AMAKURU

UKWEZI
ubumwe

Amashuri yigenga avuga ko abangamiwe na gahunda yo kwigisha mu Kinyarwanda

Amashuri yigenga avuga ko abangamiwe na gahunda yo kwigisha mu Kinyarwanda
15-11-2019 saa 18:21' | By Nsanzimana Ernest | Yasomwe n'abantu 3876 | Ibitekerezo 15

Bamwe mu bayobozi b’ ibigo by’ amashuri byigenga bifite amashuri abanza bavuga ko ibwiriza ryo kwigisha amasomo yose mu Kinyarwanda kugeza imyaka 3 ibanza ribabangamiye bagasaba ko iri bwiriza ryakongera rikigwaho neza.

Aba bayobozi bavuga ko iri bwiriza rihabanye n’ ibyifuzo by’ abaturage, kuko ngo abaturage icyo bifuza ni uko abana babo bamenya indimi z’ amahanga Igifaransa n’ Icyongereza.

Umuyobozi w’ ishuri ribanza rya New Vision, Mugwaneza Jean aganira na UKWEZI yagize ati “Twebwe twigisha dukurikije ibyo sosiyete ikeneye. Niba sosiyete dukorera idusaba ngo mudukorere ibi, kandi tukaba dutanga umusaruro nta shuri rya Leta ritujya imbere, kuki badutegeka kwigisha mu Kinyarwanda kandi ababyeyi bakeneye Igifaransa n’ Icyongereza kugira ngo abana babo bazazikoreshe mu buzima bwabo bwa buri munsi”.

Abarezi bavuga ko abategura iteganyanyigisho batabagisha inama bityo bigatuma bategura iteganyanyigisho zidasubiza ibibazo sosiyete ifite.


Murangwa Jean

Murangwa ati “Ababyeyi bo babuze icyo bakora n’ icyo bareka kuko ntibarafata abana ngo babajyane kwiga muri camboridge ubwo bushobozi ntibazabushobora, ntibazabafata kandi ngo babajyanye mu mashuri yo hanze nabyo ntibazabishobora. Ni ikibazo kiri aho turindiriye ko kibonerwa umuti kuko ibyo ari byose nabo barabibona ko ari ikibazo kuva aho iriya gahunda iziye yo kwigisha mu Kinyarwanda”

UWERA Francoise, Umuyobozi w’ ishuri ribanza ryigenga rya Kibondo nawe avuga ko hari ababyeyi bari kwitotombera ko abana babo bagiye kwiga mu Kinyarwanda, imyaka itatu ibanza.


UWERA Francoise

Ati “Muri iki gihe hari ababyeyi bari kwitotombera ko abana babo bagiye kwiga mu Kinyarwanda…Ubundi buri gihe Leta ni umubyeyi irafasha ariko mu burezi ibigenda bihinduka bivanga abana, mu gihe ibitabo bihindutse, ururimi ruhindutse”.

Abana biga muri amwe mu mashuri yigenga kimwe mu bibaranga ni uko baba bavuga neza Igifaransa n’ Icyongereza.

Iyi gahunda yo kwigisha mu Kinyarwanda ireba imyaka 3 ibanza gusa, ibi abarezi ngo basanga ari imbogamizi ikomeye kuko ngo umwana afata indimi z’ amahanga neza iyo akiri muto.

Murangwa ati “Ntabwo umwana uzajya kumwigisha Igifaransa n’ Icyongereza ari hejuru ari kurwana n’ amasiyanse na social studies”.

Abarimu bavuga ko iyi gahunda yo kwigisha mu Kinyarwanda yabatunguye. Ngo bayimenye ubwo bategekwaga gutegura ibizami bisoza igihembwe cya 3 cy’ uyu mwaka w’ amashuri wa 2019, nyamara atarirwo rurimi abana bizemo.

Umuyobozi Mukuru w’ Ikigo cy’ Igihugu cy’ Uburezi REB, Dr Ndayambaje Irené ntiyemeranya n’ abavuga ko iyi gahunda yo kwigisha mu Kinyarwanda imyaka 3 ibanza yatunguranye.

Yabwiye UKWEZI ko muri 2016 ubwo hategurwaga integanyanyigisho ishingiye ku bumenyi , ngo hagaragajwe ururimi ruzigishwamo urwo arirwo.


Dr Irené Ndayambaje

Ngo gahunda ya Minisiteri y’ Uburezi yo muri 2013 nayo igaragaza indimi zigishwamo mu mashuri. Dr Ndayambaje avuga ko no muri 2009 ubwo hashyirwagaho gahunda yo kwigisha mu Cyongereza guhera mu mwaka wa 4 w’ amashuri abanza icyo gihe ngo nabwo umwanya w’ izindi ndimi waragaragajwe. Ngo no muri 2003 hatorwa itegeko nshinga umwanya w’ Ikinyarwanda wari usobanutse.

