AMAKURU

UKWEZI
pax

Ihuriro ryo Gusoma rya Kabuga ryafashije abataye amashuri kuyasubiramo [AMAFOTO]

Ihuriro ryo Gusoma rya Kabuga ryafashije abataye amashuri kuyasubiramo [AMAFOTO]
22-01-2020 saa 16:45' | By Nsanzimana Ernest | Yasomwe n'abantu 624 | Ibitekerezo

Abakangurambaga bo gusoma bo mu murenge wa Mbuye, mu karere ka Ruhango baratangaza ko gukorana neza n’ababyeyi no guhabwa ibitabo byo gusoma n’umushinga wa Mureke Dusome byatumye abana benshi basubira mu mashuri.

Ku ikubitiro abana bane bitabira ihuriro ryo gusoma rya Kabuga, riherereye mu Murenge wa Mbuye basubiye mu ishuri nyuma y’ubukangurambaga bwakozwe n’abakangurambaga bo gusoma. Mu mwaka w’2017 nibwo bamwe mu bana bari barataye ishuri batangiye kurisubiramo nyuma yaho umushinga wa Mureke Dusome umaze gushinga imizi muri uyu murenge.

Habiyaremye Gratien, umukangurambaga wo gusoma mu ihuriro ryo gusoma rya Kabuga avuga ko babanje gukangurira ababyeyi kohereza abana mu ihuriro kugira ngo bamenye gusoma no kwandika, maze bituma bafata icyemezo cyo gusubira ku ishuri.

Yagize ati : ”Abana bafashe umwanzuro wo gusubira ku ishuri nyuma yo kubereka akamaro ko kwiga. Twababwiye ko kumenya gusoma no kwandikabizabafasha kwiteza imbere”.

Mukangarambe Priscilla we avuga ko bajyaga basura abana bavuye mu ishuri, ndetse bakaganiriza n’ababyeyi babo kugira ngo babohereze mu ihuriro ryo gusoma.

Yagize ati : ” Njye na mugenzi wanjye twajyaga kubbasura mu rugo iwabo, maze tukabashishikariza kuza mu ihuriro, kugeza ubwo tubakundishije kwiga”.

Umunyamabanga wa Leta ushinzwe amashuri abanza n’ayisumbuye, Isaac Munyakazi avuga ko ababyeyi bakwiriye gufasha abana babo kujya ku ishuri no kwiga neza babaha ibikoresho kandi babafasha no gusubiramo amasomo igihe batashye ndetse uburere n’uburezi bw’abana babo ntibabuharire ababyeyi gusa.

Yagize ati ” Uburere n’uburezi by’abana banyu ntimugomba kubiharira abarimu gusa”
.
Audile, umwana w’imyaka 13 y’amavuko, yiga mu mwaka wa mbere w’amashuri abanza. Gusa yakabaye yiga mu mwaka wa gatatu iyo ataza kuva mu ishuri. Ashimira abakangurambaga bamushishikarije kwitabira ihuriro ryo gusoma no kumukundisha kwiga.

Yagize ati” : Abakangurambaga bo gusoma banshishikarije gusubira ku ishuri ndetse bamfasha kubona ibikokoresho by’ishuri birimo impuzankano n’ibitabo. Ndishimira ko namenye gusoma no kwandika”.

Habiyaremye ashimangira ko abana basubiye mu ishuri batsinda neza kandi bakaba bafite intumbero nziza.

Akomeza agira ati :”Ni abahanga. Abenshi muri bo baza muri batanu ba mbere. Nukuri batsinda neza”.

Kuri ubu Audile, umwe mu bana bari barataye ishuri, avuga ko yifuza kuba umwarimu kugira ngo abashe gushyira mu bikorwa ubumenyi yahawe n’abakangurambaga bo gusoma ndetse no gusubiza mu ishuri abarivuyemo”.

Amahuriro yo gusoma n’abakangurambaga b’umushinga wa Mureke Dusome barajwe ishinga no kugabanya umubare w’abanyeshuri barangizaga amashuri abanza batazi gusoma no kwandika.

Raporo ya Minisiteri y’Uburezi iherutse gusohoka igaragaza ko abanyeshuri bo mu mashuri abanza bataye ishuri mu mwaka w’amashuri wa 2017/2018 bari ku kigero cya 6.7% bavuye kuri 5.6% mu mwaka wa 2016/2017.


INKURU ZA :
Tanga Igitekerezo
Ibitekerezo
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA