AMAKURU

UKWEZI
cheno 2020

Huye: Abapagasi batari kavukire bati ’twe batwimye amahirwe yo guhabwa ibiribwa’

Huye: Abapagasi batari kavukire bati ’twe batwimye amahirwe yo guhabwa ibiribwa’
31-03-2020 saa 17:12' | By Nsanzimana Ernest | Yasomwe n'abantu 1686 | Ibitekerezo 1

Mu karere ka Huye bamwe mubari batunzwe no gupagasa batakibona uko bajya mu kazi kubera gahunda abaturage bise #Gumamurugo yo kwirinda coronavirus basaba ubufasha kugira ngo babone icyo barya.

Abaganiriye na UKWEZI ni abo mu mudugudu wa Mukoni akagari ka Cyarwa mu murenge wa Tumba n’abo mu kagari ka Matyazo umurenge wa Ngoma. Aba baturage bavuga ko gahunda yo kwandika abakene ngo Leta ibahe ibyo kurya yakoranywe amanyangwa. Ngo hari abatishoboye batanditswe.

Ikimpaye Marie Goretti w’imyaka 53 utuye mu mudugudu wa Mukoni, ubwo umunyamakuru yamusuraga yasanze atuye mu kazu k’icyumba kimwe, kidakingwa.

Uyu mugore avuga ko yari atunzwe no kumesera abakire none ngo kubera gahunda yo gusaba abaturage kuguma mu rugo nta biraka akibona, kandi n’abayobozi b’umudugudu ngo banze kumwandika mu batishoboye ngo azahabwe inkunga y’ibiribwa.

Iki kibazo agisangiye n’abaturanyi be bavuga ko ‘ari abikorera ku giti cyaho’ (indaya) bari batunzwe no gukora uburaya mu mujyi wa Huye.

Umwe muri bo yagize ati “Nimugoroba hano hirya ku rusengero bandikaga abatishoboye ngo bazahabwe ibiribwa, twagiyeyo banga kutwandika ngo ntabwo turi bakavukire inaha. Turagira ngo mutubarize niba twebwe tuzicirwa n’inzara mu mazu?”.

Umwe mu bagabo bazindukiraga mu isantere ya Matyazo bashaka ubaha ikiraka aho bita ku ‘Ndege’ avuga ko inzara ishobora kuzamwicira mu rugo kuko batakibona ibiraka, kandi abayobozi b’imidugudu bakaba baranze kubashyira ku rutonde rw’abazahabwa ibiribwa bababwira ko bo atari ba kavukire.

Uyu mugabo yagize ati “Indege twayigiraga hano, turaza mu minota nk’10 cyangwa 20, ubuyobozi butuyobora mu midugudu no mutugari bati muve hano kandi nko mu minota 50 iri imbere wari kubona umuntu uguha akazi”

Avuga ko mu buzima busanzwe atunzwe no gusiga irange ku mazu. Ati “Mpigira hano ariko mvuka mu murenge wa Mbazi, hano banze kunyandika ngo ntabwo ndi kavukire”.

Aba baturage bibaza uko bazabaho mu gihe aho bacumbitse bari banasanzwe bakorera banze kubandika mu batishoboye ngo bahabwe ibyo kurya kandi badashobora no kujya aho bavuka kuko ingendo zitari ngombwa zitemewe.

Abaturage baba abo mu murenge wa Tumba n’abo mu murenge wa Ngoma bemeza ko iyi gahunda yo kwandika abahabwa ibyo kurya irimo amanyaga.

Imibereho y’abo bivugwa ko basigajwe inyuma n’amateka

Umunyamakuru yasuye umudugudu w’abo bivugwa ko basigajwe inyuma n’amateka asanga bamwe muri bo banditswe mu bazahabwa ibyo kurya abandi ntibandikwa.

Aba basigajwe inyuma n’amateka bavuga ko ubusanzwe bari batunzwe no kubumba inkono n’imbabura, none ngo ntabwo bakibona uko babigurisha kuko batemerewe kuva mu ngo.

Niyindorera Verena w’imyaka 58 twasanze ari kubumba imbabura yavuze ko aherutse kujya gucuruza imbabura abayobozi baramwirukana azitayo ari itahira kuko bamusabaga gusubira mu rugo.

Yakomeje avuga ko kwandika abatishoboye bitarabageraho, yagize ati “Ntabaragera aha kugira ngo batwandike baduhe iyo nkunga”.

Uwamurera Jacqueline w’imyaka 29, ni umubyeyi w’abana bane, nawe abarizwa mu kiciro cy’abo bivugwa ko basigajwe inyuma n’amateka. Avuga ko mbere y’uko Leta y’u Rwanda ifata umwanzuro wo guhagarika imirimo imwe n’imwe kubera icyorezo cya coronavirus yari atunzwe no kwikorera imizigo.

Ati “Leta nk’uko iri kuvuga iby’inkunga yagerageza uburyo natwe itwibuka ikaduha ibyo kurya. Ibyo kujya guhiga byo ntabwo tukibona ukuntu tujyayo”.

Umuyobozi w’ Akarere ka Huye Ange Sebutege yatangarije Ukwezi ko abaturage bari basanzwe bahabwa inkunga na Leta barakomeza kuyihabwa uko bisanzwe, naho ngo gahunda yo gufasha abatabona uko bapagasa aribyo byari bisanze bibatunze, birakorwa na komite y’umudugudu nibo bafite inshingano yo gutoranya abahabwa iyi nkunga.

Meya Sebutege ntabwo yavuze ko abatari kavukire batemerewe guhabwa inkunga.


INKURU ZA :
Tanga Igitekerezo
Ibitekerezo 1
Boni Kuya 3-04-2020

Mwiriwe,ndabona ibyo ubuyobozi w’umudugudu wakoze mugutoranya abazahabwa ibyo kurya,aramakosa,yakabaye abanza abaturage batunzwe no gukorera abandi kugirango babone icyo barya,kuko nabo ni abanyarwanda,ariko mwihangane IMANA Iratabara kandi izakorera mu bayobozi mubone ibyo kurya,gusa leta ibe maso kuko hararengana benshi.

English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...