AMAKURU

UKWEZI
ubumwe

G.S.Gafumba: Mudasobwa zimaze igihe zibitse mu kabati zidakoreshwa

G.S.Gafumba: Mudasobwa zimaze igihe zibitse mu kabati zidakoreshwa
2-09-2019 saa 06:32' | By Nsanzimana Ernest | Yasomwe n'abantu 1142 | Ibitekerezo

Mu ishuri rya G.S. Gafumba riherereye mu murenge wa Rusatira mu karere ka Huye abanyeshuri n’ abarimu baho babangamiwe no kuba iri shuri ritagerwaho n’ umuriro w’ amashanyarazi.

Ibi bituma abana biga isomo rya mudasobwa mu magambo gusa kuko imirasire bari bafite imaze amezi ane ipfuye burundu.

Abiga mu mashuri yisumbuye bo barangiza nta wurakoza urutoki kuri mudasobwa kuko ntazo bafite kuko izigera ku 163 zihari ari izigenewe abiga muri primaire.

Umunyeshuri uhagarariye abiga muri secondaire muri GS Gafumba, Uwajeneza Jules yatangarije UKWEZI ko muri iri shuri kwiga mudasobwa bigoye.

Ati “Uko twiga ICT biragoye kuko kwiga ICT bisaba ngo ukore theorie ukore na pratique, pratique rero kuyikora twebwe ni ibintu bitabaho, umwana ahera mu wa mbere akarinda agera mu wa 3 atarabona computer ngo abe yayijyaho ngo yandike ibintu bitandukanye”.


Umunyeshuri uhagarariye abiga muri secondaire muri GS Gafumba, Uwajeneza Jules

Abayisenga Jean de Dieu avuga ko mudasobwa bayiga mu magambo gusa ati “Iyo turimo kwiga isomo risaba mashine nta muntu uba wayibona kubera ko nta mashanyarazi. Iyo ubajije umwarimu ngo tuzabikora gute arakubwira ngo byige ubyandika”

Ishimwe Sarah umaze umwaka yiga muri iki kigo mu kiciro rusange tronc commun ntabwo arakora kuri mudasobwa.

Ati “Kuva nagera kuri iki kigo sindabona mudasobwa…Iyo uganiriye n’ abiga ahandi barakubwira ngo kuri computer habaho ibintu bya mouse ukumva barakurusha byinshi, twe ibyo ntabwo tubasha kubimenya kuko twiga, twandika ku kibaho no mu ikaye gusa”.

Umuyobozi wungirije wa GS Gafumba, ushinzwe amasomo Mbonigaba Alex agaragaza ko kutagira umuriro w’ amashanyarazi ari imbogamizi ku myigire no ku myigishirize agasaba ko bakwegerezwa umuririro.

Umuriro iri shuri ryari rifite wari imirasire bahawe na Minisiteri y’ Uburezi. Iyi mirasire kuva mu kwezi kwa kane k’ uyu mwaka yarapfuye burundu ariko na mbere y’ uko ipfa burundu yabanje kujya ipfa, ikorangera igakora ikazongera igapfa.

Mbonigaba avuga kandi ko mudasobwa 163 ziri kuri iri shuri ari iz’ abanyeshuri biga mu mashuri abanza. Bivuze ko abiga muri secondaire ibyiciro byombi tronc commun na superieur nta mudasobwa zabo zihari.


Umuyobozi wungirije wa GS Gafumba, ushinzwe amasomo Mbonigaba Alex

Agira ati “Kutagira umuriro bigira ingaruka kuri mwarimu kuko ibyo yigishije ntabwo abona uko akoresha pratique ngo arangize programe. Natwe nk’ ubuyobozi bitugiraho ingaruka mu gihe cyo gukora amaraporo bidusaba ko twimuka tukajya ahandi rimwe na rimwe, ibyinshi bikaba bikoze n’ intoki”

Uyu muyobozi avuga ko kuba abanyeshuri biga muri iri shuri mu mashuri abanza, n’ ayisumbuye ibyiciro byombi badakoresha mudasabwa ari ikibazo.

Ati “Imbogamizi zaboneka nyuma y’ uko bava hano mu gihe ibyo bibazo bitaba bikemuwe vuba, ingaruka mbi zirahari kuri aba bana kubera ko icya mbere baziga mu magambo, bakarangiza amashuri abanza bataramenya ibyo bagomba kuba bazi”.

Yakomeje agira ati “Ku gice cy’ amashuri yisumbuye naho haba ikiciro rusange ndetse n’ icya 2 twatangiye, harimo inzitizi kuko niba umunyeshuri arangiza umwaka wa 3 nta mashine afite bizagira ingaruka ku myigire ye ndetse no mu buzima busanzwe kuko turi mu Isi ishaka ko umuntu agendana n’ ikoranabuhanga”

Ku kibazo cy’ umuriro w’ amashanyarazi utaragera kuri iri shuri, umuyobozi w’ akarere ka Huye Ange Sebutege avuga ko muri uyu mwaka w’ ingengo y’ imari hatarimo kuwugezaho gusa ngo bafatanya n’ iri shuri gushaka uko imirasire bafite yakongera igakora.

Ati “Kiriya kibazo cy’ umuriro bafite nanjye ubwanjye narabasuye ziri batiri zifite ikibazo. Imashini zo barazifite, na baterie zirakora ariko zikongera zigahura n’ ikibazo. Icyo twarimo dukora ni ukwagura amashanyarazi akazagerayo, gusa muri uyu mwaka w’ ingengo y’ imari ntabwo byateganyijwe ariko turabiteganya ko muri kari kagari naho umuriro wagerayo…nk’ iriya mirasire kuko ikibazo nanone cyongeye kugaragara twakongera tugasubirayo tukareba ikintu twabafasha mu gihe batarabona umuyoboro w’ amashanyarazi.”

Umwaka ushize w’ ingengo y’ imari akarere kakwirakwije umuriro kuva Mugogwe ugera Ruhashya. Muri uyu mwaka hazibandwa ku mirenge ibiri itarageramo umuriro ariyo Kigoma na Rwaniro.

Meya Sebutegeko avuga ko gukwirakwiza amashanyarazi bitaragerwaho neza gusa agaragaza ko intambwe yatewe ari ndende mu myaka 25 ishize.

Ati “Byavuye kuri 6% ubu tugeze kuri 43%…Intego ni uko muri 2024 abaturage bose bagomba kuba bafite amashanyarazi”.

Kuri iri shuri rya GS Gafumba ikibazo cy’ umuriro gikemutse cyonyine abiga mu mashuri abanza bashobora gukoresha mudasobwa ariko abiga mu mashuri yisumbuye basigarana ikibazo cyo kudakoresha mudasobwa kuko bo ntazo bafite.


Abiga secondaire kuri GS Gafumba barangiza batarakora pratique kuri mudasobwa


Izi mudasobwa zigenewe abiga mu mashuri abanza imwe igura amadorari ari hejuru ya 200


Imirasire yabafashaga kubona amashanyarazi imaze amezi 4 yarapfuye burundu


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...