Akomeza ati “Abarezi basa n’ abinangiye banga kwigisha mu Kinyarwanda, ariko amashuri agenda afungurwa n’ asanzweho turabashishikariza kugira ngo bakurikize umurongo w’ integanyanyigisho yacu, mu gihe yaba ari amashuri akoresha porogaramu y’ igihugu. Birumvikana amashuri twita international afite umurongo wayo nubwo nayo asabwa kwigisha Ikinyarwanda nk’ isomo”.

Inzobere mu burezi, Theogene Uwizeyimana avuga ko impinduka za hato na hato ziri mu bishobora gusubiza inyuma ireme ry’ uburezi.

Agira ati “Kwigisha mu Kinyarwanda bari barabishyizeho yego ariko niba ubishyizeho ugomba no kubikurikirana. Mu myigishirize iyo ushyizeho ikintu, cyaba kitarafata cyane ukongera ukaba uzanyemo ikindi kenshi usanga ikibazo cy’ ireme ry’ uburezi kigenda kigaruka”.


INKURU ZA :
Tanga Igitekerezo
Ibitekerezo 15
Renata Kuya 23-11-2019

Jyewe ntekereza iby’iyi gahunda yokwigisha mukinyarwanda nkumva ndarwaye pe. Sinari nabyakira sinzanabyakira keretse nivuganiye na perezida w’iki gihugu akambwira ko ibi bintu abizi kd ko yabyemeye. Kuko niwe jisho rya rubanda nyamwinshi kd akunda abanyarwanda ntavangura. Naho abavuga ngo ururimi rwacu ruzacika nabamara impungenge nihereyeho. Navukiye mumahanga ariko natahutse mvuga ikinyarwanda cyiza. Muhere kucyo nanditse niba ari kibi.Rero nkeka ko abafite impungenge ari abavuga indimi zohanze mumago yabo. Bazantumeho mbigishirize abana babo ikinyarwanda mungo ariko bareke abacu bige uko byari bisanzwe. Ndababaye cyane rwosee. Nimureke kwangisha abantu igihugu cyabo rwose. Ndahamya neza ko ufite ubushobozi arimo ashaka uko umwana we yajya kwiga hanze kd ntacyo igihugu cyacu kibuze usibye uburezi budafite ireme

Majyambere Kuya 21-11-2019

Ahhhhhhh ubundi se barabuzwa Niki ko bahora bazambya uburezi ntihagire ubibaryoza!!! Ahubwo nibashaka bavunge guhera P1 kugeza P6 Ahhhhh Erega aba Bantu Bitwa ngo nibo bareberera uburezi cg nabandi banyakubahwa ababo Bari America, Canada, France kandi ninabo bazaba abayobozi bejo hazaza higihugu Kuko bize ahantu heza batazi nikinyarwanda neza cg se Babwire Mifotra cg nabandi babishinzwe bajye batanga ikizami mukinyarwanda nimba dukunze ururimi rwacu da!!! N. B: Turufuza kuzabona Minister cg Depite wize muri 9 cg 12 years muminsi iri mbere nibwo tuzamenya ko mureberera igihugu Kure Kandi mugikunda. Ahubwo kazabwa intyoza muri English cg France.

Father Kuya 19-11-2019

Aba banga ko abana bacu bamenya neza English na Francais hakiri kare and and ma ari ntamwana wabo urimo. Harya izo mpuhwe batagirira abana babo bakazizana kuri rubanda rugufi zishingiye kuki? ubwo bushakashatsi niba mubwemera kuki butaba applied no muri izo international schools zikorera mu Rwanda ko byose ari iby’abanyarwanda? Mwirengagije ko byari bimaze gukemura ikibazo cyo kwohereza abana Uganda bakurikiye icyo cyongereza? Ndanabizi neza ko izo private schools muri kurwanya arizo zitsindisha neza yewe no mu isomo ry’ikinyarwanda.

