konka coffee
KONKA

AMAKURU

UKWEZI
Minijust

Eric waburanye n’ umuryango mu 1997 yongeye kuwubona gihamya isigaye ni ADN

Eric waburanye n’ umuryango mu 1997 yongeye kuwubona gihamya isigaye ni ADN
25-03-2019 saa 13:05' | By Nsanzimana Ernest | Yasomwe n'abantu 14280 | Ibitekerezo 15

Ku wa Gatandatu w’ icyumweru gishize nibwo Ikinyamakuru UKWEZI twabagejejeho inkuru y’ umusore witwara Eric watoraguwe na Croix Rouge mu 1997. Uyu musore yavugaga ko bimubabaza kuba atazi umuryango akomokamo, ubu yamaze kuwubona gihamya isigaye ni ikizami kizagaragaza isano y’ amaraso ADN.

Kuri iki Cyumweru tariki 24 Werurwe 2019, nibwo Eric Croix Rouge yahimbye Nsengiyumva kugira ngo agire umwirondoro wuzuye mu bitabo by’ irangamimerere yagiye kureba umuryango wari wamubwiye ko wabuze umwana witwa Eric.

Uyu musore yabuze afite imyaka ibiri, nta byinshi yashoboraga kuvuga uretse izina rye Eric. Abamutoraguye baramubajije ngo witwa nde ati ‘Eric’ bahita bamufotora ifoto byabyandikaho.

Ababyeyi ba Eric bamukubise amaso bahita babona ari umuhungu wabo baburanye mu myaka 22 ishize maze ibyishimo bibataha kumutima.

Bagirayabo Anastase utuye mu karere ka Huye mu murenge wa Mbazi akagari ka Tare avuga ko abonye Eric yumvise yishimye cyane kuko yari yongeye kubona umuhungu we.

Yabwiye UKWEZI ati “Njyewe nabaye nk’ aho mbonekewe kumwe wumva abantu babonekerwa. Nabonye udufoto twe mbandasimbutse njya mu bicu... Nzamukoreshereza umunsi mukuru umeze nk’ ubukwe bwanjye na nyina mbatumire namwe abanyamakuru. ”.

Uyu musore wahugukiye ibyo gushakisha umuryango we muri uyu mwaka wa 2019. Avuga ko yagiye mu ishami rya CICR rishinzwe gushakisha imiryango akabaza dosiye ye bakamuha udufoto yafotowe akimara gutoragurwa.

Utwo dufoto nitwo yajyanye mu itangazamakuru ngo rimufashe kutumenyekanisha arebe ko yabona umuryango we.

Bagirayabo Anastase na Nyiraneza Yozefa bemeza ko uyu musore Eric ari umwana wabo babonye ayo mafoto mu itangazamakuru bahita bamuhamagara kuko yari yanatangaje numero ye ya telefone.

Bavuga ko bari baramwise Eric Nshimiyimana, ariko akaba afite undi bavukanye ari impanga witwa Patrick Nsengiyumva.

Nyiraneza Yozefa avuga ko bageze mu mashyamba yo muri Kongo, ahetse Patrick naho Eric ahetswe na nyirasenge, ubwo ariko nako amasasu acicikana nyirasenge wa Eric wari umuhetse ngo yarahagaze ngo arebe ko abana be yari amaze kuburana nabo basigaye inyuma nuko Yozefa akomeza imbere.

Ati “Bari kuturasa muramukazi wanjye yarahagaze, ndamubwira nti wowe wihagarara arambwira ngo njyewe ntegereje abana banjye”

Yozefa avuga ko yageze imbere akahasanga abana ba muramukazi we. Uwo muramukazi we ntarongera kumubona kuva ubwo. Yozefa avuga ko yakomezanyije n’ abana ba muramukazi we bakanahutakana.

Nyiraneza Yozefa yavuze ko akimara kubura umwana we Eric Nshimiyimana yamaze nk’ umwaka kuvuga byaramunaniye, akageraho akiyakira yumva byararangiye. Gusa ngo we n’ umugabo we bahoraga basenga basaba Imana ngo izongere ibahuze n’ umwana wabo.

Uyu musore kuri ubu utuye mu karere ka Gasabo Croix Rouge yamubwiye ko yamutoraguye mu gace ka Goma na Masisi. Iki nacyo ni ikimenyetso cy’ uko ari umwana wa Yozefa na Anastase kuko ariho Eric Nshimiyimana yaburaniye n’ umuryango we. Ibindi bimenyetso ni amafoto kuko amafoto ya Eric Croix Rouge yahimbye Nsengiyumva asa n’ ay’ abantu bo mu muryango wa Anastase n’ umuryango wo kwa Yozefa.


