AMAKURU

UKWEZI
cheno 2020

Abagenzacyaha 79 barahiye basabwe kurinda RIB icyasha [AMAFOTO]

Abagenzacyaha 79 barahiye basabwe kurinda RIB icyasha [AMAFOTO]
11-02-2020 saa 22:05' | By Nsanzimana Ernest | Yasomwe n'abantu 861 | Ibitekerezo 1

Minisitiri w’ Ubutabera akaba n’intumwa nkuru ya Leta Johnston Busingye yakiriye indahiro z’abagenzacyaha 79 n’abunganizi babo 11 abasaba kurinda icyasha urwego rw’ igihugu rw’ubugenzacyaha.

Uyu muhango wabereye mu karere ka Nyanza kuri uyu wa 11 Gashyantare 2020.

Abagenzacyaha barahiye barimo abinjiye muri uru rwego barahoze muri CID n’ abinjiye bwa mbere mu kazi k’ubugenzacyaha. Mu bagenzacyaha n’abunganizi babo barahiye harimo abagore batageze kuri 14 gusa.

Minisitiri Busingye wakiriye indahiro z’ aba bagenzacyaha yababwiye ko umurimo w’ ubugenzacyaha ari umurimo usaba byinshi, birimo gutahura ibyaha, kugenza ibyaha no gukora dosiye kandi ngo bigomba gukoranwa ubushishozi kugira ngo ubutabera butagira ikibubangamira.

Yakomeje avuga akazi k’ubugenzacyaha ari akazi gasaba umuntu kuba umuntu mwiza kuko aba agomba kuganira n’ukekwaho ibyaha ngo ntakwiye kumuhohotera kubera uburakari.

Ati “Uburakari bw’umukozi wa RIB bugaragarira muri dosiye. Ntabwo bugaragarira mu gipfunsi, ntabwo bugaragarira mu rushyi, ntabwo bugaragarira mu kuka inabi, ntabwo bugaragarira mu kubona ibimenyetso ku ngufu, ntabwo bugararira ku bindi bintu byose wakoresha kugira ngo ugaragaze ko urakaye, bigaragarira mu buryo ukora dosiye yawe”.

Busingye yibukije abagenzacyaha ko inshingano yabo ari ugutanga ubutabera, ndetse ko bo n’ abashinjacyaha n’abacyamanza bafite inshingano yo gutahura uwabeshyewe bakabigaragaza.

Aba bagenzacyaha barahiriye izi nshingano mu gihe mu Rwanda hakomeje kwiyongera icyaha cy’ihohoterwa rishingiye ku gitsina ahanini kigaragara mu kwiyongera kw’abana baterwa n’ubwicanyi bwo mu miryango.

Minisitiri Busingye ati “Ihohoterwa ni ibintu umuntu akora yabitekerejeho ntabwo ari ibiza tugomba kubana nabyo, tugomba rero gukora ku buryo uwabifatiwemo atazabisubiramo, cyangwa se utarabijyamo nabona uwabifatiwemo uko byamugendekeye azirinde kubijyamo. Izo nzira ebyiri nizo zizatuma igihugu cyacu gihagarika ihohoterwa rishingiye ku gitsina”.

Busingye yasabye aba bagenzacyaha kurinda RIB icyasha ati "RIB turayikunda,icyo ukunda rero wirinda ikintu cyose cyatuma abantu bagitakariza icyizere"

Urwego rw’ igihugu rw’ ubugenzacyaha RIB rumaze umwaka umwe n’amezi 10 rushyizweho.

Umunyamabanga Mukuru wungirije wa RIB Isabelle Kalihangabo yasabye abagenzacyaha barahiye kurangwa n’imyitwarire myiza birinda ubusinzi na ruswa kuko amategeko abihana.

Ati “Ni muri urwo rwego, mu mahame urwego rw’ubugenzacyaha bugenderaho harimo ihame ryo kwamagana ruswa mu bagenzacyaha. Kugira ngo ibyo bigerweho, umugenzacyaha ugaragaye mu bikorwa bya ruswa ntabwo yihanganirwa. Muri iyi myaka tumaze itaragera kuri ibiri hari abakozi bagera kuri 19 bamaze cyangwa se barimo gukurikiranwaho ruswa”.




Abagenza cyaha barahiye ni 79 n’abunganizi babo 11 bose hamwe bakaba 90

Minisitiri Busingye yakira indahiro z’abagenzacyaha


Minisitiri Busingye yasabye abagenzacyaha kugenza icyaha cyo kunga uwakoze icyaha n’uwagikorewe, ngo ubwunzi buba mbere


INKURU ZA :
Tanga Igitekerezo
Ibitekerezo 1
Semwema Kuya 11-02-2020

Itegeko niki, Icyaha niki? RIB, FPR, RPF, CID bitaniye hehe?? Ibindi muzabimbaze nyuma

English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...