Motar Kuya 18-11-2019

Steven uzabimenya aruko wabaye umubyeyi cyangwa uriwe nawe uri mubarerera international schools, ukaba uri kutwangiririza abacu urumwana mubi

tesy Kuya 18-11-2019

Ariko hari ubwo ndeba rimwe narimwe nkabona Leta yacu twitoreye dukunda hari abayihishamo bagamije kwangisha Leta abaturage, nkubu abantu baricara bati Leta yacu iraturenganya nyamara arabantu bafite inyungu ziri kugiticyabo gusa bayihishemo, niko wowe ngo uri Dr harya none urasha ko abana twabyaye bazahurira nabawe ku isoko ry’umurimo muri interview uwawe yarize mundimi z’amahanga uwacu wize nabi aharenganire kandi nyamara ndabona ibintu abantu bamwe nabamwe bazanye ari ikandamiza turagusabye icyo gitekerezo cyawe ukigumane mumutima wawe ntago abana bacu ari ibishushanyo bigiraho utubabarire cyane ikinyarwanda barakizi twebwe abana bacu baziga mundimi twifuza apana urwo wowe wifuza niyo mpamvu abantu bamwe bafata abana babo bakabajyana i bugande mutubabarire Mwivangira leta yacu twikundira

Motar Kuya 18-11-2019

Kwigisha mukinyarwanda sibyo bivuze ko umwana akizi ahubwo kukiga mu ishuri nkisomo nibyo bizamura ubumenyi byururimi Gakondo kuko no mubisanzwe aho yirirwa nabo birirwana nabyo bituma umwana ashobora kumenya ururimi Gakondo .ngendeye kubizamini byatanzwe bya REB njye nabonye ikinyarwanda nkisomo umwana wanjye yaragize 80/80
Kandi ntiyiga muri urwo rurimi usibye kurwiga nkikinyarwanda ,igitekerezo numva
Abana bakomeza kwiga ikinyarwanda nkisomo mubisanzwe bakabyiga muzindi ndimi ariko kubiryanye n’umuco nabyo bikirwa mukinyarwanda

Rutayisire Etienne Kuya 17-11-2019

Ururimi gakondo ntirujyanwa n’uko private schools ziga mu cyongereza n’igifaransa. Abiga muri public schools mbona ari bo bavuga" siwumva#ntiwumva; ndamubwira uti# ndamubwira nti; Bimeze ute?# bimeze bite; ndagenda natariye?# ndagenda ntariye...... Mureke twiyigishirize abana indimi z’amahanga bakiri bato nk’uko n’abanyu baziga. Ko mbona iyo bari guhitamo abana bazabonana na Prezida wa Rep. mu buryo ngarukamwaka bavuga ngo bashake abana bashobora kuvuga mu cyongereza, akazi kaboneka ku mbuga ko basaba kuba fluent mu cyongereza byaba no mu gifaransa bikaba akarusho, hari aho bari basaba ikinyarwanda kdi ari mu Rwanda ra!!!???. Ubwo hanze ho ntagusunutsa yo utuzuru. Twese turi abarezi ibyo tuvuga turabizi n’ibyo twifuza tuzi impamvu. Ubushakashatsi bwanyu buca hejuru source y’ikibazo cy’ireme ry’uburezi nyamara n’umwana muto aho ruzingiye yahabona. Mureke natwe twirwarize ku twana twacu mu bukene bwacu

Assumani Kuya 17-11-2019

Steven uransekeje kweri ngo ururimi gakondo rwari rugiye gucika ubuse abavukiye Imahanga bagakuriraho ninde ubarusha ikinyarwanda uzi impamvu batashye baruvuga se ? umubyeyi yategekaga abana kuvuga izindi ndimi hanze ariko bagera murugo bagakoresha ikinyarwanda ururimi rwabo kuko bavuga bati tuzataha aha siwacu abana baje bavuga neza ikinyarwanda ntakibazo nabana bacu rero bakwiga izo ndimi zamahanga ikinyarwanda banakigira hanze mubandi bana
urugero naguha uzabaze abana babahinde biga aho urebe ko batazi indimi
ikinyarwanda
giswairi
igihinde
gusa guhindagura kenshi programme birangiza abana cyaane
none bati ntagifaransa
ejo bati icyongereza ejo
bati igifaransa kiragarutse
none bati byose bivuyeho ikinyarwanda gusa
reka turebe

Rutayisire Etienne Kuya 16-11-2019

Ikibazo gihari ni uko abo bose babivuga bakanabitegeka nta mwana wabo wiga mu kinyarwanda kdi abana babo ntibabura kukimenya unasanga no mu ngo zabo bavugana n’abana mu ndimi z’amahanga. Nkanswe abacu baheruka izo ndimi bari ku ishuri gusa. Ikindi kandi sinzi niba barabonye batsindwa ikinyarwanda. Ibyo babyita kubuza epfo na ruguru.

