AMAKURU

UKWEZI
ubumwe

Gisagara: Barashinja ubuyobozi kubaka amafaranga bukoresheje uburiganya ngo bwese umuhigo wa mituelle

Gisagara: Barashinja ubuyobozi kubaka amafaranga bukoresheje uburiganya ngo bwese umuhigo wa mituelle
5-11-2019 saa 12:42' | By Nsanzimana Ernest | Yasomwe n'abantu 2491 | Ibitekerezo 1

Bamwe mu bacuruzi bo mu murenge wa Kigembe mu karere ka Gisagara baravuga ko ubuyobozi bw’ uyu murenge bwabakoresheje inama mu mezi ashize bubaka amafaranga buri mucuruzi ibihumbi 10 bizezwa ko bahita babona uburenganzira bwo kwenga urwagwa no kurucuruza.

Ayo mafaranga abaturage bavuga ko bayatanze benga urwagwa iminsi mike ubuyobozi buhita bubahagarika bubabwira ko ibyo bakora bitemewe nyamara ngo ntibwabasubije amafaranga yabo.

Mu karere ka Gisagara ubusanzwe nta muturage wemerewe kwenga urwagwa ndetse bamwe mu baturage bavuga ko hari bagenzi babo bafunze bazira ko benze urwagwa. Aya makuru yemejwe n’ umwe mu bayobozi b’ umudugudu wo muri uyu murenge.

Mu mezi abiri ashize ngo nibwo ubuyobozi bw’ umurenge bwatumijeho inama y’ abacuruzi bubasaba gukusanya ibihumbi 800 kugira ngo abakeneye kwenga no gucuruza urwagwa bahabwe ubwo burenganzira.

Umuturage twahaye izina rya Janvier yatangarije UKWEZI ko abayobozi b’ umurenge batumije inama y’ abacuruzi bose bo mu murenge, babasaba ko buri mucuruzi atanga amafaranga ibihumbi 10 abacuruzi bizezwa ko nibatanga ayo mafaranga bahabwa uburenganzira bwo kwenga urwagwa no kurucuruza.

Agira ati “Ikibazo cyabayeho abayobozi b’ umurenge badutumyeho mu nama, badusaba ko tugomba guteranya ibihumbi 800 mu murenge byo kwishyura mituelle kugira ngo umurenge wese imihigo”.

Undi muturage twahaye izina rya Christine avuga ko aya mafaranga bakusanyije bayashyikirije (Deo) umuyobozi w’ uruganda rwitwa ‘Umutsama’ ruri muri uyu murenge nawe ngo ayashyikiriza ubuyobozi bw’ umurenge.

Christine ati “Twatanze amafaranga ibihumbi 10 buri muntu tuyaha umunyaruganda (Deo), batubwira y’ uko tugomba kujya twenga urwagwa natwe tukarucuruza”.


Uruganda rwa Deo

Christine akomeza avuga ko bagiye bishyira hamwe ari abantu bane, bane bakajya barangura ibitoki bakenga urwagwa bakarucuruza. Itsinda rimwe ryaba ryahishije irindi tsinda rikarirangurira.

Aba baturage bavuga ko ikibazo cyabatangaje ari uko ubuyobozi bwababujije kwenga urwagwa nk’ uko ngo bwari bwabibemereye ntibunabasubize amafaranga bari batanze.

Mu kagari ka Rusagara abaturage batanze aya mafaranga ni abaturage 12 nk’ uko byemezwa n’ abayatanze baganiriye n’ itangazamakuru.

Uwo twahaye izina rya Paul agira ati “Habaye inama ku murenge bafata umwanzuro bavuga ko bazatoranya abantu bakajya benga atari mu kajagari ari abantu bake, n’ uko baravuga ngo buri wese azashake amafaranga ibihumbi 10, twe ntayo twari dufite twayagujije umuntu nyuma twaje kuyamwishyura”

Paul akomeza agira ati “Ni uko dutangira kwenga, hashize iminsi turangura ibitoki bati ‘bo muhagarare hazajya hakora inganda zonyine’

Paul na bagenzi be bavuga ko icyifuzo cyabo ari uko basubizwa amafaranga yabo cyangwa bakemererwa kwenga no gucuruza urwagwa.

