AMAKURU

UKWEZI
ubumwe

’Impuhwe Mukantagara yagiriwe n’ abakene zatumye arokoka Jenoside’- Ubuhamya

’Impuhwe Mukantagara yagiriwe n’ abakene zatumye arokoka Jenoside’- Ubuhamya
13-04-2019 saa 11:51' | By Jean Claude Habimana | Yasomwe n'abantu 2505 | Ibitekerezo

Mukantagara Thereze, umubeyi warokokeye Jenoside yakorewe Abatutsi mu cyahoze ari Perefegitura ya Kibuye (mu karere Karongi), avuga ko mu gihe cya Jenoside byari bigoye kugira aho umututsi yihisha kubera ko Interahamwe zabaga ziri buri hamwe, ngo byageraga mu gihe cy’imvura y’amahindu Interahamwe zagiye kugama akaba aribwo agira agahenge atitaye kumurindi w’imvura iri kumunyagira.

Mukantagara avuga ko umuryango Action Aid Rwanda ariwo wamufashije kwiyubaka. Mu buhamya yatanze ubwo uyu muryango wibukaga abakozi bawo bishwe muri Jenoside yakorewe abatutsi yavuze inzira y’ umusaraba yanyuzemo.

Agira ati “Ndibuka ko iwacu Interahamwe zari zarahagose, abantu benshi barishwe, kuburyo nuwabaga ataricwa yabaga afite ibikomere ku mubiri yatewe no gukubitwa, gutemwa cyangwa irindi yicarubozo yakorewe. Kubera ko byabaga bigoranye guhunga ku manywa nategerezaga nijoro, imvura yaba ari nyinshi Interahamwe zagiye kugama akaba ari bwo nshakisha aho guhungira nibura mfite agahenge.”

Thereza akomeza avuga ko nubwo yanyuze mu nzira y’umusaraba itoroshye ngo yaje kugira abagiraneza b’abakene bikabije baramuhisha kugeza ubwo Jenoside irangiriye.

Ati “Muri kwa guhunga kwanjye nageze ahantu hari umugezi wuzuye imvura yaraye igwa ari nyinshi, umugezi sinawutinye nawiroshyemo urajyana ngize amahirwe mfata ibyatsi byari ku mugezi nambuka umugezi ntyo. Narakomeje mpingukira ku rugo rwarimo umuryango ukenye bikabije pe, ngira amahirwe uwo muryango warumvikanaga, nuko bemeranya kumpisha kugeza ubwo Jenoside irangiriye.”

Mukantagara ashimira Umuryango Nyarwanda uharanira Iterambere ry’abagore ‘Actionaid Rwanda’ avuga ko wagize uruhare rukomeye mu kuzamura imibereho ye.

Uwamariya Josephine, Umuyobozi w’uyu muryango avuga ko mu ntego bihaye kandi bagenderaho harimo kuzamura imibereho myiza y’abagore by’umwihariko abo mu cyaro.


Uwamariya Josephine, Umuyobozi wa ActionAid Rwanda

Yagize ati “Mu bufasha bw’ibanze uyu Therese yari akaneye harimo kumukura mu gahinda, ahubwo akitekerezaho ari nako yiteza imbere, twabashije kumugenera inka, dore ko byabaye n’amahire inka irabyara nawe abasha kwitura mugenzi we, hakiyongeraho ko Leta y’u Rwanda yari yaramaze kumwubakira inzu asigaye atuye ku mudugudu.”

Uyu muyobozi akomeza avuga ko Mukantabana Therese n’abandi bagore bo mu karere ka Karongi bishyize hamwe muri koperative, maze uyu muryango ukomeza kubatera inkunga mu bikorwa by’ubuhinzi bakora buri munsi.

Mwesigwa David, umukozi wa Komisiyo y’iguhugu yo kurwanya Jenoside mu Rwanda witabiriye umuhango wo kwibuka Abatutsi bishwe bakoreraga Actionaid Rwanda yashimye uruhare imiryango itegamiye kuri leta ikomeza kugaragaza mu kubaka u Rwanda, aboneraho gusaba indi miryango gukomeza kugira umutima ufasha by’umwihariko abarokotse Jenoside yakorewe Abatutsi 1994.

Mwesigwa David, umukozi wa CNLG ushinzwe ubuvugizi bw ’Abarokotse Jenoside yakorewe Abatutsi

Buri mwaka umuryango ActionAid wibuka abakozi bawo 12 bishwe muri Jenoside yakorewe Abatutsi muri Mata 1994.


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...