Mahoro Kuya 16-11-2019

Numva hari hakwiye ko irivtegeko rishyirwa my bigo by a Leta abigenga bakabareka kuko twebwe ababyeyi dufite sbana muri privates schools tobona umusaruro mwiza rwose. Kuko abana bacu bafite performance nziza mu Kinyatwanda, Igifransa n icyongereza. Ikindi nibaza hakozwe ubushakashatsi buhe NGO bigaragare ko kuba abana biga mu kinyarwanda bizatuma bamenya sciences kuko nazo zikozwe muri izo ndimi barwanya. Ndumva bareka tukihitiramo who dushyira sbana bacu. Ibi buo kuduhindurirsho program uko babobobye byagiye bitugiraho ingaruka bijatubabaza none n Ababa Bacu barabatangiye bakiri BATO koko?

Food for the thought 8 Kuya 16-11-2019

I’m thankful for the positive changes in Education so far,
[ ] but the decision of teaching the first 3primary years in kinyarwanda is a negative idea because it’s at this early age that children learn other languages and understand them clearly ie English and French. My suggestion is that children continue studying kinyarwanda as a subject as it was in all classes from p6 to s6. Rwanda is already a landlocked country why lock ourselves again with kinyarwanda by failing to communicate with the world.

Ok

Innocent Kuya 16-11-2019

Twaragowe pe. Uzarebe ko hari umwana w’abo banyakubahwa uziga ibyo bahatira abantu. Ibaze gutegeka abantu ngo bakore mu rurimi batizemo!! Kuki byagiyeho ntibakurikirane ko biri gukorwa? Ariko turaza gusaba HE REB azayihe humaniste(D6) abe ariwe uyiyobora kuko aba ba Doctors ndabona ntacyo bamariye abanyarwanda! Uziko mu minsi iri mbere ntamunyarwanda uziga ngo agere ku rwego rwa Doctorat??

Hategekimana Kuya 16-11-2019

Umva mukuri mbabwire harabantu bakorera let’s bagambiriye kuyangisha abaturage kuko noneho birakabije pe umuntu aricara agashyiraho ibintu bibangamiye abantu gusa ngo abababaze ntakindi ikibikwereka nuko uwo Dr was reb urebye wasanga hari umwanawe wize mukinyarwanda baba biga mumashuri international abarangiza abacu bakabapyinagaza ESE niba ibyabo aribyo byiza mumashuri ya leta yigenga atsindisha Ababa bangahe? Ahubwo bakabaye bigira kuma prive kuko niyo yabahaga abanyeshuri babahanga naho ahandi usanga hatainda 3%

MUHIRE Wellington Kuya 15-11-2019

Ni byiza ko abana b’abanyarwanda bamenya urulimi rwabo ariko uburyo bikorwamo bukwiriye kunozwa. Nta bwo mu by’ukuri abayobozi ba REB bakabaye bamanuka baje gutanga ibizamini mu Kinyarwanda mbere yo gukora igenzura ryimbitse ko gahunda yo kwigisha mu Kinyarwanda yaba yarubahirijwe.

Ikindi isuzuma ryose rikorwa hagamijwe kureba ko abo wigishije babyumvise. Kuba rero abana barize mu cyongereza bakabazwa mu Kinyarwanda ntbwo ari isuzumabumenyi ahubwo ni nk’igihano bahawe.

Bimwe rero mu bidindiza ireme ry’uburezi mu Rwanda si uko abanyarwanda ari abaswa, cyangwa se gahunda mbi igihugu gifite, oya, ahubwo ni ishyirwa mu bikorwa rya gahunda risa n’iriza ikubagahu abagenerwabikorwa ntibabyumve kimwe n’ababishinzwe.

Ikindi kandi ni impinduka za hato na hato bituma usanga abashinzwe uburezi basa n;abahuzagurika ingaruka zikaba ku bana bikarenga bikagera ku muryango mugari w;abanyarwanda.

Icyifuzo: 1. Impaka zijyanye n’imihindagurikire yose zagombye kubaho mbere y’impinduka aho kuza nyuma amazi yarenze inkombe
2. Impinduka zagombwe kugenda buhoro buhoro, nk’urugero abana bagatangira mu wa mbere, biga mu Kinyarwanda n’abazabakurikira, mu gihe abari imbere bakomeje izindi ndimi nk’uko batangiye cyane cyane ko n’icyo Kinyarwanda hari amashuri yigenga akomeza kukigisha nk’isomo.

3. Ikinyarwanda ntikikigirwe ku ishuri gusa ahubwo n’ababyeyi, umuryango mugari w’abanyarwanda ugihe agakiro ukivuge abana bazakimenya.

Uwimana Steven Kuya 15-11-2019

Barakoze ahubwo kubizana kuko ururimi gakondo rwari rugiye burundu

English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...