Aba baturage bavuga ko urupapuro biyanditseho rugaragaza urutonde rw’ amafaranga batanze n’ amazina y’ abayatanze rubitswe na Deo nyiri uruganda. Kuri uyu wa 3 Ugushyingo 2019 ubwo Umunyamakuru wa UKWEZI yageraga kuri uru ruganda rukorera hagati mu ngo z’ abaturage bahise bafunga bahunga umunyamakuru.

Florence Kayisharaza, Umunyamabanga Nshingwabikorwa w’ umusigire mu murenge wa Kigembe yemera ko abaturage b’ abacuruzi batswe amafaranga yo kwishyurira ubwisungane mu kwivuza bagenzi babo batishoboye gusa ntabwo yemeranya n’ abaturage bavuga ubuyobozi bw’ umurenge bwababwiye ko abatanga ayo mafaranga barahabwa uburenganzira bwo kwenga urwagwa.

Kayisharaza avuga ko abaturage batanze ibyo bihumbi 10 bakaba bumva bakeneye kuyasubizwa bagana ubuyobozi bw’ umurenge bukayabasubiza.

Agira ati "Twebwe ntabwo twaha abaturage uburenganzira bwo kwenga inzoga zitemewe kuko n’ urwagwa rusanzwe rw’ ibitoki ushiduka bavanzemo na ’Nyirantare’. Gusaba abacuruzi gutera inkunga abaturage batishoboye ntabwo byakozwe ku bacuruzi b’ utubari gusa byakozwe kuri ba rwiyemezamirimo bose. Bo ubwabo nibo biyegeranyije bavuga amafaranga bagomba kuduha barayazana twishyurira abantu. Ubwo rero ayo makuru yandi aba yaragiye gutyo ntabwo tuzi aho yaturutse"

Yongeyeho ati "Abo ngabo bose bavuga ko batanze amafaranga, twebwe twasabye ko bafasha abaturage batishoboye, uwabikoze yumva ko ari icyo ngicyo agendereye azaze atugane tumukemurire ikibazo"

Jerome Rutaburingoga , Umuyobozi w’ Akarere ka Gisagara avuga ko iki kibazo cy’ abaturage batswe amafaranga bizezwa ko bazenga urwagwa atari akizi, gusa avuga ko abayabatse bagomba kuyabasubiza kuko yaba ari ruswa.


Meya Rutaburingoga avuga ko abaturage babaye koko baratswe amafaranga bizezwa uburenganzira bwo kwenga urwagwa byaba ari ruswa batswe

Yagize ati “Iyo ni ruswa kwaka ikintu binyuranyije n’ amategeko ntabwo twabishyigikira. Ikindi aramutse ayatanze kubw’ izo mpamvu yabeshywe nabyo yayasubizwa kuko gufasha biba bikwiye kugendana n’ umutima muzima ariko bibaye yarabafashije hari icyo yijejwe byakurikiranwa ntabwo byaba byemewe”.

Akarere ka Gisagara ni kamwe mu turere tuza imbere mu bijyanye no kwesa umuhigo wo gutanga ubwisungane mu kwivuza, gusa si ubwa mbere abaturage bako bagaragaje ko zimwe mu nziza ubuyobozi bukoresha kugira ngo iyi mituelle iboneke bubabangamiye.


INKURU ZA :
Tanga Igitekerezo
Ibitekerezo 1
Akiwacu Kuya 6-11-2019

Ibi , ninkogukubitirwa kumazi mama wawe tavomye, ibaze kwenga igitoki waciye , mwisambu yawe, ndetse unasorera, nacyo ukagifungirwa, ? Iyi niyo Demokalasi twaruhiye, imyaka nimyaniko.

English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...