahamagazwa nk’abari ahantu hatazwi, bazakomeza kubura bakazaburanishwa badahari.

BBC dukesha iyi nkuru yatangaje ko uko kubura kwa bamwe mu baregwa kwakuruye impaka ndende mu rukiko. Abunganira abaregwa basaba ibisobanuro ku buryo aba babuze, igihe baburiye n’icyo ubushinjacyaha bwakoze bumaze kubabura.
Nta byinshi byasobanuwe n’ubushinjacyaha kuri iki kibazo uretse kuvuga ko batabonetse mu nkambi ubwo bari bagiye gutabwa muri yombi.

Abanyamategeko Gilbert Ndayambaje na Sebaziga Sophonie bunganira abaregwa, basabye ko urubanza rwakomeza hakaburanishwa abageze mu rukiko, ababuze bakazahabwa igihe cyabo mu gihe baba babonetse.

Icyifuzo cyo kubaburanisha ukubiri ariko nticyashyigikiwe n’umucamanza wemeje ko agiye kubahamagaza ahatazwi, abaregwa bakazagaruka mu rukiko nyuma y’ukwezi.

Itsinda rya kabiri ryo ryari rigizwe n’abantu 33. Byabanje kugorana ko batangira kuburanishwa kuko umucamanza yavuze ko batashoboye guhuzwa n’ababunganira mu buryo bushya bw’ikoranabuhanga rikoreshwa mu manza zo mu Rwanda.

Ikibazo kivuye mu nzira, umucamanza yavuze ko iri tsinda rigomba kuburanira mu muhezo kuko abaregwa barimo abana.

Aba baregwa batawe muri yombi mu ntangiro z’uyu mwaka, nyuma y’ugushyamirana kwa zimwe mu mpunzi na polisi, kwanahitanye ubuzima bw’impunzi 11.

Izi mpunzi zaburanye mu matsinda abiri, rimwe rshyirwa mu muhezo