AMAKURU

UKWEZI
pax

Huye : Uwubakiwe inzu akayamburwa, ati ‘byatewe n’uko gitifu yanyatse ibihumbi 20 nkayabura’

Huye : Uwubakiwe inzu akayamburwa, ati ‘byatewe n’uko gitifu yanyatse ibihumbi 20 nkayabura’
9-02-2020 saa 16:13' | By Nsanzimana Ernest | Yasomwe n'abantu 4176 | Ibitekerezo

Drocella Mukangamije umaze igihe abana n’abana be bane mu nzu yabasenyukiyeho, ubuyobozi bwamwubakiye inzu igeze hagati burayimwaka buyiha undi muturage.

Mu mpera z’ukwezi kwa Kanama 2019, ikinyamakuru UKWEZI cyasuye uyu mugore agitangariza ko yabuze ubushobozi bwo kwiyubakira kuko ari umukene nubwo yashyizwe mu kiciro cya gatatu cy’ubudehe.

Nyuma yo gusurwa n’itangazamakuru ubuyobozi bufatanyije n’abaturage batangiye kubakira uyu mugore, inzu igeze hagati burayimwaka buyiha undi muturage Leta yakodesherezaga.

Ku Cyumweru tariki 2 Gashyantare 2020, twongeye gusura Mukangamije dusanga aracyaba muri ya nzu yasenyutse.

Mukangamije avuga ko habaye inama eshatu zo gukusanya inkunga yo kumwubakira. Ati “Gitifu w’akagari yakoresheje inama ubugira gatatu bafasha izina rya Mukangamije. Ntawe utabizi. Inzu igeze hagati gitifu ubwe arambwira ati ‘wowe mpa amafaranga ibihumbi 20 yo kukugurira ibiti, yashakishe ingufu n’aho wahingaga uhareke”.

Akomeza avuga ko yahise ajya gushaka umuntu ukodesha umurima we kugira ngo abone ibihumbi 20 byo guha umuyobozi w’akagari ka Ryakibogo Mukanyandwi Specioza. Ngo mu gihe atarabona umuha ayo mafaranga yumvise ko inzu ye yahawe undi muntu.

Ati “Negereye umuntu nti mbabarira umpe amafaranga ibihumbi 20 unkodeshereze umurima. Wa muntu arambwira ati ‘nzayabona ukwezi gushize’ ntegereje kwa kwezi nibwo numvise ya nzu yayitanze”.

Abaturage bo mu murenge wa Gishamvu twaganiriye bavuga ko bababajwe no kuba baratswe ubufasha bakabutanga baziko bari kubakira umuturanyi wabo Drocella none inzu ikaba yarahawe undi muntu batazi.

Umwe ati “Drocella ni umuturanyi wanjye, Drocella ni imbabare nk’uko nanjye ndi imbabare, kubona bubakira abantu bakiri bato bafite n’amasambu agaragara ariko abantu b’inzigirizwa nkatwe ntibaturebe ! Babandi bakabaha ubwatsi(isakaro), bakabaha amasima, bakabubakira ibikoni na za tuwalete nta mafaranga batanze, ariko nibagera ku muntu w’umukene bamwake amafaranga ngo ni ayo kugura ibiti ?.

Nyirabaginama Angelique nawe ni umuturanyi wa Drocella ati “Badukoresheje umuganda inshuro ebyiri, nziko ndikubakira Drocella nyuma numva ngo bayitanze”.


Uyu mudugudu niwo urimo inzu yari yubakiwe Mukangamije Drocella

Abaturage bavuga ko hari amafaranga 200 yatswe buri rugo babwirwa ko ari ayo kubakira Drocella. Bakomeza bavuga ko kuba inzu batanzeho amaboko yarahawe umuntu batazi byabaciye intege mu gutanga umusanzu wo kubakira abatishoboye.

Abatishoboye batujwe mu mudugudu inzu yari iya Drocella yubatsemo bavuga ko bo bagiye bubakirwa bagahabwa inzu yuzuye nta kintu batswe.

Bamwe mu baturage bavuga ko gitifu Mukanyandwi Specioza agenda avuga ko ngo impamvu inzu yayatse Drocella ari uko ngo yamututse. Gusa bavuga ko batigeze bumva Drocella atuka uyu muyobozi.

Drocella ati “Gitifu arambeshyera ntabwo nigeze mutuka. Nari kuba mutuka dupfa iki kandi bari barimo banyubakira ?.

Abaturage bafite amakuru avuga ko uwahawe inzu ya Drocella ashobora kuba yaraturutse mu murenge wa Save gusa ngo nyina avuka mu murenge wa Gishamvu.

Bavuga ko ubuyobozi bwakoze ikosa kuko bwabasabye kubakira Drocella ariko ngo inzu bwajya kuyimwaka ntibubamenyeshe impamvu buyimwatse.

George Twiringiyemungu ati “Aho ikosa ribereye ni uko umuturage wacu batayimuhaye bakayiha undi tutanazi uturutse hirya”.

