AMAKURU

UKWEZI
ubumwe

Huye: Abanyeshuri bashyiriweho gahunda ibarinda kujya mu bidafite akamaro mu biruhuko [AMAFOTO]

Huye: Abanyeshuri bashyiriweho gahunda ibarinda kujya mu bidafite akamaro mu biruhuko [AMAFOTO]
14-11-2019 saa 14:55' | By Nsanzimana Ernest | Yasomwe n'abantu 475 | Ibitekerezo

Ishuri ribanza rya New Vision (New Vison Primary School) ryo mu Karere ka Huye, ryashyizeho gahunda yo gufasha abana bari mu biruhuko kugira ibyo bahugiraho byiza birinda kujya mu bidafite akamaro.

Ubuyobozi bw’iryo shuri bwabitangaje ubwo hasozwaga umwaka w’amashuri wa 2019 hanatangwa indangamanota ku banyeshuri.

Ni umuhango witabiriwe n’ababyeyi b’abo banyeshuri bamenyeshwa gahunda zitandukanye ishuri ryateguye harimo n’iyo kuzafasha abana mu biruhuko.

Umuyobozi wa New Vison Primary School, Mugwaneza Edouard, yavuze ko iyo gahunda bayise ‘Patronage’ izafasha abana gusubiramo amasomo yabo no gutozwa ibindi byiza bjyanye n’umuco nyarwanda.

Ati “Turabizi ababyeyi barahuze cyane muri iyi minsi barashakisha imibereho, bityo rero twafashe uyu mwanzuro mu rwego rwo kubafasha kubarinda kugira ibintu barangariramo byatuma biga ingeso mbi zitaberanye n’umwana w’umunyarwanda twifuza.”

Byakunze kugaragara hirya no hino ko bamwe mu babyeyi bahugira mu gushakisha amafaranga n’ibindi bibafasha mu mibereho bagasa n’abibagiwe kwita ku burere bw’abana babo.

Usanga abana babasigira abakozi cyangwa bakabasiga bonyine bikaba byabaviramo kujya mu ngeso mbi zirimo no gufata ibiyobyabwenge.

Bamwe mu babyeyi barerera kuri New Vision Primary School bashima gahunda iryo shuri ryashyizeho kuko izabafasha mu gukomeza kurera abana babo neza.

Mwizerwa Jean Damascene ati “Ni gahunda nziza turayishima kuko izafasha bana bacu gusubiramo amasomo no gutozwa ibindi bikorwa byiza bifite akamaro".

Niyizurugero Ruth we avuga ko bazakora uko bashoboye igihe abana bavuye ku ishuri bakabitaho kugira bakomeze kugira uburere bwiza.

Ati “Gahunda ishuri ryashyizeho ni nziza kandi natwe tuzajya tubitaho igihe bavuye ku ishuri kugira ngo dufatanye kurera neza.”

Ishuri New Vision Primary School ry’i Huye ryafunguye imiryango mu mwaka wa 2012; kuri ubu ryigamo abana 890 n’abarimu 36.

Amafoto ya bamwe mu banyeshuri no muri New Vision school, abarezi babo, n’ ababyeyi babo





INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...