AMAKURU

UKWEZI
ubumwe

Gisagara: Abafungiwe kiliziya itari yujuje ibisabwa bujuje iya miliyoni 224

Gisagara: Abafungiwe  kiliziya itari yujuje ibisabwa bujuje iya miliyoni 224
8-07-2019 saa 19:41' | By Nsanzimana Ernest | Yasomwe n'abantu 2712 | Ibitekerezo

Mu murenge wa Gikonko mu karere ka Gisagara hatashywe ku mugaragaro centrale ya Gasagara yubatswe mu gihe cy’ umwaka umwe n’ igice nyuma y’ uko bahagaritse gusengera mu yari ihasanzwe kuko yari ishaje ku buryo yashoboraga gushyira ubuzima bw’ abantu mu kaga.

Iyi Centrale ya Gasagara imaze gufungwa mu nsengero zitari zujuje ibisabwa, abakirisito bayisengeragamo bahuye n’ imbogamizi yo kutabona aho basengera kuko izindi nsengero za gatolika zose zari kure yabo.

Uwimana Jeannette ati “Hari harabaye ikibazo cy’ inyubako yari ishaje barayifunga. Ahantu twasengeraga hari kuri paruwasi hari kure abantu benshi bari baracitse intege, nugerageje kujyayo byari nka rimwe mu kwezi. Ubu turishimye”.


Centrale nshya ya Gasagara ifite ubushobozi bwo kwakira abantu 1200, ikagira na cave irimo salle y’ inama

Joseph Nsekanabo w’ imyaka 88 yavuze ko nk’ abakirisito bumva baguwe neza kuko bongeye kubona centrale yo gusengeramo hafi yabo.

Yagize ati “Twari twaraguye, umuntu akagushwa no kutangira aho gusengera. I Gikonko hari kure,I Nyanza hari kure, I Kiruhura hari kure, none bije iwacu aya ni amahoro twishimye twaguwe neza”

Umuyobozi w’ akarere ka Gisagara Rutaburingoga Jerome yashimye abateye inkunga iyi centrale asaba abakirisito guhuza amasenesho n’ ibikorwa.


Meya Rutaburingoga Jerome ubwo yashyikirizaga impano intumwa ya Papa mu Rwanda Musenyeri Andrzej Józefowicz, Arkiepiskopi

Yagize ati “Communauté Saint Boniface dufatanya mubikorwa byinshi ntabwo ari iyi kiliziya hari n’ amashuri bubatse, ku buryo tubashimira. Abantu turabasaba kureka amagambo gusa ahubwo ibyo basenga babihuze n’ ibikorwa bakora mu kazi ka buri munsi”.

Umushumba wa Diyosezi ya Butare akaba na Perezida w’ Inama y’ abepisikopi mu Rwanda Musenyeri Philippe Rukamba wafunguye ku mugaragaro iyi centrale yasabye abakirisitu kurangwa n’ ubufatanye.

Yagize ati “Gufatanya , gushyira hamwe, nicyo kintu gikuru mu bintu byose, umuntu ashobora kwibwira ko akomeye ku giti cye, ariko twese turoroshye.”

Mgr Rukamba yavuze ko umurimo wa mbere wa kiliziya ari uguhindura imitima y’ abantu bakabaho uko Imana ishaka, ngo ibindi byose biziraho.

Centrale ya Gasagara yubatswe k’ ubufatanye bw’ abakirisitu n’ umuryango w’ Abadage Saint Boniface. Yubatswe mu gihe cy’ umwaka umwe yuzura itwaye miliyoni 224 z’amafaranga y’u Rwanda.


Musenyeri Filipo Rukamba na Musenyeri Andrzej Józefowicz, Arkiepiskopi mu mwanya wo gutanga ituro ry’ ishimwe

Centrale ya Gasagara yari ishaje cyane, itajyanye n’ igihe bituma Leta iyihagarika umwaka ushize mu nkubiri yo gufunga insengero zitujuje ibisabwa.

Gusa ibi byabaye mu gihe abakristu bayo bari baratangiye gukusanya amafaranga yo gusana iyo santrali kuko babonaga ishaje inashobora kugwa bitunguranye ikaba yashyira mu kaga ubuzima bw’abayisengeraga mo.

Mu ntangiriro z’ umwaka ushize wa 2018, nibwo Leta y’ u Rwanda yakoze umukwabo wo gufunga insengero zitari zujuje ibisabwa. Icyo gihe hafunzwe insengero zirenga 1000 z’ amadini n’ amatorero bitandukanye.

Leta y’ u Rwanda isaba ko insengero zigomba kuba zidasakuriza abaturage, zikagira ubwiherero na parikingi z’ amamodoka bihagije.


Ibirori byitabiriwe n’abandi ba padiri baturutse mu ma paruwasi atandukanye

Abakristu bari bitabiriye ari benshi

Nyuma y’ibirori hafashwe ifoto y’urwibutso


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...