Iyi foto niyo Bagirayabo Anastase yabonye ahita yemeza adashidikanyije ko Eric ari umwana we. Iya Eric yo mu 1997

Yozefa avuga ko kuri iki Cyumweru ubwo yongeraga kubona Eric yumvaga bakwigumanira n’ ubwo bitakunze. Ati “Numvaga atasubira I Kigali tukigumanira”

Eric twongeye kuvugana avuye gusura uyu muryango avuga ko ibimenyetso byose bigaragaza ko ari umwana w’ uyu muryango. Ati “Mfite ikizere ku kigero cya 80% ko uriya ari umuryango wanjye. Ikizami cya ADN nicyo kizabyemeza bidasubirwaho”.

Bagirayabo Anastase wavuze ko ari umubaji, yabwiye UKWEZI ko n’ inka ye nibiba ngombwa azayitanga ariko akabona amafaranga yo gukoresha ikizami cya ADN kizemera bidasubirwaho ko Eric wahimbwe Nsengiyumva ari umwana we. Ngo ijwi rya Eric ahora yibuka ni aho bari bihishe mu bihuru amasasu acicikana hirya no hino , impanga ya Eric yitwa Patrick ikarira maze Eric akavuga ngo ‘Njye ntabwo ndiburire’.

Inkuru bifitanye isano:Eric watoraguwe muri 1997 yashyize ahagaragara ifoto ye ngo arebe ko yabona umuryango we


INKURU ZA :
Tanga Igitekerezo
Ibitekerezo 15
mahoro Kuya 29-03-2019

Rwose nanjye ndarangisha umwana wanjye witwa IMFURAYABO Brucellance yabuze mu gihe cy’ihunguka muri Congo. Mumfashe kubona umwana wanjye nanjye Imana izabibahere umugisha cyagwa niba atakiriho nabyo mbimenye nihanagura amarire birangire.

Ange Kuya 27-03-2019

Ko mutatweretse iyo mpanga ye se nibahuguka basa?

Peace Kuya 27-03-2019

Nukuri asa na Mama we cyane gusa ni byiza ko DNA ifatwa kuko niyo yemeza neza ko aruwabo ark ubundi biragaragara pe Imana ishimwe cyane.

Iris Kuya 26-03-2019

disi iyi famille ndayizi!uyu mu papa bakunda kumwita mwirabura Imana ishimwe pe

Eric Kuya 26-03-2019

Mwese ndabashimiye ndetse ni kinyamakuru, Imana ibahe umugisha
Undi witwa Eric urangisha famille muduhuze ndebe ko wenda ari we nyiri unuryango

Gitego Kuya 25-03-2019

None ko twunva harundi urangisha umuryango we uri muri American nawe nuwabo se,nimumufashe nawe nyabuna wenda yabona familles ye.murakoze cyane kubwiyonkuru nziza.

Eric Kuya 25-03-2019

Nukuri ni byiza nange ndabyishimiye, nuko bavuga ngo "ntukishimire intsinzi urugamba rugikomeje " uwiteka azamfasha kandi nzababona bange

Paul habagusenga Kuya 25-03-2019

Waoooo mucuti nibyiza pe ihangane kugihe gishize uraje wishime Imana nigufashe uve mugihirahiro.Croix rouges nayo niyo gushimwa

Daniel twiringiyimana Kuya 25-03-2019

Ahwiiii Imana yo meijuru ishimwe Devoue rwose DNA nuko isabwa ark mama mbona aho ni mama wawe pe!

iganze Kuya 25-03-2019

Ni byiza cyane Nyagasani asingizwe. Croix Rouge bakora ibintu byiza, ariko ndabagaya iki: Ibi umwana yakoze iyo bababarabikoze jkera, umwana ntiyari gutandukana n’umuryango we iyi myaka yose. Baba baramubonye kera. Niba bafite abandi bana nkaba nibatangaze amazimna yabo vuba barebe ko babona imiryango yabo.

Jacques Kuya 25-03-2019

Jye ndabona ikizamini atari ngombwa kuko ndabona ari fotokopi ya Nyina neza neza. Gusa Wenda ni ngombwa kuzuza ibisabwa kugira ngo banabyuzuze mu irangamimerere ariko still birigaragaza. Nanjye nti Uwiteka ahabwe icyubahiro. Akora imirimo ihambaye

joseph Kuya 25-03-2019

Imana ihabwe icyubahiro rwose!!Iyi nkuru irakora ku mutima

Habumugisha Kuya 25-03-2019

Yoo ndabona basa rwosep ni byiza cyane musore na rebye mbona uwomugabo murasa ariko mam wawe musaneza o mbega byizawe

Nina Kuya 25-03-2019

Burya disi Croix rouge igira akamaro cyane. Yewe twirinde intambara kuko nta kiza cyayo.

makulata Kuya 25-03-2019

Disi koko arasa na nyina nukuri Imana Ihabwe icyubahiro pe
ko uyu musore yongeye kubona umuryango we

English
IGURIRE
Reba Ibindi Byinshi
konka Monaco
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...