Umukuru w’umudugudu wa Gitwa, Kimonyo Jean Bosco yemeza ko inzu yahawe umusore ufite ubumuga bwo kutabona yari yubakiwe Drocella. Avuga ko amafaranga y’inkunga yo kuzuza inzu ya Drocella yari amaze guhabwa n’abaturage ari 2200.

Agira ati “Twatangiye kubaka twubakira Drocella, inzu igeze hagati byarahindutse. Sinamenya ukuntu byagenze”.

Amafaranga y’inkunga yo kubakira Drocella 2200 yari amaze kuboneka , mudugudu avuga ko yahise ayashyira ku musanzu w’ishyaka FPR inkotanyi. Ati “Niko abaturage bansabye nyuma yo kubona inzu ya Drocella ihawe undi muntu batazi”.

Mukanyandwi Specioza, Umunyamabanga Nshingwakorwa w’ Akagari ka Ryakibogo, Drocella ashinja ko yamwatse ibihumbi 20 byabura akamwambura inzu aganira na UKWEZI yavuze ko ibyo kuba inzu yarigeze kuba iya Drocella atabizi.

Specioza twaganiriye ari muri konje kuko yabyaye yatangiye avuga ko adafite amakuru kuri iki kibazo cyo kuba Drocella yarubakiwe inzu yagera hagati akayamburwa igahabwa undi muntu.

Yagize ati “Amakuru mperuka, uriya(Drocella) yasabwe ikibanza. Ikibanza ntarimo kugishaka kandi ni ukuvuga ngo ari iy’umugabo we arahafite n’aho avuka arahafite, icyo kibanza yashakaga cya Nkundabagenzi, Nkundabagenzi niwe wagaragaye nk’umuntu utishoboye udafite uburyo na bumwe yabonaho ikibanza.”

Ku kibazo cyo kuba yaba yaratse Drocella amafaranga ibihumbi 20 yabibura akamwambura inzu, Specioza yagize ati “Arabeshya iyo ni imitwe”.


Inzu Drocella abamo igice cyo ku irembo kigikanyakanya

Inzu ya Drocella uko igaragara uyirebeye mu gikari

Nkubana Vianney, Umunyamabanga Nshingwabikorwa w’umurenge wa Gishamvu utaramara ukwezi atangiye kuyobora uyu murenge akimara kuganira n’umunyamakuru ku kibazo cya Drocella yahise ajya gusura umuryango.

Avuga ko nyuma yo kubona uburyo inzu Drocella abanamo n’abana be bane ishaje yafashe icyemezo cyo kumusaba kuba ayivuyemo Leta ikaba imukodeshereza kimwe n’abandi badafite inzu zo kubamo.

Gitifu Nkubana avuga ko uyu mwaka abayobozi b’inzego z’ibanze bahawe amabwiriza ko uwo bagomba kubakira ari udafite aho aba namba.

Inzu abaturage bari bubakiye Drocella yahawe umusore wakodesherezwaga na Leta. Gitifu avuga ko indi nzu irimo kubakwa ari iy’undi umusore ufite uburwayi bwo mu mutwe wabaga mu ishyamba.

Avuga ko atakomeje gutinda ku nzu bivugwa ko yambuwe Drocella kuko n’abazihawe bari bazikeneye ati “Ntabwo nakomeje gutinda kuri ibyo ng’ibyo kuko nabo nasanze barihutirwaga(emergency) ahubwo narebye icyo twakora kugira ngo abone aho yaba abaye”.

Akomeza avuga ko nawe Drocella yamubwiye ko impamvu bamwambuye inzu ari uko yabuze ibihumbi 20 yasabwaga na gitifu w’akagari, gusa ngo ntaramenya koko niba ayo mafaranga gitifu yarayamwatse cyangwa atarayamwatse.

Gitifu Nkubana avuga ko nyuma yo gusura Drocella agasanga ari umukene udakwiye kuba mu kiciro cya gatatu hari icyo yasize abikozeho.

Ati “Namugiriye inama ko ku wa Kabili yazajya mu nteko z’abaturage akajuririra ikiciro kuko nasanze adakwiye icya 3. Bica mu nteko z’abaturage kuko nibo baba bamuzi neza”.

Abaturage bavuga ko uko babona iki kibazo cyakemurwa ari uko Mukangamije Drocella yasubizwa inzu bamufashije kubaka, hanyuma uwo musore utabona nawe akubakirwa iye.


Iyi nzu niyo yari yubakiwe Drocella arayamburwa


Iyi nzu umusore utabona wayihawe ayibamo nubwo itaruzura neza

Ubwo twasuraga iyi nzu yari yubakiwe Drocella twasanze uwo musore utabona yaratangiye kuyibamo nubwo itaruzura neza.

Bamwe mubo twaganiriye basanga ikibazo cy’aya mafaranga ibihumbi 20 Drocella avuga ko yatswe gikwiye gusuzumwana ubushishozi kuko bakeka ko ari ruswa gitifu yasabaga uyu muturage.


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...