AMAKURU

UKWEZI
pax

Gisagara : Abahinzi b’umuceri bangirijwe n’ibiza bafite ubwishingizi bishyuwe asanga miliyoni 13

Gisagara : Abahinzi b’umuceri bangirijwe n’ibiza bafite ubwishingizi bishyuwe asanga miliyoni 13
16-01-2020 saa 20:15' | By Nsanzimana Ernest | Yasomwe n'abantu 1093 | Ibitekerezo 2

Abahinzi bibumbiye muri koperative 3 zo mu murenge wa Musha bahinga umuceri kuri uyu wa Kane tariki 16 Mutarama 2020 ikigo cy’ ubwishingizi bakorana nacyo cyabahaye miliyoni 13 538 112 nyuma y’uko imyaka yabo yagijwe n’ibiza.

Abahinzi bishyuwe ni abo muri koperative Cyili, Ngiryi na Nyiramageni. Hegitari 113 z’umuceri bari bahinze zangijwe n’ibiza mu minsi ishize.

Muri hegitari z’umuceri zangijwe n’ibiza zikaba zishyuwe uyu munsi, harimo 38 za koperative Cyili yishyuwe Frw 3,500,174 ; hegitari 30 za koperative Ngiryi zishyuwe Frw 4,453,862 ; na hegitari 45 za koperative Nyiramageni zishyuwe Frw 5,584,077.

Perezida wa Kopedative ya Ngiryi, Nshimiyimana Evariste avuga ko bishimiye kuba bagobotswe n’ubwishingizi bikaba bibarinze igihombo.

Avuga ko hari ibihingwa byinshi bikwiye gushyirwa mu bwishingizi kuko bifitiye akamaro umubare munini w’abahinzi.

Yagize ati “Ibishyimbo, inyanya, imyumbati n’urutoki byagombye kwishingirwa kuko hari ibyangijwe n’ibiza mu minsi ishize.”

Umuhuzabikorwa w’imishinga muri Minisiteri y’Ubuhinzi (MINAGRI), Nirere Marion avuga ko bahereye ku bihingwa bibiri by’Umuceri n’ibigori, akavuga ko bateganya kwishingira n’ibindi bihingwa birimo Ibishyimbo, Soya, imyumbati n’urusenda bitarenze ukwezi kwa Nyakanga.

Yagize ati “Iyi gahunda ireba abahinzi n’ubworozi, aho abahinzi batanga 60% Leta ikabishingira 40%.”

Nirere avuga ko iyi gahunda ijya gutangira, hari bamwe mu bahinzi bayishidikanyagaho bumva ko itazashyirwa mu bikorwa ariko ko ubu bamaze kwishyura abahinzi n’abarozi bo mu Turere dutandukanye.

Umuyobozi wungirije ushinzwe Iterambere ry’ubukungu mu Karere ka Gisagara, Habineza Jean Paul avuga ko umubare munini w’abatuye aka Karere utunzwe n’umurimo w’ubuhinzi n’ubworozi.

Uyu muyobozi avuga ko yifuza ko iyi gahunda yo gushinganisha ibihingwa n’amatungo yakwihutishwa ikagera no ku matungo magufi ndetse no ku gihingwa cy’urutoki gikunda kwera mu Karere ka Gisagara.

Yagize ati “Gisagara ni Akarere keramo ibihingwa bitandukanye ni yo mpamvu twifuza ko ibihingwa byose bijya mu bwishingizi.”

Kuva iyi gahunda yatangira muri Mata 2019, inka zigera ku bihumbi bine (4000) zimaze gufata ubwishingizi, muri zo 59 zarapfuye, izimaze kwishyurwa ni 51. Hegitari 1775,61 mu gihugu hose ziri mu bwishingizi.

Iyo habaye igihombo cyishyurwa hagati y’iminsi 7 na 15 kandi Leta ikurikirana ko yubahirijwe.


Umuhuzabikorwa w’imishinga muri Minisiteri y’Ubuhinzi (MINAGRI), Nirere Marion

Umuyobozi wungirije ushinzwe Iterambere ry’ubukungu mu Karere ka Gisagara, Habineza Jean Paul


INKURU ZA :
Tanga Igitekerezo
Ibitekerezo 2
Benimana Kuya 18-01-2020

Ndashimira Leta yacu y’u Rwanda Idahwema gutekerereza abaturage icyabateza imbere. ubwishingizi bwiza cyane abahinzi b’umuceli ubwishingizi burabagobotse cyane ni ibyo gushimirwa Leta yacu y’u Rwanda Iyobowe na HE Paul KGAME. Murakarama.

Benimana Kuya 18-01-2020

Ndashimira Leta yacu y’u Rwanda Idahwema gutekerereza abaturage icyabateza imbere. ubwishingizi bwiza cyane abahinzi b’umuceli ubwishingizi burabagobotse cyane ni ibyo gushimirwa Leta yacu y’u Rwanda Iyobowe na HE Paul KGAME. Murakarama.

IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA