konka coffee
KONKA

AMAKURU

UKWEZI
Minijust

Ibihugu byirengagiza guta muri yombi abakekwaho Jenoside birahemukira urubyiruko – Nduhungirehe

Ibihugu byirengagiza guta muri yombi abakekwaho Jenoside birahemukira urubyiruko – Nduhungirehe
12-04-2019 saa 10:59' | By Nsanzimana Ernest | Yasomwe n'abantu 451 | Ibitekerezo

Umunyamabanga wa Leta muri Minisiteri y’ ububanyi n’ amahanga ushinzwe Afurika y’ Iburasirazuba avuga ko ibihugu byirengagiza guta muri yombi abakekwaho uruhare muri Jenoside yakorewe abatutsi batuma abo bantu bacengeza ingengabitekerezo ya Jenoside mu rubyiruko.

Umunyamakuru Oswald Mutuyeyezu avuga ko imbogamizi zatumaga abakekwaho uruhare muri Jenoside yakorewe abatutsi badafatwa harimo ko abo bantu bahungiye mu bihugu by’ amahanga bagerayo bagahindura imyirondoro yabo. Ngo hari abagaragaza ko bapfuye abandi bagahindura amazina n’ ubwenegihugu.

Urwego rw’ ubushinjacyaha mu Rwanda rwakoze urutonde rw’ abakekwaho Jenoside yakorewe abatutsi bihishe mu mahanga, rugaragaza imyirondoro yabo ya kera n’ iy’ ubu. Uko bitwaga mbere, uko bitwa ubu n’ aho baherereye. Gusa ngo nubwo Leta y’ u Rwanda yakoze ibi byose hari ibihugu bicumbikiye abo bantu byirengagiza ku bata muri yombi nubwo u Rwanda rwabyoherereje impapuro zibata muri yombi.

Mu kiganiro amb. Olivier Nduhungirehe, yahuriyemo n’ abanyamakuru Oswald Mutuyeyezu na Jean de la Croix Tabaro gikorwa na Anne Marie Niwemwiza cyatambutse kuri KT Radio ejo tariki 11 Mata 2019, Nduhungirehe yavuze ko impamvu ibyo bihugu byirengagiza gufunga abo bantu aribyo biyizi.

Gusa agaragaraza ko ibyo bakora bifite ingaruka ku bana b’ u Rwanda. Yavuze ko hari ibihugu nka Canada, Leta zunze ubumwe za Amerika ,Ububiligi, n’ Ubufaranda yafashe abakekwaho uruhare muri Jenoside yakorewe abatutsi birababuranisha, ibindi bibohereza kuburanishirizwa mu Rwanda. Avuga Ubufaransa bwafashe bake agereranije abariyo.

Nduhungirehe ati “Biratangaje kuba mu myaka 25 hari abantu bakidegembya muri ibyo bihugu kandi abo bantu nibo bakwirakwiza mu rubyiruko ingengabitekerezo ya Jenoside no guhakana Jenoside no kuyipfobya”

Amb. Nduhungirehe avuga ko abana bavutse nyuma ya Jenoside cyangwa bakuze nyuma ya Jenoside bafite ingengabitekerezo kandi babishyiramo imbaraga, ngo babikomora kubakoze Jenoside batarafungwa.

Atanga urugero rw’ urubyiruko rwo mu Bubiligi rwashinze icyo rwise ‘Jambo asbl’. Aba bana Nduhungirehe avuga ko bakomoka ku babyeyi bakoze Jenoside yakorewe abatutsi ngo bakora ibikorwa byo guhakana no gupfobya Jenoside yakorewe abatutsi.

Guverinoma y’ u Rwanda ivuga ko yatanze impapuro zirenga 900 , mu bihugu 33 zo guta muri yombi abakekwaho uruhare muri Jenoside babyihishemo, gusa ngo ntabwo ibi bihugu bishyira imbaraga mu guta muri yombi aba bantu.

Amb. Nduhungirehe avuga ko guverinoma y’ u Rwanda ikomeza kuganira n’ ibyo bihugu ibyereka ingaruka zo kudafunga abo bantu kuko nta kindi yabikoraho.


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
konka Monaco
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...